Tamil Nadu Jailbreak / ତାମିଲନାଡୁ ଜେଲ୍‌ରୁ ୧୭ କଏଦୀ ଫେରାର, ରାତି ଅନ୍ଧାରରେ କର୍ମଚାରୀଙ୍କୁ ଆକ୍ରମଣ କରି ପଳାଇଲେ

ତାମିଲନାଡୁରେ ବଡ଼ ଜେଲ୍ ବ୍ରେକ୍‌ ଘଟଣା । ଏକାସାଙ୍ଗରେ ଜେଲରୁ ଚମ୍ପଟ ମାରିଲେ ୧୭ କଏଦୀ । ଥେନି ଜେଲ୍‌ରୁ ୧୭ ଜଣ କଏଦୀ ଫେରାର ହୋଇଯାଇଥିବା ଖବର ପରେ ସମଗ୍ର ଅଞ୍ଚଳରେ ହଇଚଇ ସୃଷ୍ଟି ହୋଇଛି । ଜେଲ୍ କର୍ମଚାରୀଙ୍କୁ ଆକ୍ରମଣ କରି କଏଦୀମାନେ ଫେରାର ହୋଇଥିବା ଜଣାପଡ଼ିଛି । ଘଟଣା ପରେ ପୋଲିସ ପକ୍ଷରୁ ବ୍ୟାପକ ତଲାସୀ ଅଭିଯାନ ଆରମ୍ଭ ହୋଇଛି। ଫେରାର କଏଦୀଙ୍କ ମଧ୍ୟରୁ ଜଣଙ୍କୁ ଗିରଫ କରାଯାଇଥିବା ବେଳେ ଅନ୍ୟମାନଙ୍କୁ ଧରିବା ପାଇଁ ୧୭ଟି ସ୍ୱତନ୍ତ୍ର ପୋଲିସ ଟିମ୍ ଗଠନ କରାଯାଇଛି ।

କଏଦୀମାନେ ଫେରାର ହେବା ପରେ ପଡ଼ୋଶୀ ଡିଣ୍ଡିଗୁଲ ଜିଲ୍ଲାରେ ସୁରକ୍ଷା ବ୍ୟବସ୍ଥା କଡ଼ାକଡ଼ି କରାଯାଇଛି । ଏଠାରେ ୧୬ଟି ସ୍ଥାନରେ ଚେକ୍‌ପୋଷ୍ଟ ସ୍ଥାପନ କରାଯାଇ ସମସ୍ତ ଯାନବାହନକୁ ଯାଞ୍ଚ କରାଯାଉଛି । ଏଥିସହ ଆଖପାଖ ଜିଲ୍ଲାର ପୋଲିସକୁ ସତର୍କ ରଖାଯାଇଛି ।

#WATCH | Tamil Nadu | Security teams conduct intensive vehicle checking following the incident where 17 inmates have escaped from the Theni sub-jail. 17 special teams have been formed to track down and apprehend the escaped prisoners. One escaped prisoner has been arrested by police during combing operations: Inspector General of Police (IGP), South Zone, Vijayendra Bidari

— ANI (@ANI) October 26, 2026

ଜେଲ୍ କର୍ମଚାରୀଙ୍କୁ ଆକ୍ରମଣ କରି ଫେରାର

ପୋଲିସର ସୂଚନା ଅନୁସାରେ, ସମସ୍ତ ୧୭ ଜଣ କଏଦୀ ଗୋଟିଏ ସେଲ୍‌ରେ ବନ୍ଦ ଥିଲେ । ଜଣେ କଏଦୀଙ୍କ ଦେହ ଖରାପ ଥିବା ସୂଚନା ପାଇ ଜେଲ୍ କର୍ମଚାରୀମାନେ ସେଲ୍‌ ନିକଟକୁ ଯାଇଥିଲେ । ଏହି ସମୟରେ କଏଦୀମାନେ କର୍ମଚାରୀଙ୍କୁ ଆକ୍ରମଣ କରିଥିବା ଅଭିଯୋଗ ହୋଇଛି । ଏହାପରେ ସେମାନେ ଜେଲ୍‌ରୁ ଫେରାର ହେବାରେ ସଫଳ ହୋଇଥିଲେ ।

ଜଣେ କଏଦୀ ଗିରଫ, ଅନ୍ୟମାନଙ୍କୁ ଖୋଜୁଛି ପୋଲିସ

ଦକ୍ଷିଣ ଜୋନ୍‌ର ଆଇଜିପି ବିଜୟେନ୍ଦ୍ର ବିଦାରୀ ଏହି ଘଟଣାରେ ଜଣେ ଫେରାର କଏଦୀ ଗିରଫ ହୋଇଥିବା ସ୍ପଷ୍ଟ କରିଛନ୍ତି । ଅନ୍ୟ ଫେରାର କଏଦୀଙ୍କୁ ଧରିବା ପାଇଁ ପୋଲିସର ବିଭିନ୍ନ ଟିମ୍ ତଲାସୀ ଜାରି ରଖିଛନ୍ତି ।

ଫେରାର କଏଦୀମାନଙ୍କ ଫଟୋ ବିଭିନ୍ନ ପୋଲିସ ଅଧିକାରୀଙ୍କ ମଧ୍ୟରେ ବଣ୍ଟନ କରାଯାଇଛି, ଯାହାଦ୍ୱାରା ସେମାନଙ୍କୁ ଚିହ୍ନଟ କରି ଧରାଯାଇପାରିବ । ଆଖପାଖ ଜିଲ୍ଲାଗୁଡ଼ିକର ପୋଲିସକୁ ହାଇଆଲର୍ଟରେ ରଖାଯାଇଛି । ଏହି ଘଟଣାରେ ମାମଲା ରୁଜୁ ହୋଇଥିବା ବେଳେ ଫେରାର କଏଦୀମାନଙ୍କୁ ଧରିବା ପାଇଁ ତଲାସୀ ଓ ତଦନ୍ତ ଜାରି ରହିଛି ।