କେନ୍ଦ୍ର ସରକାରଙ୍କ ଲୋକପ୍ରିୟ ମାଗଣା ବିଦ୍ୟୁତ୍ ଯୋଜନା ପିଏମ୍ ସୂର୍ଯ୍ୟଘର ମାଗଣା ବିଜୁଳି ଯୋଜନା ଦିନକୁ ଦିନ ଅଧିକ ଲୋକପ୍ରିୟ ହେବାରେ ଲାଗିଛି । ଏହି ଯୋଜନା ଅଧୀନରେ ଉପଭୋକ୍ତାଙ୍କୁ ପ୍ରତି ମାସରେ ୩୦୦ ୟୁନିଟ୍ ପର୍ଯ୍ୟନ୍ତ ମାଗଣା ବିଦ୍ୟୁତ୍ ସୁବିଧା ମିଳିବା ସହିତ ଘର ଛାତ ଉପରେ ସୋଲାର ପ୍ୟାନେଲ୍ ଲଗାଇବା ପାଇଁ ସରକାର ୭୮,୦୦୦ ଟଙ୍କା ପର୍ଯ୍ୟନ୍ତ ସବ୍‌ସିଡି ଦେଉଛନ୍ତି ।

ଶୀତ ଋତୁ ଆରମ୍ଭ ହୋଇଥିବାରୁ ଘରେ ଗିଜର୍, ରୁମ୍ ହିଟର୍ ଭଳି ବିଦ୍ୟୁତ୍ ଉପକରଣର ବ୍ୟବହାର ବଢ଼ିବା ସ୍ୱାଭାବିକ । କିନ୍ତୁ ଏହି ଉପକରଣ ବ୍ୟବହାର କଲେ ବିଦ୍ୟୁତ୍ ବିଲ୍ ବଢ଼ିବା ନେଇ ଲୋକଙ୍କ ଚିନ୍ତା ରହିଥାଏ । ତେବେ ଘରେ ରୁଫ୍‌ଟପ୍ ସୋଲାର ସିଷ୍ଟମ୍ ଲଗାଇଥିବା ଲୋକଙ୍କୁ ଏହି ଖର୍ଚ୍ଚରୁ ଅନେକ ମାତ୍ରାରେ ଆଶ୍ୱସ୍ତି ମିଳିପାରୁଛି ।

୧ କୋଟି ଘରକୁ ସୋଲାର ସୁବିଧା ଦେବା ଲକ୍ଷ୍ୟ
ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ୨୦୨୪ ଫେବୃଆରୀରେ ପିଏମ୍ ସୂର୍ଯ୍ୟଘର ମଗଣା ବିଜୁଳି ଯୋଜନାର ଶୁଭାରମ୍ଭ କରିଥିଲେ । ଏହି ଯୋଜନା ପାଇଁ ମୋଟ ୭୫,୦୦୦ କୋଟି ଟଙ୍କାର ବଜେଟ୍ ରଖାଯାଇଛି । ୩୧ ମାର୍ଚ୍ଚ ୨୦୨୭ ସୁଦ୍ଧା ଦେଶର ୧ କୋଟି ଘରେ ରୁଫ୍‌ଟପ୍ ସୋଲାର ପ୍ୟାନେଲ୍ ଲଗାଇବା ଏହି ଯୋଜନାର ମୁଖ୍ୟ ଲକ୍ଷ୍ୟ । ଏହାଦ୍ୱାରା ପ୍ରତି ମାସରେ ୩୦୦ ୟୁନିଟ୍ ପର୍ଯ୍ୟନ୍ତ ମାଗଣା ବିଦ୍ୟୁତ୍ ଯୋଗାଇବାର ଯୋଜନା ରହିଛି ।

ଏଥି ସହ ପଢନ୍ତୁ:  'ମାଇନ୍ସରୁ ମାଇକ୍ରୋଚିପ୍ସ, ନୂଆ ଭବିଷ୍ୟତ ଲେଖୁଛି ଓଡ଼ିଶା': ପ୍ରଧାନମନ୍ତ୍ରୀ ନରେନ୍ଦ୍ର ମୋଦି

୪-୫ ଦିନରେ ଲାଗିବ ୧ ଲକ୍ଷ ସୋଲାର ସିଷ୍ଟମ୍
କେନ୍ଦ୍ର ନବୀନ ଓ ଅକ୍ଷୟ ଶକ୍ତି ମନ୍ତ୍ରୀ ପ୍ରହ୍ଲାଦ ଯୋଶୀ କହିଛନ୍ତି ଯେ, ଦେଶରେ ପିଏମ୍ ସୂର୍ଯ୍ୟଘର ଯୋଜନା ଅଧୀନରେ ସୋଲାର ପ୍ୟାନେଲ୍ ସ୍ଥାପନ କାର୍ଯ୍ୟ ଦ୍ରୁତଗତିରେ ଚାଲିଛି । ବିଜନେସ୍ ଟୁଡେକୁ ଦେଇଥିବା ସାକ୍ଷାତକାରରେ ମନ୍ତ୍ରୀ କହିଛନ୍ତି ଯେ, ବର୍ତ୍ତମାନ ଭାରତରେ ପ୍ରତି ୬ ଦିନରେ ପ୍ରାୟ ୧ ଲକ୍ଷ ରୁଫ୍‌ଟପ୍ ସୋଲାର ସିଷ୍ଟମ୍ ସ୍ଥାପନ ହେଉଛି । ଆଗାମୀ ଦିନରେ ଏହି ଗତି ଆହୁରି ବଢ଼ିବ । ଆସନ୍ତା କିଛି ସପ୍ତାହ ମଧ୍ୟରେ ପ୍ରତି ୪ରୁ ୫ ଦିନରେ ୧ ଲକ୍ଷ ସୋଲାର ସିଷ୍ଟମ୍ ଲଗାଇବାର କ୍ଷମତା ଭାରତ ହାସଲ କରିପାରିବ ବୋଲି ସେ ଆଶା ପ୍ରକାଶ କରିଛନ୍ତି ।

ମନ୍ତ୍ରୀଙ୍କ କହିବା ଅନୁଯାୟୀ, ଦେଶର ବିଦ୍ୟୁତ୍ କ୍ଷେତ୍ରରେ ବଡ଼ ଧରଣର ପରିବର୍ତ୍ତନ ହେଉଛି । ପୂର୍ବରୁ କେବଳ ବଡ଼ ବଡ଼ ବିଦ୍ୟୁତ୍ ଉତ୍ପାଦନ କେନ୍ଦ୍ର ଉପରେ ନିର୍ଭର କରାଯାଉଥିଲା । ଏବେ ସାଧାରଣ ଲୋକ ଓ କୃଷକମାନେ ମଧ୍ୟ ନିଜ ଆବଶ୍ୟକତା ପାଇଁ ବିଦ୍ୟୁତ୍ ଉତ୍ପାଦନ କରୁଛନ୍ତି । କିଛି କୃଷକ ଅତିରିକ୍ତ ବିଦ୍ୟୁତ୍ ଡିସକମ୍‌କୁ ବିକ୍ରି ମଧ୍ୟ କରୁଛନ୍ତି ।

୬୫ ଲକ୍ଷରୁ ଅଧିକ ଘରକୁ ମିଳୁଛି ଲାଭ
ଯୋଜନାର ତଥ୍ୟ ଅନୁଯାୟୀ, ନଭେମ୍ବର ୨ ସୁଦ୍ଧା ପିଏମ୍ ସୂର୍ଯ୍ୟଘର ଯୋଜନା ପାଇଁ ୮୮.୩ ଲକ୍ଷରୁ ଅଧିକ ଆବେଦନ ମିଳିଥିଲା । ସେହିପରି ୫୫.୩ ଲକ୍ଷରୁ ଅଧିକ ରୁଫ୍‌ଟପ୍ ସୋଲାର ସିଷ୍ଟମ୍ ସ୍ଥାପନ ହୋଇସାରିଥିଲା । ଏହାଦ୍ୱାରା ୬୫.୪ ଲକ୍ଷରୁ ଅଧିକ ଘର ଉପକୃତ ହେଉଥିବା ଜାତୀୟ ରୁଫ୍‌ଟପ୍ ସୋଲାର ପୋର୍ଟାଲର ତଥ୍ୟରୁ ଜଣାପଡ଼ିଛି ।

ମନ୍ତ୍ରୀ ପ୍ରହ୍ଲାଦ ଯୋଶୀ କହିଛନ୍ତି ଯେ, ଭାରତରେ ଦ୍ରୁତଗତିରେ ବଢ଼ୁଥିବା ରୁଫ୍‌ଟପ୍ ସୋଲାର ବ୍ୟବସ୍ଥା ଦେଶର ବିଦ୍ୟୁତ୍ କ୍ଷେତ୍ରର ଚିତ୍ର ବଦଳାଇବାରେ ସହାୟକ ହେଉଛି । ଏହାଦ୍ୱାରା ବିଦ୍ୟୁତ୍ ବିତରଣ କମ୍ପାନୀ ଓ ଗ୍ରିଡ୍ ପରିଚାଳକଙ୍କ ପାଇଁ ନୂଆ ସୁଯୋଗ ସୃଷ୍ଟି ହେବା ସହ କିଛି ନୂଆ ଆହ୍ୱାନ ମଧ୍ୟ ଦେଖାଦେଉଛି ।

ସରକାର ଏହି ଯୋଜନାର ନିର୍ଦ୍ଧାରିତ ଲକ୍ଷ୍ୟ ପୂରଣ କରିବା ସହ ୧ କୋଟି ଘରକୁ ସୋଲାର ସୁବିଧା ପହଞ୍ଚାଇବାରେ ସଫଳ ହେବେ ବୋଲି ମନ୍ତ୍ରୀ ଆଶାବାଦୀ ଅଛନ୍ତି । ୩୦୦ ୟୁନିଟ୍ ମାଗଣା ବିଦ୍ୟୁତ୍ ଓ ସବ୍‌ସିଡିର ଲାଭ ଯୋଜନାର ନିୟମ, ଯୋଗ୍ୟତା ଏବଂ ସ୍ଥାପିତ ସୋଲାର ସିଷ୍ଟମ୍‌ର କ୍ଷମତା ଉପରେ ନିର୍ଭର କରେ । ସୋଲାର ପ୍ୟାନେଲ୍ ଲଗାଇଲେ ସମସ୍ତଙ୍କ ବିଦ୍ୟୁତ୍ ବିଲ୍ ସମ୍ପୂର୍ଣ୍ଣ ଶୂନ ହେବ ବୋଲି ନିଶ୍ଚିତ ନୁହେଁ ।