SIR West Bengal / SIR ଖୋଲିଲା ମମତାଙ୍କ ପୋଲ୍, ଭୋଟର୍ ଲିଷ୍ଟରୁ କଟିଲା ୫୮ ଲକ୍ଷ ନକଲି ମତଦାତାଙ୍କ ନାଁ

ଆରମ୍ଭରୁ SIRକୁ ବିରୋଧ କରିଆସୁଥିଲେ ପଶ୍ଚିମବଙ୍ଗ ମୁଖ୍ୟମନ୍ତ୍ରୀ । ଏବେ ପ୍ରଥମ ପର୍ଯ୍ୟାୟ ଏସଆଇଆର ତାଲିକା ଆସିବା ପରେ ମମତା ବାନାର୍ଜୀଙ୍କ ପୋଲ ଖୋଲିଛି । କାରଣ ନୂଆ ତାଲିକାରେ ନାହିଁ ୫୮ ଲକ୍ଷ ଭୋଟରଙ୍କ ନାଁ । ଏମାନଙ୍କ ମଧ୍ୟରୁ ଅଧିକାଂଶ ନକଲି ଭୋଟର ଥିବା ଜଣାପଡ଼ିଛି । ଏପରିକି କେବଳ ଦିଦିଙ୍କ ଗଡ଼ ଭବାନୀପୁରାରରେ ୪୫ ହଜାର ନକଲି ଭୋଟରଙ୍କ ନାଁ କଟିଛି।

SIR ଲାଗୁ ହେଲେ କାଳେ ତାଙ୍କ ସତ ପଦାରେ ପଡ଼ିଯିବ ସେହି ଡରରେ SIRକୁ ସବୁବେଳେ ଟାର୍ଗେଟ୍ କରିଆସୁଥିଲେ ମମତା । ପଶ୍ଚିମବଙ୍ଗରେ ପ୍ରଥମ ପର୍ଯ୍ୟାୟ SIR ପରେ ଶୁକ୍ରବାର ଜାରି ହୋଇଛି ନୂଆ ଭୋଟର୍ ତାଲିକା । ଯେଉଁଥିରେ ଦିଦିଙ୍କ ସବୁ ଚାଲର ହୋଇଛି ଭାଣ୍ଡାଫୋଡ୍ । ପାଖାପାଖି ୫୮ ଲକ୍ଷ ଭୋଟରଙ୍କୁ ନୂଆ ଭୋଟର ତାଲିକାରୁ ହଟାଇ ଦିଆଯାଇଛି । ହଟାଯାଇଥିବା ନାଁ ଭିତରେ ରହିଛନ୍ତି ଅନେକ ଡୁପ୍ଲିକେଟ ଆଉ ଫର୍ଜି ଭୋଟର୍ । ହଟାଯାଇଥିବା ଭୋଟରଙ୍କ ଭିତରେ ଶତାଧିକ ବାଂଲାଦେଶୀ ଅନୁପ୍ରବେଶକାରୀ ଥିବା ବି ବିଶେଷ ସୂତ୍ରରୁ ଜଣାପଡିଛି । ଯାହା ଦିଦିଙ୍କ ଆଭିମୁଖ୍ୟ ଉପରେ ଛିଡ଼ା କରିଛି ପ୍ରଶ୍ନବାଚୀ ।

ବାଂଲାଦେଶୀଙ୍କୁ ଭୋଟର ବନାଇ ବଙ୍ଗ ଉପରେ ରାଜ୍ କରୁଥିଲେ କି ମମତା ? ସେପଟେ ସବୁଠୁ ଚିନ୍ତାଜନକ କଥା ହେଉଛି ପଶ୍ଚିମବଙ୍ଗ ବିରୋଧୀଦଳ ନେତା ଶୁଭେନ୍ଦୁ ଅଧିକାରୀଙ୍କ ଆସନ ନନ୍ଦିଗ୍ରାମଠୁ ଚାରିଗୁଣା ଅଧିକ ଡୁପ୍ଲିକେଟ୍ ଭୋଟର ମମତାଙ୍କ ଗଡ଼ରେ । ନନ୍ଦିଗ୍ରାମରୁ ୧୦ ହଜାର ୫୯୯ ଭୋଟଙ୍କୁ ତାଲିକାରୁ ବାଦ୍ ଦିଆଯାଇଥିବା ବେଳେ ଦିଦିଙ୍କ ଗଡ଼ ଭବାନିପୁରାରୁ ୪୪ ହଜାର ୭୮୭ ଭୋଟରଙ୍କ ନାଁ ତାଲିକାରୁ ହଟାଇ ଦିଆଯାଇଛି ।

ସେପଟେ SIRର ଶେଷ ଦିନରେ ମିଳିଛି ଦିଦିଙ୍କ ଦୋହରା ଚରିତ୍ରର ପ୍ରମାଣ । ଆରମ୍ଭରୁ ହିଁ SIRକୁ ବିରୋଧ କରିଆସୁଥିଲେ ମମତା । ଏମିତିକି SIR ଫର୍ମ ଦାଖଲ ନ କରିବାକୁ ସର୍ବସାଧାରଣରେ ଘୋଷଣା କରିଥିଲେ । ଅଥଚ SIR ଫର୍ମ ଦାଖଲର ଶେଷ ଦିନରେ ହିଁ ଫର୍ମ ଭରିଛନ୍ତି ଦିଦି । ଯାହାକୁ ନେଇ ତେଜିଛି ପଶ୍ଚିମବଙ୍ଗ ରାଜନୀତି । ଏମିତିକି ଅନେକ ମଞ୍ଚରେ ଔଷଧ ବିକଳରେ ତାଟିଆ କାମୁଡିବା ଭଳି ରାଗରେ ରକ୍ତ ଚାଉଳ ଚୋବାଉଛନ୍ତି ଦିଦି । ରାଜ୍ୟରେ କେହି ଅନୁପ୍ରବେଶକାରୀ ନଥିବା କହି ଟିଏମସି ଦେଶ ଆଗରେ ନିଜ ଆଭିମୁଖ୍ୟକୁ ସ୍ପଷ୍ଟ କରିଥିବା ବେଳେ SIR ଦିଦିଙ୍କ ଦଳର ସତ ଧରାପକେଇ ଦେଇଛି ।

ଦେଶରେ ଅବୈଧ ବାଂଲାଦେଶୀ ଓ ଅନୁପ୍ରବେଶକାରୀଙ୍କ ପ୍ରତି କଠୋର ହୋଇଛନ୍ତି ମୋଦି ସରକାର । ଦେଶରୁ ଅନୁପ୍ରବେଶକାରୀ ହଟାଇବାକୁ ଜୋରସୋରରେ ଜାରି ରହିଛି ଅଭିଯାନ । ଆଉ ସ୍ପେଶାଲ୍ ଇଣ୍ଟେନସିଭ୍ ରିଭିଜନ୍ ବା SIR ଏହି ପ୍ରକ୍ରିୟାର ଏକ ଗୁରୁତ୍ୱପୂର୍ଣ୍ଣ ଅଂଶ ସାବ୍ୟସ୍ତ ହୋଇଛି ।