ମହାରାଷ୍ଟ୍ରରେ ରାଜନୀତିକୁ ନେଇ ଏକ ବଡ଼ ଖବର ସାମ୍ନାକୁ ଆସିଛି । ଜାତୀୟ ଗଣମାଧ୍ୟମର ସୂଚନା ଅନୁସାରେ, ଅଜିତ ପାଓ୍ବାରଙ୍କ ପତ୍ନୀ ସୁନେତ୍ରା ପାୱାର ମହାରାଷ୍ଟ୍ରର ଉପମୁଖ୍ୟମନ୍ତ୍ରୀ ହେବା ପ୍ରସ୍ତାବକୁ ଗ୍ରହଣ କରିଛନ୍ତି । ସରକାର ଭିତରେ କ୍ଷମତା ସନ୍ତୁଳନ ଏବଂ ଭବିଷ୍ୟତ ରାଜନୈତିକ ରଣନୀତିକୁ ଧ୍ୟାନରେ ରଖି ଏହି ନିଷ୍ପତ୍ତି ନିଆଯାଇଛି । ଆସନ୍ତାକାଲି ପୂର୍ବାହ୍ନ ୧୧ଟାରେ ବିଧାୟକ ଦଳ ବୈଠକ ବସିବ । ସନ୍ଧ୍ୟାରେ ସେ ଉପମୁଖ୍ୟମନ୍ତ୍ରୀ ଭାବରେ ଶପଥ ଗ୍ରହଣ କରିବେ । ସୁନେତ୍ରା ପାୱାର ରାଜ୍ୟର ପ୍ରଥମ ମହିଳା ଉପମୁଖ୍ୟମନ୍ତ୍ରୀ ହେବେ ।

ରିପୋର୍ଟ ଅନୁଯାୟୀ, ସୁନେତ୍ରା ଉପମୁଖ୍ୟମନ୍ତ୍ରୀ ଦାୟିତ୍ୱ ଗ୍ରହଣ କରିବା ସହ ଅବକାରୀ ଏବଂ କ୍ରୀଡ଼ା ବିଭାଗ ମଧ୍ୟ ସମ୍ଭାଳିବେ । ଏହି ସମୟରେ, ଆସନ୍ତାକାଲି ନ୍ୟାସନାଲିଷ୍ଟ କଂଗ୍ରେସ ପାର୍ଟି (NCP) ବିଧାୟକ ଦଳର ଏକ ବୈଠକ ଡକାଯାଇଛି। ଏହି ବୈଠକକୁ ଗୁରୁତ୍ୱପୂର୍ଣ୍ଣ ବୋଲି ବିବେଚନା କରାଯାଉଛି, କାରଣ ଏଥିରେ ନେତୃତ୍ୱ ଏବଂ ଭବିଷ୍ୟତ ରାଜନୈତିକ ରଣନୀତି ଉପରେ ଆନୁଷ୍ଠାନିକ ଭାବରେ ଆଲୋଚନା ହେବାର ଆଶା କରାଯାଉଛି ।

ସେହିପରି ମୁଖ୍ୟମନ୍ତ୍ରୀ ଦେବେନ୍ଦ୍ର ଫଡନାଭିସ୍ ମଧ୍ୟ ଏକ ଗୁରୁତ୍ୱପୂର୍ଣ୍ଣ ଦାୟିତ୍ୱ ଗ୍ରହଣ କରିବାକୁ ଯାଉଛନ୍ତି । ସୂତ୍ରରୁ ଜଣାପଡୁଛି ଯେ ଫଡନାଭିସ୍ ଆଗାମୀ ବଜେଟ ଅଧିବେଶନ ପୂର୍ବରୁ ରାଜ୍ୟର ଅର୍ଥ ମନ୍ତ୍ରଣାଳୟର ଦାୟିତ୍ୱ ଗ୍ରହଣ କରିବେ। ବଜେଟ ପ୍ରସ୍ତୁତି ଏବଂ ଆର୍ଥିକ ନୀତି ଉପରେ ମୁଖ୍ୟମନ୍ତ୍ରୀଙ୍କ ପ୍ରତ୍ୟକ୍ଷ ତଦାରଖ ସୁନିଶ୍ଚିତ କରିବା ପାଇଁ ଏହି ନିଷ୍ପତ୍ତି ନିଆଯାଇଥିବା କୁହାଯାଉଛି ।

ଜାତୀୟ ଗଣମାଧ୍ୟମର ରିପୋର୍ଟ ଅନୁସାରେ ଦଳର ଭବିଷ୍ୟତ ଦିଗ ନିର୍ଣ୍ଣୟ କରିବା ପାଇଁ ବରିଷ୍ଠ ଏନସିପି ନେତାମାନେ ସୁନେତ୍ରା ପାୱାରଙ୍କୁ ଉପମୁଖ୍ୟମନ୍ତ୍ରୀ କରିବା ପାଇଁ ପ୍ରସ୍ତାବ ଦେଇଥିଲେ । ବିଶେଷକରି ଫେବୃଆରୀ ୭ ତାରିଖରେ ହେବାକୁ ଥିବା ପୁଣେ ଜିଲ୍ଲା ପରିଷଦ ନିର୍ବାଚନକୁ ଦୃଷ୍ଟିରେ ରଖି ଏହି ପଦକ୍ଷେପକୁ ରଣନୈତିକ ଭାବରେ ଗୁରୁତ୍ୱପୂର୍ଣ୍ଣ ବୋଲି ବିବେଚନା କରାଯାଉଛି। ସୁନେତ୍ର ଏହି ପ୍ରସ୍ତାବକୁ ଗ୍ରହଣ କରିଛନ୍ତି ।

ରିପୋର୍ଟ ଅନୁଯାୟୀ ପାୱାର ପରିବାର ମଧ୍ୟରେ ଏହି ପ୍ରସ୍ତାବ ଉପରେ ଆଲୋଚନା ହୋଇଥିଲା, ଯାହା ପରେ ସୁନେତ୍ରା ପାୱାର ଉପମୁଖ୍ୟମନ୍ତ୍ରୀ ପଦ ଗ୍ରହଣ କରିବାକୁ ରାଜି ହୋଇଥିଲେ । ଦଳ ଭିତରେ ଏହାକୁ ସଂଗଠନକୁ ମଜବୁତ କରିବା ଏବଂ ତୃଣମୂଳ ସ୍ତରରେ ଏକ ରାଜନୈତିକ ବାର୍ତ୍ତା ପଠାଇବାର ପ୍ରୟାସ ଭାବରେ ଦେଖାଯାଉଛି । ସରକାର କିମ୍ବା ଦଳ ପକ୍ଷରୁ କୌଣସି ସରକାରୀ ଘୋଷଣା କରାଯାଇ ନଥିଲେ ମଧ୍ୟ ରାଜନୈତିକ ମହଲ ବିଶ୍ୱାସ କରୁଛି ଯେ CLP ବୈଠକ ପରେ ଏହାକୁ ଅନୁମୋଦନ କରାଯାଇପାରିବ ।