ଅର୍ଗସ ବ୍ୟୁରୋ : ନୂଆ ଭୋଟରଙ୍କୁ ସଚେତନ ପାଇଁ ନୂଆ ଉଦ୍ୟମ । ରାଷ୍ଟ୍ରୀୟ ମତଦାତା ଦିବସରେ ବିଜେପି ପକ୍ଷରୁ ଦେଶବ୍ୟାପୀ ଆୟୋଜିତ ‘ନମୋ ନବ ମତଦାତା ସମ୍ମିଳନୀ’କୁ ନେଇ ଉତ୍ସାହିତ ଦେଶର ଯୁବବର୍ଗ । ଭିଡିଓ କନଫରେନ୍ସିଂ ମାଧ୍ୟମରେ ପ୍ରଧାନମନ୍ତ୍ରୀ ମୋଦି ଯୁବ ଭୋଟରଙ୍କୁ ସମ୍ବୋଧିତ କରିବା ସହ ୨୦୪୭ ସୁଦ୍ଧା ବିକଶିତ ଭାରତ ଗଠନର ନେତୃତ୍ୱ ନେବାକୁ ଦେଇଛନ୍ତି ଆହ୍ବାନ । ନମୋ ନବ ମତଦାତା ସମ୍ମିଳନୀରେ ଦେଶର ୫ ହଜାର ସ୍ଥାନରୁ ଯୋଡ଼ି ହଇଥିଲେ ୫୦ ଲକ୍ଷରୁ ଅଧିକ ନୂଆ ଭୋଟର । ଓଡ଼ିଶାରେ ୨୫୦ ସ୍ଥାନରୁ ପ୍ରାୟ ଅଢେଇ ଲକ୍ଷ ନୂଆ ମତଦାତା ବି ହୋଇଥିଲେ ସମ୍ମିଳନୀରେ ସାମିଲ ।

ନମୋ ନବ ମତଦାତା ସମ୍ମିଳନୀ ଆୟୋଜନ ସହ ୨୦୨୪ ନିର୍ବାଚନ ପାଇଁ ଔପଚାରିକ ଭାବେ ପ୍ରଚାର ଅଭିଯାନର ଶୁଭାରମ୍ଭ କରିଛି ବିଜେପି । `ସ୍ବପ୍ନ ନୁହେଁ ବାସ୍ତବତା ବାଣ୍ଟି, ସମସ୍ତଙ୍କ ପସନ୍ଦ ପାଲଟିଛନ୍ତି ମୋଦି' ଗୀତ ଜାରି କରି ବିରୋଧୀଙ୍କୁ ନୂଆ ଭାରତର ଶକ୍ତି ଦେଖାଇଛି ବିଜେପି । କ୍ଷମତା ନିଶାରେ ଚୁର ଇଣ୍ଡି ମେଣ୍ଟ ଖଣ୍ଡଖଣ୍ଡ ହେଉଥିବାବେଳେ ଯୁବ ଭୋଟରଙ୍କ ଉପରେ ଫୋକସ କରିଛି ବିଜେପି । ବୁଧବାର ପଶ୍ଚିମବଙ୍ଗରେ ମମତା ସରକାର ଓ ଦିଲ୍ଲୀ ଆପ ସରକାର ଇଣ୍ଡି ମେଣ୍ଟ ଉପରୁ ଭରସା ତୁଟାଇଥିବାବେଳେ ଗୁରୁବାର ଇଣ୍ଡି ମେଣ୍ଟକୁ ଲାଗିଛି ଆଉ ଏକ ଶକ୍ତ ଧକ୍କା । ବିହାରରେ ଆସନ ବୁଝାମଣାରୁ ଦୂରେଇ ଯାଇଛନ୍ତି ନୀତୀଶ କୁମାର ।

ଅଧିକ ପଢନ୍ତୁ ଭାରତ ଖବର

ବିଜେପି ଫୋକସରେ ଯୁବ ଭୋଟର । ଚଳିତ ଲୋକସଭା ନିର୍ବାଚନରେ ୪୦୦ରୁ ଅଧିକ ଆସନ ସହ ୫୧ ପ୍ରତିଶତ ଭୋଟ୍ ହାସଲ କରିବାକୁ ଲକ୍ଷ୍ୟ ରଖିଛି ଦଳ । ଏହାର ଆଧାର ବନିବେ ଯୁବ ଭୋଟର । ନିକଟରେ ଶେଷ ହୋଇଥିବା ୫ ରାଜ୍ୟ ବିଧାନସଭା ନିର୍ବାଚନରେ ବିଜେପିକୁ ୩ଟି ରାଜ୍ୟରେ ମିଳିଥିଲା ବିଜୟ । ଆଉ ଏହା ପଛରେ ଯୁବ ଭୋଟରଙ୍କର ବଡ଼ ଭୂମିକା ଥିଲା । ଗୋଟେ ପଟେ ଓଡ଼ିଶାର ଯୁବ ଭୋଟରଙ୍କୁ ନବୀନଙ୍କ ସଭାକୁ ଆଣିବା ପାଇଁ ପ୍ରଲୋଭନ ଓ ଧମକ ଦିଆଯାଉଛି । ଅନ୍ୟପଟେ ପ୍ରଧାନମନ୍ତ୍ରୀଙ୍କ ସହ ସମ୍ବାଦ ପାଇଁ ସାରା ଦେଶରେ ଯୁବ ଭୋଟରଙ୍କ ମଧ୍ୟରେ ପ୍ରବଳ ଉତ୍ସାହ । ଏହି ଉତ୍ସାହକୁ ଆଗାମୀ ନିର୍ବାଚନ ପରିଣାମ ସହ ଯୋଡ଼ି ଦେଖୁଛନ୍ତି ରାଜନୈତିକ ପଣ୍ଡିତ ।

Argus News | argus news | -Argusnews Home: Odisha Latest News, Breaking News, Trending News, Live TV and more