ତୃଣମୂଳ କଂଗ୍ରେସ ବିରୋଧରେ ବେଙ୍ଗଲରେ ତେଜୁଛି ଲୋକଙ୍କ ଅସନ୍ତୋଷ । ଅଭିଷେକ ବାନାର୍ଜୀଙ୍କ ପରେ ବେଙ୍ଗଲରେ ତୃଣମୂଳ କଂଗ୍ରେସର ଆଉ ଜଣେ ସାଂସଦଙ୍କୁ ଆକ୍ରମଣ ହୋଇଛି । ଶନିବାର ତୃଣମୂଳ କଂଗ୍ରେସର ଦ୍ୱିତୀୟ ସର୍ବୋଚ୍ଚ ନେତା ଅଭିଷେକ ବାନାର୍ଜୀଙ୍କୁ ଜନଗହଳି ମଧ୍ୟରେ ଆକ୍ରମଣ କରାଯିବାର ମାତ୍ର ଦିନକ ପରେ, ଆଜି ସକାଳେ ପଶ୍ଚିମବଙ୍ଗରେ ଦଳର ଆଉ ଜଣେ ସାଂସଦ ନିଜ ନିର୍ବାଚନ ମଣ୍ଡଳୀରେ ଆକ୍ରମଣର ଶିକାର ହୋଇଛନ୍ତି ।

ହୁଗୁଳିର ଚଣ୍ଡୀତଲା ଅଞ୍ଚଳରେ ଟିଏମସି ସାଂସଦ କଲ୍ୟାଣ ବାନାର୍ଜୀଙ୍କ ମୁଣ୍ଡକୁ ଆକ୍ରମଣ ହୋଇଥିବା ସୂଚନା ମିଳିଛି । ତାଙ୍କୁ କଳା ପତାକା ପ୍ରଦର୍ଶନ କରାଯିବା ସହ ‘ଚୋର ଚୋର’ ସ୍ଲୋଗାନର ମଧ୍ୟ ସାମ୍ନା କରିବାକୁ ପଡ଼ିଥିଲା । ସୋନାରପୁର ଘଟଣାକୁ ବିରୋଧ କରି କଲ୍ୟାଣ ବାନାର୍ଜୀ ଏବଂ ତାଙ୍କ ସମର୍ଥକମାନେ ଚଣ୍ଡୀତଲାରେ ବିକ୍ଷୋଭ ପ୍ରଦର୍ଶନ କରୁଥିବା ସମୟରେ ତାଙ୍କ ଉପରକୁ ଏହି ଆକ୍ରମଣ ହୋଇଥିଲା । ପୋଲିସ ଘଟଣା ସ୍ଥଳରେ ପହଞ୍ଚି ଭିଡ଼ ନିୟନ୍ତ୍ରଣ ସହ ସାଂସଦ କଲ୍ୟାଣ ବାନାର୍ଜୀଙ୍କୁ ଉଦ୍ଧାର କରିଥିଲା ।

#WATCH | Hooghly, West Bengal: TMC MP Kalyan Banerjee was allegedly attacked near Chanditala Police Station when he came to submit a deputation regarding post-poll violence.

More details awaited. pic.twitter.com/47XaGsbL0q

— ANI (@ANI) May 31, 2026

ସୂଚନା ଅନୁସାରେ, ଶନିବାର ଟିଏମସି ସାଧାରଣ ସମ୍ପାଦକ ତଥା ସାଂସଦ ଅଭିଷେକ ବାନାର୍ଜୀଙ୍କୁ ଗୋଡ଼େଇ ପିଟିଥିଲେ ଲୋକେ । ପଶ୍ଚିମବଙ୍ଗର ଦକ୍ଷିଣ ୨୪ ପ୍ରଗଣା ଜିଲ୍ଲାର ସୋନାରପୁରଠାରେ ଭୟାବହ ଆକ୍ରମଣ କରାଯାଇଥିଲା । ନିର୍ବାଚନ ପରବର୍ତ୍ତୀ ହିଂସାର ଶିକାର ହୋଇଥିବା ଜଣେ ଦଳୀୟ କର୍ମୀଙ୍କ ପରିବାରକୁ ଭେଟିବାକୁ ଯାଇଥିବା ସମୟରେ ସ୍ଥାନୀୟ ଲୋକେ ତାଙ୍କୁ ଘେରି ଯାଇଥିଲେ । ଉତ୍ତ୍ୟକ୍ତ ଲୋକେ ତାଙ୍କ ବିରୋଧରେ ସ୍ଲୋଗାନ ଦେବା ସହ ଅଣ୍ଡା, ପଥର ଏବଂ ଜୋତା ମାଡ଼ କରିଥିଲେ। ଏହି ସଂଘର୍ଷରେ ଅଭିଷେକଙ୍କ ସାର୍ଟ ଚିରି ଯାଇଥିବା ବେଳେ ମୁଣ୍ଡକୁ ରକ୍ଷା କରିବା ପାଇଁ ସେ ହେଲମେଟ ପିନ୍ଧିଥିବା ଦେଖିବାକୁ ମିଳିଥିଲା। ଅଭିଷେକ ବାନାର୍ଜୀ ଏହାକୁ ବିରୋଧୀଙ୍କ ପ୍ରାୟୋଜିତ ଆକ୍ରମଣ ବୋଲି କହିବା ସହ "ସେମାନେ ମୋତେ ଜୀବନରୁ ମାରିଦେବାକୁ ଚାହୁଁଛନ୍ତି" ବୋଲି ଅଭିଯୋଗ କରିଛନ୍ତି ।