Tirupati Laddu / ତିରୁପତି ଲଡୁ ଘିଅରେ ପାମ୍ ଅଏଲ୍ ମିଶ୍ରଣ ଅଭିଯୋଗ,EDର ବଡ଼ କାର୍ଯ୍ୟାନୁଷ୍ଠାନ

ହାଇଦ୍ରାବାଦ, ୧୯/୦୯: କୋଟି କୋଟି ଶ୍ରଦ୍ଧାଳୁଙ୍କ ଆସ୍ଥା ସହ ହୋଇଥିବା ଧୋକ୍କ ଉପରୁ ପରଦା ହଟାଇଛି ପ୍ରବର୍ତ୍ତନ ନିର୍ଦ୍ଦେଶାଳୟ । ତିରୁପତି ଲଡୁ ପ୍ରସାଦରେ ଭେଜାଲ ଘିଅ ସପ୍ଲାଇ ମାମଲାରେ ED କରିଛି ଏକ ବଡ଼ ଗିରଫଦାରୀ। ସୁକୃତି ଫୁଡ୍ସର ପ୍ରମୋଟର କୈଳାଶ ଚନ୍ଦ୍ର ମଙ୍ଗଳାଙ୍କୁ ଗିରଫ କରିଛି ED

ତିରୁପତି ମନ୍ଦିରର ପବିତ୍ର ଲଡୁ ପ୍ରସାଦ ପ୍ରସ୍ତୁତି ପାଇଁ ଗାଈ ଘିଅ ନାଁରେ ଯୋଗାଇ ଦିଆଯାଉଥିଲା ବିଷାକ୍ତ କେମିକାଲ୍ ଏବଂ ପାମ୍ ଅଏଲ୍। EDର ତଦନ୍ତରୁ ଜଣାପଡ଼ିଛି ଯେ, ଗତ ୨୦୧୯ରୁ ୨୦୨୪ ମଧ୍ୟରେ ପ୍ରାୟ ୨୩୦ କୋଟି ଟଙ୍କାର ନକଲି ଘିଅ ତିରୁମାଲା ତିରୁପତି ଦେବସ୍ଥାନମକୁ ସପ୍ଲାଇ କରାଯାଇଛି। ଏଥିମଧ୍ୟରୁ କେବଳ ସୁକୃତି ଫୁଡ୍ସର ପ୍ରମୋଟର କୈଳାଶ ଚନ୍ଦ୍ର ମଙ୍ଗଳା ନିଜ ଫ୍ୟାକ୍ଟ୍ରିରେ ୯୬ କୋଟି ଟଙ୍କାର ଭେଜାଲ ଘିଅ ପ୍ରସ୍ତୁତ କରିଥିଲେ। ପାମ୍ ଅଏଲ୍ ଏବଂ କେମିକାଲ୍ର ବ୍ୟବହାରକୁ ଲୁଚାଇବା ପାଇଁ ସେ କମ୍ପାନୀର ନକଲି କ୍ରୟ-ବିକ୍ରୟ ଖାତା ମଧ୍ୟ ପ୍ରସ୍ତୁତ କରିଥିଲେ। ବର୍ତ୍ତମାନ ବିଶାଖାପାଟଣାର ଏକ ସ୍ୱତନ୍ତ୍ର ପିଏମଏଲଏ କୋର୍ଟ ଅଭିଯୁକ୍ତ କୈଳାଶ ଚନ୍ଦ୍ରଙ୍କୁ ଜେଲ୍ ପଠାଇ ଦେଇଛନ୍ତି।

ଇଡିର ତଦନ୍ତ ଅନୁସାରେ, ତିରୁମାଲା ତିରୁପତି ଦେବସ୍ଥାନମ୍ (TTD)କୁ ‘ଆଗମାର୍କ ସ୍ପେଶାଲ୍ ଗ୍ରେଡ୍ ଗାଈ ଘିଅ’ ଭାବେ ଯେଉଁ ଘିଅ ଯୋଗାଣ କରାଯାଇଥିଲା, ସେଥିରେ ଅପମିଶ୍ରଣ ହୋଇଥିବା ଅଭିଯୋଗ ରହିଛି। ଏହି ଘିଅ ପ୍ରସ୍ତୁତିରେ ରିଫାଇଣ୍ଡ ପାମ୍ ଅଏଲ୍, ପାମ୍ କର୍ଣ୍ଣେଲ୍ ଅଏଲ୍, ପାମୋଲିନ୍ ସହିତ ବିଭିନ୍ନ କେମିକାଲ୍ ବ୍ୟବହାର କରାଯାଇଥିବା ଇଡି ଦାବି କରିଛି। ଏଥିରେ MG-90, ମୋନୋଗ୍ଲିସେରାଇଡ୍, ମାଇଭାସେଟ୍ ସଫ୍ଟ ୪୦୦ ଏବଂ ଏସିଟିକ୍ ଏସିଡ୍ ଏଷ୍ଟର୍ ଭଳି ରାସାୟନିକ ପଦାର୍ଥ ବ୍ୟବହାର ହୋଇଥିବା ଏଜେନ୍ସି କହିଛି। ଏହାକୁ ପରେ ଗୋମାତାଙ୍କ କ୍ଷୀରରୁ ପ୍ରସ୍ତୁତ ଅସଲି ଘିଅ ଭାବେ ଟିଟିଡିକୁ ଯୋଗାଣ କରାଯାଇଥିବା ଅଭିଯୋଗ ହୋଇଛି।

ପଢନ୍ତୁ ଏହି ଖବର: ଆସିଲା ବଡ଼ ଖବର, ସ୍କୁଲ୍ ମିଡ୍-ଡେ ମିଲ୍‌ରେ ମିଳିବ ଚିକେନ୍ ବିରିୟାନୀ!

ଇଡି ଅନୁସାରେ, ୨୦୧୯ରୁ ୨୦୨୪ ମଧ୍ୟରେ ଟିଟିଡିକୁ ହୋଇଥିବା କଥିତ ଭୁଲ୍ ଘିଅ ଯୋଗାଣର ମୂଲ୍ୟ ପ୍ରାୟ ୨୩୦ କୋଟି ଟଙ୍କା ହେବ। ଏଥିରୁ ମଙ୍ଗଲା ତାଙ୍କ କାରଖାନାରେ ପ୍ରାୟ ୯୬ କୋଟି ଟଙ୍କାର ଅପମିଶ୍ରିତ ଘିଅ ପ୍ରସ୍ତୁତ କରିଥିବା ଏଜେନ୍ସି ଅଭିଯୋଗ କରିଛି।

ଇଡି ଆହୁରି ଅଭିଯୋଗ କରିଛି ଯେ, ମଙ୍ଗଲା ଏହି ଅପମିଶ୍ରିତ ଘିଅ ଯୋଗାଣ ପାଇଁ ବିଭିନ୍ନ ଆଗ ଧାଡ଼ିର ସଂସ୍ଥାର ସହାୟତା ନେଇଥିଲେ। ଏଥିରେ ଶ୍ରୀ ବୈଷ୍ଣବୀ ଡେୟରୀ ସ୍ପେସିଆଲିଟିଜ୍, ମାଲଗଙ୍ଗା ମିଲ୍କ ଆଣ୍ଡ ଏଗ୍ରୋ ପ୍ରଡକ୍ଟସ୍ ଏବଂ ଏ.ଆର୍. ଡେୟରୀ ଫୁଡ୍ସ ଭଳି ସଂସ୍ଥାର ନାଁ ରହିଛି।

ତଦନ୍ତକାରୀ ସଂସ୍ଥାର ଅଭିଯୋଗ ଅନୁସାରେ, ମଙ୍ଗଲା ଘିଅ ଓ ରିଫାଇନ୍ଡ ପାମ୍ ଅଏଲ୍ର କିଣାବିକା ନେଇ ମିଥ୍ୟା ରେକର୍ଡ ତିଆରି ଓ ସଂରକ୍ଷଣ କରିଥିଲେ। ଅପମିଶ୍ରିତ ପଦାର୍ଥର ପ୍ରକୃତ ବ୍ୟବହାରକୁ ଲୁଚାଇବା ଏବଂ ଅସଲି ଗୁଆ ଘିଅ ପ୍ରସ୍ତୁତ ଓ ଯୋଗାଣ କରାଯାଉଥିବା ଭଳି ଦେଖାଇବା ପାଇଁ ଏପରି ରେକର୍ଡ ପ୍ରସ୍ତୁତ ହୋଇଥିବା ଇଡି ଅଭିଯୋଗ କରିଛି।

ଏହି ମାମଲାରେ ଇଡି ପୂର୍ବରୁ ଭୋଲେ ବାବା ଅର୍ଗାନିକ୍ ଡେୟରୀ ମିଲ୍କର ପ୍ରମୋଟର ତଥା ନିର୍ଦ୍ଦେଶକ ବିପିନ ଜୈନଙ୍କୁ ମଧ୍ୟ ଗିରଫ କରିଥିଲା। ଏବେ କୈଳାଶ ଚନ୍ଦ୍ର ମଙ୍ଗଲାଙ୍କ ଗିରଫ ପରେ ତିରୁପତି ଲଡୁ ପ୍ରସାଦମ ପାଇଁ ଗୁଆ ଘିଅ ନାଁରେ ଯୋଗାଣ ହୋଇଥିବା ଘିଅରେ ଅପମିଶ୍ରିତ ପଦାର୍ଥ ବ୍ୟବହାର ନେଇ ତଦନ୍ତ ଆହୁରି ଆଗକୁ ବଢ଼ିଛି। ତେବେ ଏହି ମାମଲାରେ ଇଡିର ଅଭିଯୋଗଗୁଡ଼ିକ ତଦନ୍ତର ଅଂଶ ଏବଂ ଅଭିଯୁକ୍ତଙ୍କ ଦୋଷ କୋର୍ଟରେ ପ୍ରମାଣିତ ହେବା ବାକି ରହିଛି।