୭ ଥର ଟ୍ରାଫିକ୍ ନିୟମ ଭାଙ୍ଗିଛନ୍ତି କର୍ଣ୍ଣାଟକ ମୁଖ୍ୟମନ୍ତ୍ରୀ, ଭରିଛନ୍ତି ୨୫୦୦ ଟଙ୍କା ଫାଇନ୍
Key Points
ମୁଖ୍ୟମନ୍ତ୍ରୀ ଭାଙ୍ଗିଲେ ଟ୍ରାଫିକ୍ ନିୟମ । ଭରିଲେ ୨୫୦୦ ଟଙ୍କା ଫାଇନ୍ ।
୨୦୨୪ ମସିହା ଆରମ୍ଭରୁ ଏପର୍ଯ୍ୟନ୍ତ କର୍ଣ୍ଣାଟକ ମୁଖ୍ୟମନ୍ତ୍ରୀ ସିଦ୍ଧରମୈୟା ୭ ଥର ଟ୍ରାଫିକ୍ ନିୟମ ଭାଙ୍ଗିବା ସମୟରେ ଧରାପଡ଼ିଛନ୍ତି। ଏହି ସମସ୍ତ ମାମଲା ସହରରେ ଲାଗିଥିବା ଇଣ୍ଟେଲିଜେଣ୍ଟ ଟ୍ରାଫିକ୍ ମ୍ୟାନେଜମେଣ୍ଟ ସିଷ୍ଟମ୍ (ITMS)ର କ୍ୟାମେରାରେ କଏଦ ହୋଇଛି । ସବୁଠୁ ବଡ଼ କଥା ହେଉଛି ଟ୍ରାଫିକ୍ ନିୟମ ଭାଙ୍ଗିବା ଅଭିଯୋଗରେ ମୁଖ୍ୟମନ୍ତ୍ରୀ ୨୫୦୦ ଟଙ୍କା ଫାଇନ୍ ମଧ୍ୟ ଦେଇଛନ୍ତି ।
ସୂଚନା ଅନୁଯାୟୀ, ମୋଟ ୭ ଥର ମଧ୍ୟରୁ ୬ ଥର ମୁଖ୍ୟମନ୍ତ୍ରୀ ତାଙ୍କ କାରର ଆଗ ସିଟରେ ବସି ସିଟ୍ ବେଲ୍ଟ ପିନ୍ଧିନଥିଲେ । ଯେଉଁଥି ପାଇଁ ଫାଇନ୍ ଲାଗିଥିଲା । ଏହି ଉଲ୍ଲଂଘନ ସହରର ବିଭିନ୍ନ ପ୍ରମୁଖ ଛକରେ ITMSରେ ରେକର୍ଡ କରାଯାଇଥିଲା। ଏହା ବ୍ୟତୀତ, ଜୁଲାଇ ମାସରେ କେମ୍ପେଗୌଡା ଅନ୍ତର୍ଜାତୀୟ ବିମାନବନ୍ଦର ନିକଟ ଏକ୍ସପ୍ରେସ ୱେରେ ନିର୍ଦ୍ଧାରିତ ଗତି ସୀମାଠାରୁ ଅଧିକ ଗାଡ଼ି ଚଲାଇବା ପାଇଁ ଜରିମାନା ମଧ୍ୟ ଆଦାୟ କରାଯାଇଛି।
ତେବେ ଏହି ସମସ୍ତ ଜରିମାନା ସମୟସୀମା ମଧ୍ୟରେ ପ୍ରଦାନ କରାଯାଇଛି । ମୁଖ୍ୟମନ୍ତ୍ରୀଙ୍କ ଗାଡ଼ି ଟ୍ରାଫିକ୍ ନିୟମ ଭାଙ୍ଗିବାର ବିବରଣୀ ସୋସିଆଲ ମିଡିଆରେ ସେୟାର ହେବା ପରେ ଏହି ଘଟଣା ସାମ୍ନାକୁ ଆସିଥିଲା । ଏହି ଘଟଣା ଏହା ସ୍ପଷ୍ଟ କରୁଛି ଯେ ମୁଖ୍ୟମନ୍ତ୍ରୀ ନିଜକୁ ନିୟମଠାରୁ ଉର୍ଦ୍ଧ୍ୱ ମନେ ନକରି ସମସ୍ତ ଜରିମାନା ଦେଇ ନିଜକୁ ଜଣେ ଦାୟିତ୍ୱବାନ ନାଗରିକ ବୋଲି ଦେଖାଇଛନ୍ତି।
📱 Get Argus News App
✨
ତଥାପି, ଏହି ମାମଲା ରାଜନୈତିକ ମହଲରେ ଆଲୋଚନାର ବିଷୟ ପାଲଟିଛି । ITMS ଅଧିକାରୀମାନେ କୁହନ୍ତି ଯେ ଏହି ବ୍ୟବସ୍ଥା ସମ୍ପୂର୍ଣ୍ଣ ନିରପେକ୍ଷ ଭାବରେ କାର୍ଯ୍ୟ କରେ ଏବଂ ନିୟମ ଉଲ୍ଲଂଘନକାରୀଙ୍କୁ ସ୍ୱୟଂଚାଳିତ ଭାବରେ ଚିହ୍ନଟ କରାଯାଏ। ସମ୍ପ୍ରତି, ରାଜ୍ୟ ସରକାରଙ୍କ ଦ୍ୱାରା ବିଚାରାଧୀନ ଚାଲାଣ ସମାଧାନ ପାଇଁ ଏକ ଯୋଜନା କାର୍ଯ୍ୟକାରୀ କରାଯାଇଛି। ବିଚାରାଧୀନ ଟ୍ରାଫିକ ଜରିମାନା ଉପରେ ୫୦ ପ୍ରତିଶତ ରିହାତି ଦିଆଯାଇଛି। ଏହି ଯୋଜନା ଅଧୀନରେ, ଲକ୍ଷ ଲକ୍ଷ ମାମଲା ସମାଧାନ କରାଯାଇଥିଲା ଏବଂ ସରକାର କୋଟି କୋଟି ଟଙ୍କାର ଜରିମାନା ସଂଗ୍ରହ କରିଥିଲେ।