Protests Against Rahul / ରାହୁଲ ଗାନ୍ଧୀଙ୍କ ମନ୍ତବ୍ୟକୁ ନେଇ ଉତ୍ତେଜନା,NSA ଅଜିତ ଡୋଭାଲଙ୍କ ସମର୍ଥନରେ ରାଜରାସ୍ତାକୁ ଓହ୍ଲାଇଲେ ପୂର୍ବତନ ସୈନିକ

ଉତ୍ତରାଖଣ୍ଡ,୧୬/୧୦: ଲୋକସଭାରେ ବିରୋଧୀ ଦଳ ନେତା ରାହୁଲ ଗାନ୍ଧୀଙ୍କ ଜାତୀୟ ସୁରକ୍ଷା ପରାମର୍ଶଦାତା ଅଜିତ ଡୋଭାଲଙ୍କୁ ନେଇ ଦିଆଯାଇଥିବା ମନ୍ତବ୍ୟକୁ କେନ୍ଦ୍ର କରି ଉତ୍ତରାଖଣ୍ଡରେ ରାଜନୈତିକ ଉଷ୍ମତା ବଢ଼ିଛି। ଡୋଭାଲଙ୍କ ସମର୍ଥନରେ ଆଗକୁ ଆସିଛନ୍ତି ବିଜେପିର ପୂର୍ବତନ ସୈନିକ ସେଲ୍‌ର କର୍ମକର୍ତ୍ତା ଏବଂ ଅବସରପ୍ରାପ୍ତ ସାମରିକ ଅଧିକାରୀ। ରାଜ୍ୟର ବିଭିନ୍ନ ସ୍ଥାନରେ ରାହୁଲ ଗାନ୍ଧୀଙ୍କ ବିରୋଧରେ ପ୍ରତିବାଦ ସହ କୁଶପୁତ୍ତଳିକା ଦାହ କରାଯାଇଛି।

ଡେରାଡୁନ୍‌, ହଲଦ୍ୱାନୀ, ପିଥୋରାଗଡ଼ ଓ ତେହରୀ ଭଳି ସ୍ଥାନରେ ପ୍ରତିବାଦ ଦେଖିବାକୁ ମିଳିଥିବା ଦାବି କରାଯାଇଛି। ପ୍ରତିବାଦକାରୀମାନେ କହିଛନ୍ତି ଯେ ଦେଶର ସୁରକ୍ଷା ସହ ଜଡ଼ିତ ବ୍ୟକ୍ତିଙ୍କ ବିଷୟରେ ମନ୍ତବ୍ୟ ଦେବା ସମୟରେ ତଥ୍ୟ ଓ ଭାଷା ପ୍ରତି ସତର୍କ ରହିବା ଆବଶ୍ୟକ। ଏହା ସହ ଏହି ପ୍ରସଙ୍ଗରେ କଂଗ୍ରେସ ନିଜର ଆଭିମୁଖ୍ୟ ସ୍ପଷ୍ଟ କରୁ ବୋଲି ସେମାନେ ଦାବି କରିଛନ୍ତି।

ହଲଦ୍ୱାନୀରେ ସାମ୍ବାଦିକ ସମ୍ମିଳନୀ

ଅକ୍ଟୋବର ୧୫ ତାରିଖରେ ହଲଦ୍ୱାନୀରେ ବିଜେପି ସୈନିକ ମୋର୍ଚ୍ଚାର କର୍ମକର୍ତ୍ତାମାନେ ଏକ ସାମ୍ବାଦିକ ସମ୍ମିଳନୀ କରି ରାହୁଲ ଗାନ୍ଧୀଙ୍କ ମନ୍ତବ୍ୟକୁ ନେଇ ଅସନ୍ତୋଷ ପ୍ରକାଶ କରିଥିଲେ। ସେଲ୍‌ର ରାଜ୍ୟ ସହ-ସଂଯୋଜକ ଅବସରପ୍ରାପ୍ତ କର୍ଣ୍ଣେଲ ଜଗତ ସିଂହ ଜଣ୍ଟୱାଲ କହିଥିଲେ ଯେ ଜାତୀୟ ସୁରକ୍ଷା ଭଳି ଗମ୍ଭୀର ପ୍ରସଙ୍ଗରେ ରାଜନୈତିକ ମତଭେଦ ରହିପାରେ। କିନ୍ତୁ ମନ୍ତବ୍ୟ ଦେବା ସମୟରେ ତଥ୍ୟ ଓ ଭାଷାର ମର୍ଯ୍ୟାଦା ବଜାୟ ରଖିବା ଜରୁରୀ।

ପଢନ୍ତୁ ଏହି ଖବର : ଭୋଟ ଚୋରି ଅଭିଯୋଗ ନେଇ କଂଗ୍ରେସକୁ କଟାକ୍ଷ କଲେ ରାଜନାଥ ସିଂ

ପିଥୋରାଗଡ଼ରୁ ଡେରାଡୁନ୍‌ ଯାଏଁ ପ୍ରତିବାଦ

ପୂର୍ବତନ ସୈନିକ ସେଲ୍‌ର ଆହ୍ୱାନରେ ଅକ୍ଟୋବର ୧୫ରେ ବିଭିନ୍ନ ସ୍ଥାନରେ ପ୍ରତିବାଦ କରାଯାଇଥିଲା। ପିଥୋରାଗଡ଼ର ସିଲଥାମ୍ ତିରାହାରେ ବିଜେପି କର୍ମୀମାନେ ନାରାବାଜି କରିବା ସହ ରାହୁଲ ଗାନ୍ଧୀଙ୍କ କୁଶପୁତ୍ତଳିକା ଦାହ କରିଥିବା ସୂଚନା ମିଳିଛି। ଡେରାଡୁନ୍‌ ସମେତ ଅନ୍ୟ ସ୍ଥାନରେ ମଧ୍ୟ ପୂର୍ବତନ ସୈନିକ ଓ ବିଜେପି କର୍ମୀମାନେ ପ୍ରତିବାଦରେ ସାମିଲ ହୋଇଥିଲେ। ପ୍ରତିବାଦକାରୀଙ୍କ କହିବା ଅନୁଯାୟୀ, ଅଜିତ ଡୋଭାଲଙ୍କର ଉତ୍ତରାଖଣ୍ଡ ସହ ସମ୍ପର୍କ ରହିଛି ଏବଂ ଜାତୀୟ ସୁରକ୍ଷା କ୍ଷେତ୍ରରେ ତାଙ୍କର ଭୂମିକା ଗୁରୁତ୍ୱପୂର୍ଣ୍ଣ। ତେଣୁ ତାଙ୍କୁ ନେଇ ଦିଆଯାଇଥିବା ମନ୍ତବ୍ୟକୁ ସେମାନେ ଗୁରୁତ୍ୱର ସହ ନେଇଛନ୍ତି। 

ଏହି ପ୍ରସଙ୍ଗକୁ ନେଇ ଉତ୍ତରାଖଣ୍ଡରେ ରାଜନୈତିକ ବାକ୍‌ଯୁଦ୍ଧ ତୀବ୍ର ହୋଇଥିବା ବେଳେ ରାହୁଲ ଗାନ୍ଧୀଙ୍କ ମନ୍ତବ୍ୟ ଓ ତାହାକୁ ନେଇ ଉଠିଥିବା ବିବାଦ ଆଗକୁ କେଉଁ ମୋଡ଼ ନେଉଛି, ତାହା ଉପରେ ନଜର ରହିଛି।