ପୁଲୱାମା ଆକ୍ରମଣର ମାଷ୍ଟରମାଇଣ୍ଡ ନିପାତ ହୋଇଛନ୍ତି । ଆତଙ୍କୀ ହମଲାର ମୁଖ୍ୟ ହମଜା ବୁରାନକୁ POKରେ ଗୁଳି କରି ହତ୍ୟା କରାଯାଇଛି । ଅଜଣା ବନ୍ଧୁକଧାରୀ ହତ୍ୟା କରିଥିବା ସୂଚନା ମିଳିଛି । ପୁଲୱାମା ଆକ୍ରମଣରେ ୪୦ ଭାରତୀୟ ସେନା ଶହୀଦ ହୋଇଥିଲେ । ଏହି ଘଟଣା ପୁରା ଦେଶକୁ ଦୋହଲାଇ ଦେଇଥିଲା। ପୁଲଓ୍ବାମା ଆକ୍ରମଣ ଫେବୃଆରୀ ୧୪, ୨୦୧୯ ମସିହାରେ ହୋଇଥିଲା। ଯେବେ ଆତଙ୍କବାଦୀ ସେନା ଶିବିରକୁ ଧ୍ବଂସ କରିବାକୁ ଟାର୍ଗେଟ କରିଥିଲା। ଏହି ଆତଙ୍କୀ ହମଲାରେ ୪୦ରୁ ଅଧିକ ଯବାନ ଶହୀଦ ହୋଇଥିଲେ।

ରିପୋର୍ଟ ଅନୁସାରେ ଆତଙ୍କୀ ହମଜା ବୁରହାନକୁ ଜଣେ ଅଜ୍ଞାତ ବ୍ୟକ୍ତି ମୁଜାଫରାବାଦରେ ଗୁଳି ମାରିଛନ୍ତି। ଏହି ଘଟଣା ସେତେବେଳେ ଘଟିଛି ଯେତେବେଳେ ସନ୍ଦିଗ୍ଧ ଆତଙ୍କୀ ପାକ ଅଧିକୃତ କଶ୍ମୀର ସ୍ଥିତ ନିଜ ଅଫିସରେ ବସିଥିଲା। ସେତିକିବେଳେ କିଛି ଲୋକ ସେଠାରେ ହଠାତ ପହଞ୍ଚିଥିଲେ। ଆଉ ହମଜାଙ୍କ ଉପରେ ଆଖିବୁଜା ଗୁଳିଚାଳନା କରିଥିଲେ। ଘଟଣାସ୍ଥଳରେ ହିଁ ସେହି ଆତଙ୍କୀର ମୃତ୍ୟୁ ହୋଇଛି।

ଏହାସହ ପଢ଼ନ୍ତୁ: ପୁଣି ପାକିସ୍ତାନକୁ ମିଳିଲା ଧୋକ୍କା; ପ୍ରଶିକ୍ଷଣ ବେଳେ Crash ହୋଇଗଲା ଜେଏଫ-୧୭

• ୨୦୧୭ରେ ପୁଲୱାମାରୁ ପାକିସ୍ତାନ ପଳାଇ ଯାଇଥିଲା

ହମଜା ବୁରାନ ପୁଲୱାମା ଆକ୍ରମଣର ଜଣେ ଅପରାଧୀ ଥିଲା । ସେ ପାକିସ୍ତାନରେ ଜଣେ ଶିକ୍ଷକ ଭାବରେ ନିଜକୁ ପରିଚୟ ଦେଇଥିଲା ଏବଂ ୨୦୧୯ ମସିହାରୁ ଅନେକ ଆତଙ୍କବାଦୀ ଘଟଣାରେ ଜଡିତ ଥିଲା। ସେ ପିଓକେ ଅଞ୍ଚଳରେ ବିଭିନ୍ନ ଆତଙ୍କବାଦୀ ସଂଗଠନକୁ ତାଲିମ ଦେଉଥିଲା ଏବଂ ସୀମାବର୍ତ୍ତୀ ଅଞ୍ଚଳରେ ଆତଙ୍କବାଦୀଙ୍କୁ ଅନୁପ୍ରବେଶ କରିବାରେ ମଧ୍ୟ ସାହାଯ୍ୟ କରୁଥିଲା। ହମଜା ବୁରାନ ପୁଲୱାମାର ରତ୍ନିପୋରାର ବାସିନ୍ଦା ଥିଲା ଏବଂ ୨୦୧୭ରେ ଆତଙ୍କବାଦୀ କାର୍ଯ୍ୟକଳାପରେ ସାମିଲ ହେବା ପାଇଁ ପାକିସ୍ତାନ ଯାଇଥିଲା ।

• ISI କାର୍ଯ୍ୟାଳୟ ଏବଂ ସୁରକ୍ଷା ଯୋଗାଇ ଦେଇଥିଲା

ଆତଙ୍କବାଦୀ ହମଜା ବୁରାନ, ଓରଫ ଡାକ୍ତର, କେବଳ ପୁଲୱାମା ଆକ୍ରମଣ ବ୍ୟତୀତ ଅନ୍ୟ ଆତଙ୍କବାଦୀ ଆକ୍ରମଣରେ ଜଡିତ ନଥିଲା, ବରଂ ଯୁବକମାନଙ୍କୁ ମୌଳବାଦୀକରଣ ଆଡ଼କୁ ପ୍ରଲୋଭିତ କରିବାରେ ମଧ୍ୟ ସାମିଲ ଥିଲା । ଏହି ଉଦ୍ଦେଶ୍ୟରେ ISI ତାଙ୍କୁ ଏକ କାର୍ଯ୍ୟାଳୟ ଯୋଗାଇ ଦେଇଥିଲା, ଏବଂ AK-47 ସହିତ ସଜ୍ଜିତ ବନ୍ଧୁକଧାରୀମାନେ ଏହାକୁ ୨୪ ଘଣ୍ଟା ଜଗି ରହୁଥିଲେ। ମୁଜାଫରାବାଦରେ ହମଜାକୁ ଗୁଳିକରି ହତ୍ୟା କରାଯାଇଛି । ମୁଜାଫରାବାଦ ଭାରତ ବିରୋଧୀ ଆତଙ୍କବାଦୀ କାର୍ଯ୍ୟକାଳପର ଏକ କେନ୍ଦ୍ର।

• ପୁଲୱାମା ଆକ୍ରମଣ ଏବଂ ଭାରତର ଅପରେସନ ବାଲାକୋଟ

ଫେବୃଆରୀ ୧୪, ୨୦୧୯ ଦିନ ପ୍ରାୟ ୩:୧୫ ସମୟରେ ଜମ୍ମୁ-କାଶ୍ମୀରର ପୁଲୱାମା ଜିଲ୍ଲାର ଜମ୍ମୁ-ଶ୍ରୀନଗର ଜାତୀୟ ରାଜପଥରେ ଏକ ଭୟଙ୍କର ଆକ୍ରମଣ ହୋଇଥିଲା। ପାକିସ୍ତାନ ସ୍ଥିତ ଜୈଶ-ଏ-ମହମ୍ମଦର ଜଣେ ଆତଙ୍କବାଦୀ ଏବଂ ସ୍ଥାନୀୟ କାଶ୍ମୀର ଯୁବକ ଆଦିଲ ଅହମ୍ମଦ ଦାର ଏକ ୩୦୦-୩୫୦ କିଲୋଗ୍ରାମ ଆଇଇଡି ବୋଝେଇ ଏସ୍ୟୁଭିକୁ ସିଆରପିଏଫର ଏକ କନଭୟରେ ଧକ୍କା ଦେଇଥିଲା। ଏଥିରେ ୪୦ ଜଣ ସିଆରପିଏଫ ଯବାନ ଶହୀଦ ହୋଇଥିଲେ ଏବଂ ଅନେକ ଆହତ ହୋଇଥିଲେ। ୧୯୮୯ ପରଠାରୁ ଏହା ଜମ୍ମୁ-କାଶ୍ମୀରରେ ସୁରକ୍ଷା ବାହିନୀ ଉପରେ ସବୁଠାରୁ ଭୟଙ୍କର ଆକ୍ରମଣ ଥିଲା।