ସଂସଦ ଭବନ ସୁରକ୍ଷାରେ ସାଂଘାତିକ ତ୍ରୁଟି । ନୂଆ ସଂସଦ ଭବନ ଭିତରକୁ ପଶିବାକୁ ଉଦ୍ୟମ କରିଛି ଜଣେ ଦୁର୍ବୃତ୍ତ । ଜଣେ ସନ୍ଦିଗ୍ଧ ବ୍ୟକ୍ତି ପାଚେରୀ ଡେଇଁ ସଂସଦ ଭବନର ଗରୁଡ଼ ଫାଟକରେ ପହଞ୍ଚିଥିଲେ । ଏହି ବ୍ୟକ୍ତି ସଂସଦ ଭବନରେ ପ୍ରବେଶ କରିବାକୁ ଚେଷ୍ଟା କରୁଥିଲେ, କିନ୍ତୁ ତାଙ୍କୁ ଗରୁଡ଼ ଗେଟ୍ ନିକଟରେ ଅଟକାଯାଇଥିଲା । ସଂସଦ ଭବନରେ ଉପସ୍ଥିତ ସୁରକ୍ଷା କର୍ମୀ ଅଭିଯୁକ୍ତକୁ ଧରି ପଚରାଉଚରା କରୁଛନ୍ତି।

ମିଳିଥିବା ସୂଚନା ଅନୁଯାୟୀ, ଜଣେ ବ୍ୟକ୍ତି ସକାଳ ପ୍ରାୟ ସାଢ଼େ ୬ଟାରେ ଏକ ଗଛ ସାହାଯ୍ୟରେ ପାଚେରୀ ଡେଇଁ ସଂସଦ ଭବନରେ ପ୍ରବେଶ କରିଥିଲେ । ସେ ରେଳ ଭବନ ପାର୍ଶ୍ୱରୁ ପାଚେରୀ ଡେଇଁ ନୂତନ ସଂସଦ ଭବନର ଗରୁଡ଼ ଫାଟକରେ ପହଞ୍ଚିଥିଲେ। ସଂସଦ ଭବନରେ ଉପସ୍ଥିତ ସୁରକ୍ଷା କର୍ମୀ ଅଭିଯୁକ୍ତକୁ ଧରି ପଚରାଉଚରା କରୁଛନ୍ତି । ତେବେ କେଉଁ ଉଦ୍ଦେଶ୍ୟରେ ଦୁର୍ବୃତ୍ତ ଜଣକ ସଂସଦ ଭିତରକୁ ପଶିଥିଲା, ତା’ର କାରଣ ଜଣାପଡିନାହିଁ । ମୌସୁମୀ ଅଧିବେଶନ ଶେଷ ହେବାର ଦିନକ ପରେ ଏହି ଘଟଣା ଘଟିଛି ।

୨୦୨୩ ମସିହାରେ, ସଂସଦ ଭିତରେ କିଛି ଲୋକ ଧୂଆଁ କ୍ୟାନିଷ୍ଟର ସାହାଯ୍ୟରେ ରଙ୍ଗୀନ ଧୂଆଁ ବିସ୍ତାର କରିଥିଲେ। ଏହି ଧୂଆଁ କ୍ୟାନଗୁଡ଼ିକୁ ସାଂସଦଙ୍କ ଆଡ଼କୁ ଫିଙ୍ଗାଯାଇଥିଲା, ଯାହା ଫଳରେ ବିଶୃଙ୍ଖଳା ସୃଷ୍ଟି ହୋଇଥିଲା। ସଂସଦ ଭବନ ଭିତରେ ଏହି ଘଟଣା ପରେ ଅନେକ ପ୍ରଶ୍ନ ଉଠିଥିଲା। ଏହି ବଡ଼ ଘଟଣା ପରେ ସଂସଦର ସୁରକ୍ଷାରେ ଅନେକ ବଡ଼ ପରିବର୍ତ୍ତନ କରାଯାଇଥିଲା।

ପୂର୍ବରୁ ଭାରତୀୟ ସଂସଦ ଭବନର ସୁରକ୍ଷା ପାଇଁ CRPF ଯବାନମାନଙ୍କୁ ନିୟୋଜିତ କରାଯାଇଥିଲା, କିନ୍ତୁ ସଂସଦର ସୁରକ୍ଷାରେ ତ୍ରୁଟି ପରେ, ଏକ ପରିବର୍ତ୍ତନ କରାଯାଇ ଏହି ଦାୟିତ୍ୱ CISFକୁ ହସ୍ତାନ୍ତର କରାଯାଇଥିଲା। ସଂସଦରେ ନିୟୋଜିତ କର୍ମଚାରୀମାନଙ୍କୁ ସ୍ୱତନ୍ତ୍ର ତାଲିମ ଦିଆଯାଇଛି। ଏଠାରେ ପ୍ରାୟ ୨୫୦୦ CISF କର୍ମଚାରୀ ନିୟୋଜିତ ଅଛନ୍ତି।