ଅର୍ଗସ ବ୍ୟୁରୋ : ଅମ୍ବାନୀ ପରିବାରର କନିଷ୍ଠ ସନ୍ତାନ ତଥା ଉଦ୍ୟୋଗପତି ଅନନ୍ତ ଅମ୍ବାନୀ ଏବଂ ରାଧିକା ମର୍ଚ୍ଚାଣ୍ଟଙ୍କର ବିବାହ ପୂର୍ବ କାର୍ଯ୍ୟକ୍ରମ ଅନ୍ନସେବାରୁ ଆରମ୍ଭ ହୋଇଛି । ଜାମନଗରରେ ରିଲାଏନ୍ସ ଟାଉନସିପ ନିକଟବର୍ତ୍ତୀ ଯୋଗବଡ଼ ଗ୍ରାମରେ ମୁକେଶ ଅମ୍ବାନୀ, ଅନନ୍ତ ଅମ୍ବାନୀ ଏବଂ ରାଧିକା ମର୍ଚ୍ଚାଣ୍ଟଙ୍କ ସହିତ ଅମ୍ବାନୀ ପରିବାରର ଅନ୍ୟ ସଦସ୍ୟଗଣ ଗ୍ରାମବାସୀଙ୍କୁ ପାରମ୍ପରିକ ଗୁଜରାଟୀ ଭୋଜନ ପରଷିଥିଲେ । ରାଧିକାଙ୍କ ଜେଜେ ମା’ ଏବଂ ମାତା-ପିତା, ବିରେନ ଓ ଶୈଲା ମର୍ଚ୍ଚାଣ୍ଟ ମଧ୍ୟ ଅନ୍ନସେବାରେ ଅଂଶଗ୍ରହଣ କରିଥିଲେ । ପ୍ରାୟ ୫୧ ହଜାର ସ୍ଥାନୀୟ ଅଧିବାସୀଙ୍କୁ ଭୋଜନ ପରଷାଯିବ ଯାହା ଆଗାମୀ କିଛିଦିନ ପର୍ଯ୍ୟନ୍ତ ଜାରି ରହିବ ।

ଅମ୍ବାନୀ ପରିବାର ଅନନ୍ତ ଅମ୍ବାନୀ ଏବଂ ରାଧିକା ମର୍ଚ୍ଚାଣ୍ଟଙ୍କ ବିବାହ ପୂର୍ବ ସମାରୋହ ନିମନ୍ତେ ସ୍ଥାନୀୟ ଜନସାଧାରଣଙ୍କ ଆଶୀର୍ବାଦ ଲୋଡିବା ସକାଶେ ଅନ୍ନସେବା କାର୍ଯ୍ୟକ୍ରମ ଆୟୋଜନ କରିଛନ୍ତି । ଭୋଜନ ପରେ ଉପସ୍ଥିତ ଲୋକମାନେ ପାରମ୍ପରିକ ଲୋକ ସଂଗୀତର ଆନନ୍ଦ ଉଠାଇଥିଲେ । ପ୍ରସିଦ୍ଧ ଗୁଜରାଟୀ ଗାୟକ କୀର୍ତ୍ତିଦାନ ଗଢବୀ ନିଜର ସଂଗୀତରେ ସମସ୍ତଙ୍କ ମନ ମୋହିଥିଲେ ।

ଅଧିକ ପଢନ୍ତୁ ଭାରତ ଖବର

ଅମ୍ବାନୀ ପରିବାରରେ ଅନ୍ନସେବାର ପରମ୍ପରା ପୁରାତନ । ପାରିବାରିକ ଶୁଭ ଅବସରରେ ଅମ୍ବାନୀ ପରିବାର ଅନ୍ନସେବା ଆୟୋଜନ କରିଆସୁଛନ୍ତି । କରୋନା ମହାମାରୀ ସମୟରେ ଦେଶ ଯେତେବେଳେ ସଙ୍କଟଜନକ ସ୍ଥିତିରେ ରହିଥିଲା ସେତେବେଳେ ମଧ୍ୟ ଅନନ୍ତ ଅମ୍ବାନୀଙ୍କ ମା’ ନୀତା ଅମ୍ବାନୀଙ୍କ ମାର୍ଗଦର୍ଶନରେ ରିଲାଏନ୍ସ ଫାଉଣ୍ଡେସନ ପକ୍ଷରୁ ଦୁନିଆର ସବୁଠାରୁ ବୃହତ ଅନ୍ନ ବିତରଣ କାର୍ଯ୍ୟକ୍ରମ ଜାରି ରହିଥିଲା । ପାରିବାରିକ ପରମ୍ପରାକୁ ଆଗକୁ ବଢାଇ ଅନନ୍ତ ଅମ୍ବାନୀ ନିଜ ବିବାହ ପୂର୍ବ କାର୍ଯ୍ୟକ୍ରମର ଶୁଭାରମ୍ଭ ମଧ୍ୟ ଅନ୍ନସେବାରୁ କରିଛନ୍ତି ।

Argus News | argus news | -Argusnews Home: Odisha Latest News, Breaking News, Trending News, Live TV and more