Sugar Price Hike / ପାର୍ବଣ ଋତୁରେ ମହଙ୍ଗା ଚିନି, ବର୍ଷକରେ କିଲୋ ପିଛା ୧୩ ଟଙ୍କା ବୃଦ୍ଧି

ପାର୍ବଣ ଋତୁ ଆସିଲେ ଘରେ ଘରେ ମିଠାର ଚାହିଦା ବଢ଼ିଯାଏ । ଦୀପାବଳି ଓ ଛଟ୍ ପୂଜା ପ୍ରସ୍ତୁତି ମଧ୍ୟରେ ଏବେ ରୋଷେଇ ଘରର ବଜେଟ୍‌କୁ ନେଇ ଚିନ୍ତା ବଢ଼ାଇଛି ଚିନି ଦର । ବଜାରରେ ଚିନି ମୂଲ୍ୟରେ ହଠାତ୍ ବୃଦ୍ଧି ଦେଖାଦେଇଛି । ସରକାରଙ୍କ ପକ୍ଷରୁ ଯୋଗାଣ ସ୍ୱାଭାବିକ ରଖିବାକୁ ବିଭିନ୍ନ ପଦକ୍ଷେପ ନିଆଯାଇଥିଲେ ମଧ୍ୟ ଗତ ଏକ ମାସ ମଧ୍ୟରେ କିଲୋ ପିଛା ଚିନି ଦର ୪ ଟଙ୍କାରୁ ଅଧିକ ବୃଦ୍ଧି ପାଇଛି । ଦେଶରେ ଚିନିର ହାରାହାରି ଖୁଚୁରା ଦର ଏବେ କିଲୋ ପିଛା ୫୯.୫୦ ଟଙ୍କାରେ ପହଞ୍ଚିଛି ।

ଏକ ବର୍ଷରେ କେତେ ମହଙ୍ଗା ହେଲା ଚିନି ?
ଗତ ଏକ ମାସ ନୁହେଁ, ବରଂ ଗତ ଏକ ବର୍ଷର ତଥ୍ୟ ଦେଖିଲେ ଚିନି ଦରରେ ବଡ଼ ପରିବର୍ତ୍ତନ ହୋଇଥିବା ଜଣାପଡ଼ୁଛି । ବର୍ତ୍ତମାନ ଚିନିର ହାରାହାରି ଖୁଚୁରା ମୂଲ୍ୟ କିଲୋ ପିଛା ୫୯.୫୦ ଟଙ୍କା ଥିବାବେଳେ, ଠିକ୍ ଏକ ବର୍ଷ ପୂର୍ବେ ଏହା ୪୬.୫୦ ଟଙ୍କା ଥିଲା ।

ଅର୍ଥାତ୍ ଗୋଟିଏ ବର୍ଷ ମଧ୍ୟରେ କିଲୋ ପିଛା ଚିନି ଦର ୧୩ ଟଙ୍କା ବୃଦ୍ଧି ପାଇଛି । ସେହିପରି ହୋଲସେଲ୍ ବଜାରରେ ଚିନି ଦର କିଲୋ ପିଛା ୪୩.୨୩ ଟଙ୍କାରୁ ବୃଦ୍ଧି ପାଇ ୫୫.୪୦ ଟଙ୍କାରେ ପହଞ୍ଚିଛି ।

ଚିନି ଦର ବୃଦ୍ଧି ପଛରେ କ'ଣ ରହିଛି କାରଣ ?
ବଜାରରେ ଚିନିର ପର୍ଯ୍ୟାପ୍ତ ଷ୍ଟକ୍ ରଖିବା ପାଇଁ ସରକାର ଷ୍ଟକ୍ ଲିମିଟ୍ ଧାର୍ଯ୍ୟ କରିବା ସହ ଆମଦାନୀର ବିକଳ୍ପ ଉପରେ ବିଚାର କରିଛନ୍ତି । ଏହାସହ ଆଖୁ ପେଡ଼ା ଋତୁ ମଧ୍ୟ ଆଗୁଆ ଆରମ୍ଭ କରାଯାଇଛି । ତଥାପି ଚିନି ଦର କମିବା ପରିବର୍ତ୍ତେ ବଢ଼ିବାରେ ଲାଗିଛି । ଏହା ପଛରେ ରହିଛି ୪ଟି ପ୍ରମୁଖ କାରଣ ।

୧. ଚିନି ଉତ୍ପାଦନରେ ହ୍ରାସ: ୨୦୨୫-୨୬ ଋତୁରେ ଦେଶରେ ଚିନି ଉତ୍ପାଦନ ଅନୁମାନଠାରୁ କମ୍ ରହିଛି । ଫଳରେ ବଜାରରେ ଯୋଗାଣ ଉପରେ ପ୍ରଭାବ ପଡ଼ିଛି ।
୨. ପାର୍ବଣରେ ଚାହିଦା ବୃଦ୍ଧି: ଦୀପାବଳି, ଭାଇଦୂଜ୍ ଓ ଛଟ୍ ପୂଜା ସମୟରେ ଘରଠାରୁ ଆରମ୍ଭ କରି ମିଠା ଦୋକାନ ପର୍ଯ୍ୟନ୍ତ ଚିନିର ଚାହିଦା ବହୁତ ବଢ଼ିଯାଏ । ଏହା ମଧ୍ୟ ଦର ବୃଦ୍ଧିର ଏକ ବଡ଼ କାରଣ ।
୩. ଆଖୁ ଫସଲର କ୍ଷତି: ଖରାପ ପାଣିପାଗ ଯୋଗୁଁ ଆଖୁ ଫସଲ କ୍ଷତିଗ୍ରସ୍ତ ହୋଇଛି । ଏହାର ପ୍ରଭାବ ଚିନି ଉତ୍ପାଦନ ଓ ଯୋଗାଣ ଉପରେ ପଡ଼ିଛି ।
୪. ଅନ୍ତର୍ଜାତୀୟ ବଜାରର ପ୍ରଭାବ:ବିଶ୍ୱ ବଜାରରେ ଚିନିର ସୀମିତ ଯୋଗାଣ ସହ ଦେଶ ଭିତରେ ମହଜୁଦକାରୀଙ୍କ କାର୍ଯ୍ୟକଳାପ ନେଇ ଆଶଙ୍କା ମଧ୍ୟ ଦର ବୃଦ୍ଧିକୁ ପ୍ରଭାବିତ କରୁଛି ।

ଆଗକୁ ଶସ୍ତା ହେବ କି ଚିନି ?
ଚିନି ଗ୍ରାହକଙ୍କ ପାଇଁ ଏକ ଆଶ୍ୱସ୍ତିକର ଖବର ମଧ୍ୟ ରହିଛି । ଦେଶରେ ଚିନି ଯୋଗାଣ ବୃଦ୍ଧି କରିବା ଲକ୍ଷ୍ୟରେ ୨୦୨୬-୨୭ ନୂଆ ଆଖୁ ପେଡ଼ା ଋତୁ ଅକ୍ଟୋବର ୮ ତାରିଖରୁ ଆରମ୍ଭ ହୋଇଛି । ନ୍ୟାସନାଲ ଫେଡେରେସନ୍ ଅଫ୍ କୋଅପରେଟିଭ୍ ସୁଗାର ଫ୍ୟାକ୍ଟ୍ରିଜ୍ ଲିମିଟେଡ୍ (NFCSF) ଅନୁସାରେ, ୨୦୨୬ ଅକ୍ଟୋବର ୩୦ ସୁଦ୍ଧା ଦେଶର ୧୫୨ଟି ଚିନି କଳରେ ଉତ୍ପାଦନ ଆରମ୍ଭ ହୋଇସାରିଛି । ନୂଆ ଋତୁର ପ୍ରଥମ ମାସରେ ପ୍ରାୟ ୮.୪୫ ଲକ୍ଷ ଟନ୍ ଚିନି ଉତ୍ପାଦନ ହୋଇଛି ।

ବଜାର ବିଶେଷଜ୍ଞଙ୍କ ମତରେ, ନୂଆ ଚିନି ମଣ୍ଡିକୁ ଆସିବା ପରେ ଯୋଗାଣରେ ସୁଧାର ଆସିପାରେ । ଏହାଦ୍ୱାରା ପାର୍ବଣ ପରବର୍ତ୍ତୀ ସମୟରେ ଚିନି ଦର ଉପରେ ଥିବା ଚାପ କମିବା ସହ ମୂଲ୍ୟରେ ହ୍ରାସ ହେବାର ସମ୍ଭାବନା ରହିଛି । ତେବେ ଆଗାମୀ ଦିନରେ ଚିନି ଦର କେତେ କମିବ, ତାହା ନୂଆ ଉତ୍ପାଦନ ଓ ବଜାରରେ ଯୋଗାଣ ଉପରେ ନିର୍ଭର କରିବ ।