Wife Falls Off Bike / ପୋଲିସ ଚେକିଂରୁ ଖସିବାକୁ ଉଦ୍ୟମ, ବାଇକ୍‌ରୁ ପଡ଼ିଗଲେ ସ୍ତ୍ରୀ; ପଛକୁ ବି ଚାହିଁଲେନି ସ୍ୱାମୀ

ପୋଲିସ ଚେକିଂରୁ ଖସିଯିବା ପାଇଁ ବାଇକ୍‌କୁ ହଠାତ୍ ବୁଲାଇଦେଲେ ଚାଳକ । ଯାହାଫଳରେ ବାଇକ୍‌ର ପଛରେ ବସିଥିବା ତାଙ୍କ ସ୍ତ୍ରୀ ଭାରସାମ୍ୟ ହରାଇ ରାସ୍ତାରେ ପଡ଼ିଗଲେ । କିନ୍ତୁ ସ୍ତ୍ରୀ ରାସ୍ତାରେ ପଡ଼ିଯିବା ପରେ ମଧ୍ୟ ବାଇକ୍ ଅଟକାଇଲେ ନାହିଁ ସ୍ୱାମୀ । ମହିଳାଙ୍କୁ ସେଠାରେ ଛାଡ଼ି ଆଗକୁ ଚାଲିଗଲେ । ଏହି ଘଟଣାର ଭିଡିଓ ଏବେ ସୋସିଆଲ ମିଡିଆରେ ବେଶ୍ ଭାଇରାଲ୍ ହେଉଛି ।

ଏଭଳି ଏକ ଘଟଣା ଉତ୍ତରାଖଣ୍ଡର ଉଧମ ସିଂ ନଗର ଜିଲ୍ଲା ଅନ୍ତର୍ଗତ ରୁଦ୍ରପୁରର ତ୍ରିଶୂଳ ଛକରେ ଘଟିଛି । ଏଠାରେ ପୋଲିସ ପକ୍ଷରୁ ବିନା ନମ୍ବର ପ୍ଲେଟ୍ ଓ ବିନା ହେଲମେଟ୍‌ରେ ଯାଉଥିବା ଗାଡ଼ିଗୁଡ଼ିକର ଚେକିଂ ଚାଲିଥିଲା । ଏହି ସମୟରେ ଜଣେ ବାଇକ୍ ଚାଳକ ସେଠାରେ ପହଞ୍ଚିଥିଲେ । ପୋଲିସର ଚେକିଂ ଦେଖି ସେ ହଠାତ୍ ବାଇକ୍‌କୁ ବୁଲାଇ ଦେଇଥିଲେ ।

ବାଇକ୍‌କୁ ହଠାତ୍ ବୁଲାଇ ଦେଇଥିବାରୁ ପଛରେ ବସିଥିବା ତାଙ୍କ ସ୍ତ୍ରୀ ଭାରସାମ୍ୟ ରକ୍ଷା କରିପାରିନଥିଲେ । ସେ ବାଇକ୍‌ରୁ ଖସି ରାସ୍ତା ଉପରେ ପଡ଼ିଯାଇଥିଲେ । ତେବେ ମହିଳା ଜଣକ ପଡ଼ିଯିବା ପରେ ମଧ୍ୟ ବାଇକ୍ ଚାଳକ ଅଟକି ନଥିଲେ । ସ୍ତ୍ରୀଙ୍କୁ ଉଠାଇବା କିମ୍ବା ତାଙ୍କ ଅବସ୍ଥା ବୁଝିବା ପରିବର୍ତ୍ତେ ସେ ବାଇକ୍ ନେଇ ଆଗକୁ ଚାଲିଯାଇଥିଲେ ।
ଏହି ସମୟରେ ଘଟଣାସ୍ଥଳରେ ଉପସ୍ଥିତ ପୋଲିସ କର୍ମଚାରୀମାନେ ମହିଳାଙ୍କ ସହାୟତା ପାଇଁ ଆଗେଇ ଆସିଥିଲେ । ପୂରା ଘଟଣାଟି ସେଠାରେ ଲାଗିଥିବା କ୍ୟାମେରାରେ କଏଦ ହୋଇଥିବା କୁହାଯାଉଛି । ଭିଡିଓଟି ସାମ୍ନାକୁ ଆସିବା ପରେ ମହିଳା ରାସ୍ତାରେ ପଡ଼ିଯିବା ସତ୍ତ୍ୱେ ଚାଳକ କାହିଁକି ଗାଡ଼ି ଅଟକାଇଲେ ନାହିଁ, ତାହାକୁ ନେଇ ପ୍ରଶ୍ନ ଉଠିଛି ।

ରୁଦ୍ରପୁରର ସିଓ ବିଭବ ସୈନି କହିଛନ୍ତି ଯେ ତ୍ରିଶୂଳ ଛକରେ ବିନା ନମ୍ବର ପ୍ଲେଟ୍‌ରେ ଚାଲୁଥିବା ଗାଡ଼ିଗୁଡ଼ିକର ଯାଞ୍ଚ କରାଯାଉଥିଲା । ଏହି ସମୟରେ ଦ୍ରୁତ ଗତିରେ ଆସିଥିବା ଜଣେ ବାଇକ୍ ଚାଳକ ଯାଞ୍ଚରୁ ବର୍ତ୍ତିବା ପାଇଁ ଆଗକୁ ବଢ଼ିଯାଇଥିଲେ। ଏହି ସମୟରେ ପଛରେ ବସିଥିବା ମହିଳା ରାସ୍ତାରେ ପଡ଼ିଯାଇଥିଲେ ।
ପୋଲିସ କର୍ମଚାରୀମାନେ ମହିଳାଙ୍କ ନିକଟକୁ ଯାଇ ତାଙ୍କ ଅବସ୍ଥା ବିଷୟରେ ପଚାରିଥିଲେ। ମହିଳା ଜଣକ ତାଙ୍କୁ କୌଣସି ଆଘାତ ଲାଗି ନଥିବା କହିଥିଲେ। ଏହାପରେ ପୋଲିସ ତାଙ୍କୁ ପରାମର୍ଶ ଦେଇ ଘରକୁ ପଠାଇଥିଲା ।

ସିଓ ବିଭବ ସୈନି ଗାଡ଼ି ଚାଳକମାନଙ୍କୁ ଏଭଳି ବେପରୁଆ ଭାବେ ଗାଡ଼ି ନଚଳାଇବାକୁ ଅପିଲ୍ କରିଛନ୍ତି । ଯାଞ୍ଚରୁ ବର୍ତ୍ତିବା ପାଇଁ ହଠାତ୍ ଗାଡ଼ି ବୁଲାଇବା ଦ୍ୱାରା ନିଜ ସହ ଅନ୍ୟମାନଙ୍କ ଜୀବନ ମଧ୍ୟ ବିପଦରେ ପଡ଼ିପାରେ ବୋଲି ସେ ସତର୍କ କରାଇଛନ୍ତି ।