ଅର୍ଗସ ବ୍ୟୁରୋ : କୃଷକଙ୍କୁ ପ୍ରଧାନମନ୍ତ୍ରୀଙ୍କ ବଡ଼ ଉପହାର । କୃଷି କ୍ଷେତ୍ରକୁ ଗୁରୁତ୍ବ । ୬୧ଟି ଫସଲର ୧୦୯ପ୍ରକାର ଅମଳକ୍ଷମ ବିହନ ଲଞ୍ଚ କଲେ ପ୍ରଧାନମନ୍ତ୍ରୀ ମୋଦି । ଏଥିମଧ୍ୟରେ ୩୪ଟି କ୍ଷେତ ଫସଲ ବା ଫିଲ୍ଡ କ୍ରପ ରହିଥିବାବେଳେ ୨୭ଟି  ହର୍ଟିକଲଚର ବିହନ ରହିଛି । ଅଧିକ ଅମଳକ୍ଷମ ଓ ପରିବେଶ ଅନୁକୂଳ ବିହନର ବିକାଶ କରିବାକୁ ମୋଦି ସରକାରଙ୍କ ପଦକ୍ଷେପର ଫଳ ମିଳିଛି । ଭାରତୀୟ କୃଷି କ୍ଷେତ୍ରରେ ନୂଆ ବିପ୍ଳବ ଆଣିବାକୁ ଓ ଖାଦ୍ୟ ସୁରକ୍ଷା ବ୍ୟବସ୍ଥାକୁ ବଳ ଦେବା ପାଇଁ ମୋଦି ସରକାରଙ୍କ ଏହି ପ୍ରୟାସକୁ ଚାଷୀ ପ୍ରଶଂସା କରିଛନ୍ତି । ଫସଲ ଉତ୍ପାଦନରେ ଚାଷୀଙ୍କ ସମସ୍ୟାକୁ ଦୃଷ୍ଚିରେ ରଖି ନୂଆ ବୀଜର ବିକଶିତ କରିଛନ୍ତି ବୈଜ୍ଞାନିକ । ଯେଉଁ ବିହନ ଉପରେ  ପ୍ରତିକୂଳ ଜଳବାୟୁର ପ୍ରଭାବ କମ ପଡ଼ିବ ବୋଲି ବୈଜ୍ଞାନିକ ଦାବି କରିଛନ୍ତି ।

ଅଧିକ ପଢନ୍ତୁ ଭାରତ ଖବର

ପିଏମ ଜାରି କରିଥିବା ବିହନ ମଧ୍ୟରେ ଆଖୁ, ପରିବା,ବାଦାମ, ଦଳଦୀ, ମସଲା ଜାତୀୟ ଫସଲ ସହ ବିଭିନ୍ନ ଔଷଧୀୟ ବୀଜ ସାମିଲ ରହିଛି । କୁପୋଷଣ ସମସ୍ୟା ଦୂର କରିବାକୁ ୨୦୧୪ରେ ପ୍ରଧାନମନ୍ତ୍ରୀ ମୋଦି ସ୍ବତନ୍ତ୍ର କୃଷି ଅଭିଯାନ ଆରମ୍ଭ କରିବା ସହ ଉନ୍ନତ ବିହନ ବିକଶିତ କରିବାକୁ ବୈଜ୍ଞାନିକଙ୍କୁ ପରାମର୍ଶ ଦେଇଥିଲେ । ଏବେ ଭାରତର ବିହନ ବଜାରର ମୂଲ୍ୟ ୩ ଦଶମିକ ୬୧ ବିଲିୟନ ଡଲାର ରହିଛି । କୃଷି କାର୍ଯ୍ୟକ୍ରମରେ ସାମିଲ ହେବାସହ କୃଷକ ଓ କୃଷି ବୈଜ୍ଞାନିକଙ୍କ ସହ ଆଲୋଚନା କରିଛନ୍ତି ପିଏମ ମୋଦି । ଜାରି ହୋଇଥିବା ନୂଆ ବିହନ କୃଷକଙ୍କ ଆୟ ବଢ଼ାଇବା ସମ୍ଭାବନା ରହିଛି ।