ଆଜି ମଣିପୁର ଗସ୍ତରେ ଯାଇଥିଲେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି । ଶନିବାର PM ମୋଦି ମଣିପୁରର ଇମ୍ଫାଲରେ ପହଞ୍ଚିଥିଲେ। ୨୦୨୩ ମସିହାରେ ମଣିପୁରରେ ଘଟିଥିବା ଜାତିଗତ ହିଂସା ପରେ ଏହା ତାଙ୍କର ପ୍ରଥମ ଗସ୍ତ ଥିଲା । କିନ୍ତୁ ମୋଦିଙ୍କ ଏହି ଗସ୍ତ ସମୟରେ ପାଗ ବହୁତ ଖରାପ ଥିଲା ଏବଂ ପ୍ରବଳ ବର୍ଷା ଜାରି ରହିଥିଲା । ଯାହାଫଳରେ ହେଲିକପ୍ଟରରେ ଯାତ୍ରା ଅସମ୍ଭବ ହୋଇପଡ଼ିଥିଲା । ଶେଷରେ ପ୍ରଧାନମନ୍ତ୍ରୀ ସଡ଼କ ପଥ ବାଛିଥିଲେ । ଢୁ ଢୁ ବର୍ଷାରେ ହେଲିକପ୍ଟର ବଦଳରେ କାର ଯୋଗେ ଦଙ୍ଗାରେ ସବୁଠାରୁ ଅଧିକ ପ୍ରଭାବିତ ଜିଲ୍ଲା ଚୁରାଚାନ୍ଦପୁରରେ ପହଞ୍ଚିଥିଲେ ଓ ସେଠାରେ ହିଂସା ପୀଡ଼ିତଙ୍କୁ ଭେଟିଥିଲେ।

ସୂଚନା ଅନୁସାରେ ଶନିବାର ପ୍ରଧାନମନ୍ତ୍ରୀ ମୋଦୀ ମଣିପୁରର ରାଜଧାନୀ ଇମ୍ଫାଲରେ ପହଞ୍ଚିବା ସମୟରେ ପ୍ରବଳ ବର୍ଷା ହେଉଥିଲା। ଅଧିକାରୀମାନେ ପ୍ରଧାନମନ୍ତ୍ରୀଙ୍କୁ ଜଣାଇଥିଲେ ଯେ ବର୍ଷା ଯୋଗୁଁ ପାଗ ହେଲିକପ୍ଟର ଯୋଗେ ଚୁରାଚାନ୍ଦପୁର ଯାତ୍ରା କରିବା ପାଇଁ ସୁରକ୍ଷିତ ନୁହେଁ। ରାଲି ସ୍ଥାନଟି ସଡ଼କ ପଥରେ ପ୍ରାୟ ଦେଢ଼ ଘଣ୍ଟା ଦୂରରେ ଥିଲା। ଏହାପରେ ପ୍ରଧାନମନ୍ତ୍ରୀ ନିଷ୍ପତ୍ତି ନେଇଥିଲେ ଯେ ସେ ସଡ଼କ ପଥରେ ରାଲି ସ୍ଥାନରେ ପହଞ୍ଚିବେ। ଏହା ପରେ ପ୍ରଧାନମନ୍ତ୍ରୀ ମୋଦୀ ଚୁରାଚାନ୍ଦପୁର ପର୍ଯ୍ୟନ୍ତ ସଡ଼କ ପଥରେ ୬୫ କିଲୋମିଟର ଯାତ୍ରା କରି ସଭାସ୍ଥଳରେ ପହଞ୍ଚିଥିଲେ ।

An electrifying moment as Hon'ble PM Shri @narendramodi Ji’s motorcade passes through the heart of Imphal!
Thousands gather to give him a warm and grand welcome.#ModiInManipur pic.twitter.com/3eGv4ZFXZI

ସଭାସ୍ଥଳରେ ପହଞ୍ଚିବା ପରେ ପ୍ରଧାନମନ୍ତ୍ରୀ ମୋଦି କହିଥିଲେ, 'ପ୍ରବଳ ବର୍ଷାରେ ମଧ୍ୟ ଆପଣମାନେ ଏତେ ସଂଖ୍ୟାରେ ଏଠାକୁ ଆସିଛନ୍ତି। ଏହା ମୋ ପାଇଁ ଗର୍ବ ଏବଂ ପ୍ରେରଣାର ବିଷୟ।' ସେ କହିଥିଲେ ଯେ ହେଲିକପ୍ଟର ନ ଆସିବା ମୋ ପାଇଁ ଭଲ ପ୍ରମାଣିତ ହେଲା । କାରଣ ରାସ୍ତାରେ ଲୋକମାନେ ଜାତୀୟ ପତାକା ଧରି ପ୍ରେମ ଏବଂ ସମ୍ମାନ ସହିତ ତାଙ୍କୁ ସ୍ୱାଗତ କରିଥିଲେ ।

ପ୍ରଧାନମନ୍ତ୍ରୀ ମୋଦି କହିଥିଲେ, 'ପଥରେ ମୁଁ ଯେଉଁ ପ୍ରେମ ଏବଂ ସ୍ନେହ ଦେଖିଲି ତାହା ସବୁବେଳେ ମୋ ହୃଦୟରେ ରହିବ । ବର୍ଷା ସତ୍ତ୍ୱେ, ମୁଁ ଲୋକମାନଙ୍କୁ ଭେଟିବାକୁ ଆସିଥିଲି କାରଣ ଆପଣଙ୍କ ସମର୍ଥନ ମୋ ପାଇଁ ସବୁଠାରୁ ବଡ଼ ପ୍ରେରଣା ।' ସେ ଆହୁରି କହିଛନ୍ତି ଯେ ଭାରତ ସରକାର ପ୍ରତ୍ୟେକ ପଦକ୍ଷେପରେ ମଣିପୁରର ବିକାଶ ଏବଂ ସୁରକ୍ଷା ପାଇଁ ପ୍ରତିବଦ୍ଧ ।
ପ୍ରଧାନମନ୍ତ୍ରୀ ମୋଦୀ ଗୁରୁତ୍ୱାରୋପ କରିଛନ୍ତି ଯେ କେନ୍ଦ୍ର ସରକାର ମଣିପୁରରେ ଶାନ୍ତି ଫେରାଇ ଆଣିବା ଏବଂ ଜୀବନକୁ ପୁଣିଥରେ ଟ୍ରାକକୁ ଆଣିବା ପାଇଁ ଯଥାସମ୍ଭବ ପ୍ରୟାସ କରୁଛି । ସେ ସମସ୍ତ ସମ୍ପ୍ରଦାୟକୁ ଶାନ୍ତିର ପଥ ଗ୍ରହଣ କରିବାକୁ ଆହ୍ୱାନ କରିଥିଲେ ଏବଂ ଆଶ୍ୱାସନା ଦେଇଥିଲେ, 'ଭାରତ ସରକାର ଆପଣଙ୍କ ସହିତ ଅଛି।'

ସୂଚନା ଅନୁସାରେ ମେ' ୨୦୨୩ରେ ମଣିପୁରର ମୈତେଇ ଏବଂ କୁକି ସମ୍ପ୍ରଦାୟ ମଧ୍ୟରେ ହିଂସା ଘଟିଥିଲା । ୨୫୦ରୁ ଅଧିକ ଲୋକଙ୍କ ମୃତ୍ୟୁ ହୋଇଥିଲା ଏବଂ ପ୍ରାୟ ୬୦ ହଜାର ଲୋକ ଅସ୍ଥାୟୀ ଶିବିରରେ ରହୁଥିଲେ । ଏହି ଲୋକମାନଙ୍କୁ ମାନସିକ ଏବଂ ପ୍ରଶାସନିକ ସହାୟତା ପ୍ରଦାନ କରିବା ପାଇଁ ପ୍ରଧାନମନ୍ତ୍ରୀ ମୋଦୀଙ୍କ ଏହି ଗସ୍ତକୁ ଗୁରୁତ୍ୱପୂର୍ଣ୍ଣ ବୋଲି ବିବେଚନା କରାଯାଉଛି । ୭ ହଜାର ୩ ଶହ କୋଟି ମୂଲ୍ୟର ୧୪ଟି ବିକାଶମୂଳକ ପ୍ରକଳ୍ପର ଶିଳାନ୍ୟାସ କରି ରାଜ୍ୟବାସୀଙ୍କୁ ବଡ଼ ଉପହାର ଦେଲେ । ମଣିପୁରକୁ ସାହସ ଓ ଦୃଢ଼ତାର ଭୂମି କହିବା ସହ ଶାନ୍ତି ରାସ୍ତାରେ ଆଗକୁ ବଢି ଭବିଷ୍ୟତ ଗଢିବା ପାଇଁ ରାଜ୍ୟବାସୀଙ୍କୁ ଦେଇଛନ୍ତି ଆହ୍ବାନ ।