Terrorist Arrest / ସୁନ୍ଦର ହେବା ଚେଷ୍ଟାରେ ଧରାପଡ଼ିଲା ଆତଙ୍କବାଦୀ,ଦିଲ୍ଲୀରେ ବଡ଼ ଆକ୍ରମଣ ଯୋଜନା ଫେଲ୍

ନୁଆଦିଲ୍ଲୀ,୨୧/୦୫: ସୁନ୍ଦର ଚେହେରା ଆଉ ଚକା‌ଚକ୍ ଦାନ୍ତ । ନିଜକୁ ସୁନ୍ଦ କରିବା ଲାଗି ଆତଙ୍କବାଦୀର ସଉକ ତାକୁ ଧରାଇଦେଲା । ଦେଶର ରାଜଧାନୀ ଦିଲ୍ଲୀରେ ବଡ଼ଧରଣର ବିନାଶ କରିବା ପୂର୍ବରୁ, ଦିଲ୍ଲୀ ପୋଲିସ ସ୍ପେସାଲ୍ ସେଲ୍ ହାତରେ ଧରାପଡ଼ିଛି ଲସ୍କର ଆତଙ୍କବାଦୀ ସଵିର ଅହମ୍ମଦ ଲୋନ୍ । ଯାଞ୍ଚ ଏଜେନ୍ସିକୁ ଚକମା ଦେବା ପାଇଁ ଏହି ଆତଙ୍କବାଦୀ, ସୁଦୂର ବାଂଲାଦେଶରୁ ନେଟୱର୍କ ଚଲାଉଥିଲା । ନିଜର ପରିଚୟ ଲୁଚାଇବା ପାଇଁ ହରିଆଣାର ଗୁରୁଗ୍ରାମରେ କରାଇଥିଲା ହେୟାର୍ ଟ୍ରାନ୍ସପ୍ଲାଣ୍ଟ ଓ ଡେଣ୍ଟାଲ୍ ସର୍ଜରୀ

ସୁନ୍ଦର ଦେଖାଯିବାର ସଉକ ନା ଆଖିରେ ଧୂଳି ଦେବାର ବଡ଼ ରଣନୀତି ? ଦିଲ୍ଲୀ ସୀମାରୁ ସ୍ପେସାଲ୍ ସେଲ୍ ଦ୍ୱାରା ଗିରଫ ହେବା ପରେ, ଲସ୍କର ଆତଙ୍କବାଦୀ ସବିର ଅହମ୍ମଦ ଲୋନ୍‌କୁ ନେଇ ଆସିଛି ରୋମାଞ୍ଚକର ତଥ୍ୟ । ଜାମ୍ମୁ-କାଶ୍ମୀର ଶ୍ରୀନଗର ଅଞ୍ଚଳର ଏହି ଆତଙ୍କବାଦୀ ଜଣକ ନିଜର ଚେହେରା ବଦଳାଇବା ପାଇଁ ହରିଆଣାର ସାଇବର ସିଟି- ଗୁରୁଗ୍ରାମର ଜଣେ ନାମୀ ଡାକ୍ତରଙ୍କ ସହ ଯୋଗାଯୋଗ କରିଥିଲା । ମୁଣ୍ଡରେ କେଶ ବଢ଼ାଇବା ପାଇଁ ପ୍ରାୟ ଦେଢ଼ ଲକ୍ଷ ଟଙ୍କା ଖର୍ଚ୍ଚ କରି, ହେୟାର ଟ୍ରାନ୍ସପ୍ଲାଣ୍ଟ କରିଥିଲା । କେବଳ ସେତିକି ନୁହେଁ ଦାନ୍ତକୁ ସୁନ୍ଦର ଓ ଚକା‌ଚକ୍ କରିବାକୁ ଡେଣ୍ଟାଲ୍ ଟ୍ରିଟମେଣ୍ଟ ବି କରାଇଥିଲା । ସୁରକ୍ଷା ଏଜେନ୍ସିକୁ ଚକମା ଦେଇ ଭାରତ ବିରୋଧୀ ନେଟୱର୍କ ଚଲାଇବା ପାଇଁ ଏହା ଲସ୍କରର ବଡ଼ ଚାଲ୍ ଥିଲା ବୋଲି ସନ୍ଦେହ କରୁଛନ୍ତି ତଦନ୍ତକାରୀ ସଂସ୍ଥା । ହେଲେ କୁହାଯାଉଛି ବାଂଲାଦେଶରେ ରହି ଭାରତ ବିରୋଧୀ ଅପରେସନ୍ ଚଳାଉଥିବା ସଵିର, କେଶ ଓ ଦାନ୍ତ ପାଇଁ ଭାରତ ଆସି ଫସିଗଲା ବୋଲି କହିଛନ୍ତି ସ୍ପେସାଲ ସେଲ୍‍ର ବରିଷ୍ଠ ଅଧିକାରୀ ପ୍ରମୋଦ ସିଂ କୁଶୱାହ।

ପଢନ୍ତୁ ଏହି ଖବର: ଲାହୋରରୁ କଣ୍ଟ୍ରୋଲ୍ ହେଉଥିଲା ପହଲଗାମ୍ ଆକ୍ରମଣ ! NIAର ବଡ଼ ଖୁଲାସା

କିଛି ଦିନ ପୂର୍ବରୁ ଦିଲ୍ଲୀ ଓ ଦକ୍ଷିଣ ଭାରତରେ ସକ୍ରିୟ ଥିବା ଏକ ଲସ୍କର ମୋଡ୍ୟୁଲ୍‌କୁ ପୋଲିସ ଧ୍ୱସ୍ତ କରିଥିଲା । ଏହି ଗ୍ୟାଙ୍ଗ୍ ଦିଲ୍ଲୀ ଓ କୋଲକାତାର ବିଭିନ୍ନ ସ୍ଥାନରେ ଦେଶ ବିରୋଧୀ ପୋଷ୍ଟର ଲଗାଇ ପ୍ରୋପାଗାଣ୍ଡା ଚଳାଇବା ସହ ବଡ଼ ଧରଣର ଆତ୍ମଘାତୀ ଆକ୍ରମଣ ପାଇଁ ବ୍ଲୁ-ପ୍ରିଣ୍ଟ ପ୍ରସ୍ତୁତ କରୁଥିଲେ । ଆଉ ଏହି ସାରା ନେଟୱର୍କର ସୂତ୍ରଧର ଥିଲା ଏହି ପ୍ଲାଷ୍ଟିକ୍ ସର୍ଜରୀ ପ୍ରେମୀ ସଵିର ଲୋନ୍ ।

ତେବେ ଏହି ଘଟଣା ଉପରେ ଦିଲ୍ଲୀ ପୋଲିସ ଏପର୍ଯ୍ୟନ୍ତ କୌଣସି ଆନୁଷ୍ଠାନିକ ବୟାନ ଜାରି କରିନଥିଲେ ବି ଆତଙ୍କବାଦୀର ଏଭଳି ‘ହାଇଟେକ୍ ମେକ୍-ଓଭର’ ସାରା ଦେଶକୁ ସ୍ତବ୍ଧ କରିଦେଇଛି