Raid In 5 Star Hotels / ୫-ଷ୍ଟାର୍ ହୋଟେଲର ରୋଷେଇ ଘରୁ ମିଳିଲା ପଚା ମାଂସ ଓ ବାସୀ ଖାଦ୍ୟ

ବେଙ୍ଗାଲୁରୁ,୦୮/୦୮:ବେଙ୍ଗାଲୁରୁରେ ୩-ଷ୍ଟାର୍ ଏବଂ ୫-ଷ୍ଟାର୍ ଲକ୍ସଜରୀ ହୋଟେଲଗୁଡ଼ିକ ଉପରେ ଚଢାଉ। କର୍ଣ୍ଣାଟକର ଖାଦ୍ୟ ସୁରକ୍ଷା ବିଭାଗ ବେଙ୍ଗାଲୁରୁର ପ୍ରତିଷ୍ଠିତ ୩-ଷ୍ଟାର୍ ଏବଂ ୫-ଷ୍ଟାର୍ ଲକ୍ସଜରୀ ହୋଟେଲଗୁଡ଼ିକ ଉପରେ ଏକ ବଡ଼ ଧରଣର ଚଢ଼ାଉ କରିଛି। ଏହି ଚଢ଼ାଉରେ ଦେଶର ସବୁଠାରୁ ମହଙ୍ଗା ହୋଟେଲଗୁଡ଼ିକର ରୋଷେଇ ଘରୁ ପଚାମାଂସ, ବାସୀ ଖାଦ୍ୟ ଏବଂ ଏକ୍ସପାୟାର୍ଡ ସାମଗ୍ରୀ ଜବତ କରାଯାଇଛି, ଯାହା ଗ୍ରାହକମାନଙ୍କୁ ଚକିତ କରିଦେଇଛି। ଖାଦ୍ୟ ସୁରକ୍ଷା ଅଧିକାରୀଙ୍କ ସୂଚନା ଅନୁଯାୟୀ, ଅନେକ ନାମୀଦାମୀ ହୋଟେଲରୁ ବହୁ ପରିମାଣର ଅସ୍ବାସ୍ଥ୍ୟକର ଖାଦ୍ୟ ମିଳିଛି।

ପଞ୍ଚତାରକା ହୋଟେଲ୍  ରେଡିସନ୍ ବ୍ଲୁରୁ ସବୁଠାରୁ ଅଧିକ ପ୍ରାୟ ୧୦୫ କିଲୋଗ୍ରାମର ଏକ୍ସପାୟାର୍ଡ ଖାଦ୍ୟ ଜବତ କରାଯାଇଛି। ଦ ଲଳିତ ଅଶୋକ ହୋଟେଲରୁ ୭୬ କେଜି ବାସୀ ମାଂସ, ୨୦୦ କେଜି କଦର୍ଯ୍ୟ ପନିପରିବା ଏବଂ ୩୨ ଲିଟର ଏକ୍ସପାୟାର୍ଡ କ୍ଷୀର ଜବତ କରି ନଷ୍ଟ କରାଯାଇଛି। ସେହିପରି ତାଜ୍ ୟଶବନ୍ତପୁରରୁ ୭୨ କେଜି ଅସ୍ବାସ୍ଥ୍ୟକର ମାଂସ ଓ ମାଛ ଜବତ ହୋଇଛି। ଶାଙ୍ଗ୍ରି-ଲା ଏବଂ ଫୋର୍ ସିଜନ୍ସ ହୋଟେଲଗୁଡ଼ିକରୁ ମଧ୍ୟ ନିମ୍ନମାନର ଓ ବାସୀ ମାଂସ ଜବତ କରାଯାଇଛି। ୩୦ଟି ସ୍ପେଶାଲ୍ ଟିମ୍ ବେଙ୍ଗାଲୁରୁର ପ୍ରାୟ ୨୬ଟି ପ୍ରିମିୟମ୍ ହୋଟେଲରେ ଏହି ସରପ୍ରାଇଜ୍ ରେଡ୍ କରିଥିଲେ। ରୋଷେଇ ଘର ଏବଂ କୋଲ୍ଡ ଷ୍ଟୋରେଜ୍ ଗୁଡ଼ିକ ଅତ୍ୟନ୍ତ ଅପରିଷ୍କାର ଓ ଅସ୍ୱାସ୍ଥ୍ୟକର ସ୍ଥିତିରେ ଥିଲା। ପନିପରିବା ଗୁଡ଼ିକରେ ଫିମ୍ପି ମାରିଯାଇଥିଲା। ଏହି ହୋଟେଲ ଗୁଡ଼ିକରେ FSSAIର ଲେବଲିଂ ନିୟମ ପାଳନ କରାଯାଇ ନଥିଲା। ନିରାମିଷ ଏବଂ ଆମିଷ ଖାଦ୍ୟ ରଖିବାକୁ ଅଲଗା ବ୍ୟବସ୍ଥା ନଥିଲା। ଖାଦ୍ୟ ସୁରକ୍ଷା ନିୟମ ଉଲ୍ଲଂଘନ ଅଭିଯୋଗରେ ଏହି ହୋଟେଲଗୁଡ଼ିକୁ କାରଣ ଦର୍ଶାଅ ନୋଟିସ୍ ଜାରି କରାଯାଇଛି।

ପଢନ୍ତୁ ଏହି ଖବର: ଅକ୍ଟୋବରରେ ଆୟୋଜିତ ହେବ ଆନ୍ତର୍ଜାତୀୟ ଚାଉଳ ସମ୍ମିଳନୀ; ସ୍ୱାକ୍ଷରିତ ହେବ କୋଟି କୋଟି ଟଙ୍କାର ବ୍ୟବସାୟିକ ଚୁକ୍ତି

ସୋସିଆଲ ମିଡିଆରେ ସେୟାର ହୋଇଥିବା ଅନେକ ଅଭିଯୋଗ ସମେତ ଜନସାଧାରଣଙ୍କଠାରୁ ବିଭାଗକୁ ଅନେକ ଅଭିଯୋଗ ମିଳିବା ପରେ, କର୍ଣ୍ଣାଟକ ସ୍ୱାସ୍ଥ୍ୟ ଏବଂ ପରିବାର କଲ୍ୟାଣ ମନ୍ତ୍ରୀ ୟୁଟି ଖାଦେରଙ୍କ ନିର୍ଦ୍ଦେଶରେ ଏହି ଯାଞ୍ଚ ଅଭିଯାନ ଆରମ୍ଭ କରାଯାଇଥିଲା ଖାଦ୍ୟ ସୁରକ୍ଷା ଏବଂ ଔଷଧ ପ୍ରଶାସନ ବିଭାଗ (FDA) ର ଅଧିକାରୀମାନଙ୍କୁ ନେଇ ଗଠିତ ୩୦ଟି ଦଳ ବେଙ୍ଗାଲୁରୁର ତାରକା ହୋଟେଲ, ରେଷ୍ଟୁରାଣ୍ଟ, ରାସ୍ତାପାର୍ଶ୍ୱରେ ଥିବା ଖାଦ୍ୟ ଦୋକାନ, ଅନ୍ୟାନ୍ୟ ଖାଦ୍ୟ ବ୍ୟବସାୟରେ ଅଚାନକ ଯାଞ୍ଚ କରିଥିଲେ।

କର୍ଣ୍ଣାଟକର ସ୍ୱାସ୍ଥ୍ୟମନ୍ତ୍ରୀ ୟୁଟି ଖାଦେର କହିଛନ୍ତି ଯେ ଆମର ଏକମାତ୍ର ଉଦ୍ଦେଶ୍ୟ ହେଉଛି ଲୋକମାନଙ୍କୁ ନିରାପଦ ଏବଂ ସୁସ୍ଥ ଖାଦ୍ୟ ପରିବେଷଣ କରିବା । ଅଧିକାରୀ ମାନେ ଗୋଟିଏ ହୋଟେଲ ରୋଷେଇ ଘରୁ ଡେନମାର୍କରୁ ଆମଦାନୀ ହୋଇଥିବା ମାଂସ ପାଇଥିଲେ, ଯାହା ଏହାର ସତେଜତା ଏବଂ ଗୁଣବତ୍ତା ଉପରେ ପ୍ରଶ୍ନ ଉଠିଛି। "ଯେତେବେଳେ ମାଂସ ଏଠାରେ ସହଜରେ ଉପଲବ୍ଧ, ତେବେ ଏହାକୁ ଡେନମାର୍କରୁ କାହିଁକି ଆମଦାନୀ କରାଗଲା? ଏହା କି ପ୍ରକାରର ମାଂସ? ଏଠାରେ ପହଞ୍ଚିବାକୁ କେତେ ସମୟ ଲାଗିଲା? ଡେନମାର୍କରୁ ପରିବହନ କରିବାକୁ ମଧ୍ୟ ପ୍ରାୟ ଏକ ମାସ ଲାଗେ। ଏପରି କ୍ଷେତ୍ରରେ, ଆମେ ଏହାର ଗୁଣବତ୍ତା ଉପରେ କିପରି ବିଶ୍ୱାସ କରିପାରିବୁ ବୋଲି ସେ କହିଥିଲେ