ଚଣ୍ଡିଗଡ଼: ଭାଗ୍ୟ କେତେବେଳେ ବଦଳିଯିବ ତାହା କେହି କହିପାରିବେ ନାହିଁ । ମାତ୍ର ୭ ଟଙ୍କାର ଏକ ଲଟେରୀ ଟିକେଟ୍ ଜଣେ ଶ୍ରମିକଙ୍କ ପରିବାରର ଭାଗ୍ୟ ବଦଳାଇ ଦେଇଛି । ପଞ୍ଜାବର ଫରିଦକୋଟ ଜିଲ୍ଲାର କୋଟକପୁରାରେ ରହୁଥିବା ବିମଳା ଦେବୀ ସିକ୍କିମ୍ ଲଟେରୀର ଏକ ଟିକେଟ୍ କିଣିଥିଲେ । ଆଉ ସେହି ଟିକେଟ୍ରେ ତାଙ୍କୁ ମିଳିଛି ୧ କୋଟି ଟଙ୍କାର ବମ୍ପର ପୁରସ୍କାର । ଏହି ଖବର ଜଣାପଡ଼ିବା ପରେ ପରିବାରରେ ଖୁସିର ଲହରୀ ଖେଳିଯାଇଛି ।
- ସାମଗ୍ରୀ କିଣିବାକୁ ଯାଇଥିଲେ, ବଦଳିଗଲା ଭାଗ୍ୟ
ଲଟେରୀ କିଣିଥିବା ବିମଳା ଦେବୀଙ୍କ ସ୍ୱାମୀ ଜଣେ ଦିନ ମଜୁରିଆ । ପରିବାର ଚଳାଇବା ପାଇଁ ସେ ଦିନ ମଜୁରିଆ ଭାବେ ଖଟି ରୋଜଗାର କରନ୍ତି । ଦିନେ ସନ୍ଧ୍ୟା ସମୟରେ ବିମଳା ଦେବୀ କିଛି ସାମଗ୍ରୀ କିଣିବା ପାଇଁ ରେଳ ଷ୍ଟେସନ୍ ନିକଟ ରେଳୱେ ରୋଡ୍କୁ ଯାଇଥିଲେ । ସେଠାରେ ହଠାତ୍ ତାଙ୍କର ଲଟେରୀ ଟିକେଟ୍ କିଣିବାକୁ ଇଚ୍ଛା ହୋଇଥିଲା । ଏହାପରେ ସେ ମାତ୍ର ୭ ଟଙ୍କା ଦେଇ ସିକ୍କିମ୍ ଲଟେରୀର ଏକ ଟିକେଟ୍ କିଣିଥିଲେ । ହେଲେ ସେହି ଛୋଟିଆ ନିଷ୍ପତ୍ତି ତାଙ୍କ ପରିବାର ପାଇଁ ଏତେ ବଡ଼ ଖୁସି ଆଣିଦେବ ବୋଲି ସେ କେବେ ଭାବି ନଥିଲେ । ପରଦିନ ସନ୍ଧ୍ୟାରେ ଲଟେରି ଫଳାଫଳ ପ୍ରକାଶ ପାଇବା ପରେ ତାଙ୍କ ଟିକେଟ୍ରେ ୧ କୋଟି ଟଙ୍କାର ପୁରସ୍କାର ଲାଗିଥିବା ଜଣାପଡ଼ିଥିଲା । ଏହି ଖବର ମିଳିବା ପରେ ପରିବାରର ଖୁସି କହିଲେ ନସରେ।
ଲଟେରୀ ଦୋକାନରୁ ଖବର ପାଇବା ପରେ ବିମଳା ଦେବୀଙ୍କ ପରିବାର ସଦସ୍ୟମାନେ ଦୋକାନରେ ପହଞ୍ଚିଥିଲେ । ଏହି ଖୁସିର ମୁହୂର୍ତ୍ତରେ ଲଟେରୀ ଷ୍ଟଲ୍ର ସଞ୍ଚାଳକ ନରେଶ ମୋଙ୍ଗା ପରିବାରକୁ ମିଠା ଖୁଆଇ ଅଭିନନ୍ଦନ ଜଣାଇଥିଲେ । ଖୁସିରେ ସେଠାରେ ଭାଙ୍ଗଡ଼ା ନୃତ୍ୟ ମଧ୍ୟ କରାଯାଇଥିଲା । ଜଣେ ସାଧାରଣ ଶ୍ରମିକଙ୍କ ପରିବାର ପାଇଁ ଏହି ପୁରସ୍କାର କେବଳ ଟଙ୍କା ନୁହେଁ, ବରଂ ଭବିଷ୍ୟତକୁ ନୂଆ ଦିଗ ଦେବାର ଏକ ସୁଯୋଗ ଦେଇଛି ବୋଲି ଆଲୋଚନା ହେଉଛି ।
- ପିଲାଙ୍କ ଭବିଷ୍ୟତ ପାଇଁ ଟଙ୍କା ଖର୍ଚ୍ଚ କରିବାକୁ ଯୋଜନା
୧ କୋଟି ଟଙ୍କାର ପୁରସ୍କାର ଜିତିବା ପରେ ବିମଳା ଦେବୀ କହିଛନ୍ତି ଯେ ଏହି ଟଙ୍କା ତାଙ୍କ ପରିବାରର ଆର୍ଥିକ ସମସ୍ୟା ଦୂର କରିବାରେ ସହାୟକ ହେବ । ବିଶେଷକରି ପିଲାମାନଙ୍କ ଲାଳନପାଳନ ଓ ଉନ୍ନତ ଭବିଷ୍ୟତ ଗଢ଼ିବା ଉପରେ ସେ ଗୁରୁତ୍ୱ ଦେବେ । ତେବେ ପୁରସ୍କାର ରାଶିକୁ କେଉଁ କ୍ଷେତ୍ରରେ ବିନିଯୋଗ କରିବେ, ସେନେଇ ଏପର୍ଯ୍ୟନ୍ତ କୌଣସି ଚୂଡ଼ାନ୍ତ ନିଷ୍ପତ୍ତି ନେଇନାହାନ୍ତି । ପରିବାର ସହ ଆଲୋଚନା କରି ପିଲାମାନଙ୍କ ଭବିଷ୍ୟତ ପାଇଁ କୌଣସି ବ୍ୟବସାୟ ଆରମ୍ଭ କରିବାକୁ ସେ ଯୋଜନା କରୁଛନ୍ତି ।
ପଢନ୍ତୁ ଏହି ଖବର: ମସଜିଦ୍ରେ ଚୁମ୍ବନ; ବାଂଲାଦେଶୀ ଦମ୍ପତିଙ୍କୁ ସାଉଦି ଆରବରେ ମୃ*ତ୍ୟୁଦଣ୍ଡ- ଦୋକାନରୁ ପ୍ରଥମ ଥର ଜିତିଲେ ୧ କୋଟି ଟଙ୍କା
ଲଟେରୀ ଷ୍ଟଲ୍ର ସଞ୍ଚାଳକ ନରେଶ ମୋଙ୍ଗାଙ୍କ କହିବା ଅନୁଯାୟୀ, ସେ ଗତ ୬ ମାସ ଧରି ଏହି ବ୍ୟବସାୟ କରୁଛନ୍ତି । କିଛି ସମୟ ପୂର୍ବରୁ ସେ ନିଜ ଦୋକାନକୁ ରେଳ ଷ୍ଟେସନ୍ ନିକଟକୁ ସ୍ଥାନାନ୍ତର କରିଥିଲେ । ତାଙ୍କ ଦୋକାନରୁ ପୂର୍ବରୁ ମଧ୍ୟ ଅନେକ ଲୋକ ହଜାର ହଜାର ଟଙ୍କାର ପୁରସ୍କାର ଜିତିଛନ୍ତି । କିନ୍ତୁ ପ୍ରଥମ ଥର ପାଇଁ ଏହି ଦୋକାନରୁ ୧ କୋଟି ଟଙ୍କାର ପୁରସ୍କାର ଲାଗିଥିବାରୁ ସେ ଖୁସି ବ୍ୟକ୍ତ କରିଛନ୍ତି । ଏଥିସହ ବିଜେତା ପରିବାରକୁ ଅଭିନନ୍ଦନ ଜଣାଇଛନ୍ତି । ମାତ୍ର ୭ ଟଙ୍କାର ଏକ ଟିକେଟ୍ ଏବେ ବିମଳା ଦେବୀଙ୍କ ପରିବାରରେ ନୂଆ ଆଶା ସଞ୍ଚାର କରିଛି ।
