ସ୍ବାମୀ-ସ୍ତ୍ରୀର ସମ୍ପର୍କକୁ ନେଇ ସାମ୍ନାକୁ ଆସିଛି ଏକ ଅଜବ ମାମଲା । ଶ୍ବଶୁର ଘର ଲୋକ ୫୦ ଲକ୍ଷ ଅଧିକ ଯୌତୁକ ନ ଦେବାରୁ ସ୍ତ୍ରୀକୁ ସ୍ବାମୀ ବିଭିନ୍ନ ପ୍ରକାର ନିର୍ଯାତନା ଦେଉଥିବା ଅଭିଯୋଗ ହୋଇଛି । ସୋନାଲି ଗୁପ୍ତା (ଛଦ୍ମନାମ) ନାମ୍ନୀ ଜଣେ ମହିଳା ତାଙ୍କ ସ୍ୱାମୀ ଶିବମ ଗୁପ୍ତା ଏବଂ ତାଙ୍କ ଶ୍ୱଶୁର ଘର ଲୋକଙ୍କ ବିରୋଧରେ ଏକ ଯୌତୁକ
ନିର୍ଯାତନା ମାମଲା ଦାୟର କରିଛନ୍ତି । ଉତ୍ତର ପ୍ରଦେଶର ମୈନପୁରୀ ସଦର କୋତୱାଲି ଅଞ୍ଚଳରେ ଏଭଳି ଏକ ଘଟଣା ଘଟିଛି ।

ସୋନାଲି ଫେବୃଆରୀ ୧୯, ୨୦୨୪ରେ ଏଟାର ବାସିନ୍ଦା ଶିବମଙ୍କ ସହିତ ବିବାହ କରିଥିଲେ, ଯିଏ ଏକ ଘରୋଇ କମ୍ପାନୀରେ ମାସିକ ଅଢେଇ ଲକ୍ଷ ଦରମା ପାଆନ୍ତି । ଯଥେଷ୍ଟ ଯୌତୁକ ଦେବା ସତ୍ତ୍ୱେ ମଧ୍ୟ ଶିବମ ଆଉ ୫୦ ଲକ୍ଷ ଟଙ୍କା ଦାବି କରିଥିଲେ । ଏହି ଦାବି ପୂରଣ କରିବାରେ ସୋନାଲିଙ୍କ ପରିବାର ଲୋକେ ଅସମର୍ଥ ହୋଇଥିଲେ । ଆଉ ତା’ପରେ ଆରମ୍ଭ ହୋଇଗଲା ନୂଆ ଟ୍ବିଷ୍ଟ ।

ପୀଡିତାଙ୍କୁ ଶାରୀରିକ ଏବଂ ମାନସିକ ନିର୍ଯାତନା ଦେବା ଆରମ୍ଭ ହୋଇଗଲା । ଯେତେବେଳେ ପୀଡିତା ତାଙ୍କ ସ୍ୱାମୀଙ୍କ ଆଚରଣ ଉପରେ ସନ୍ଦେହ କରି ଆଗ୍ରାରେ ଥିବା ସେମାନଙ୍କ ଭଡା ଘରେ କ୍ୟାମେରା ଲଗାଇଥିଲେ, ସେତେବେଳେ ସେ ଯାହା ଦେଖିଲେ ତାଙ୍କ ପାଦତଳୁ ମାଟି ଖସିଗଲା । ସେ ତାଙ୍କ ସ୍ବାମୀଙ୍କର ଅପ୍ରାକୃତିକ କାର୍ଯ୍ୟକଳାପ ବିଷୟରେ ଜାଣିବାକୁ ପାଇଲେ । ସେ ସେହି ଭଡ଼ା ଘରକୁ ପୁଅମାନଙ୍କୁ ଡକାଇ ସେମାନଙ୍କ ସହ ଯୌନ ସମ୍ପର୍କ ରଖୁଥିଲେ । ଭିଡିଓ ଦେଖିବା ପରେ ସୋନାଲି ଯେତେବେଳେ ଏହାର ପ୍ରତିବାଦ କଲେ, ସେ ତାଙ୍କୁ ହତ୍ୟା କରିବାକୁ ଧମକ ଦେଲେ ।

ଶେଷରେ ଆଉ ସହି ନ ପାରି ଶିବମଙ୍କ ପତ୍ନୀ ପୋଲିସ ଷ୍ଟେସନର ଦ୍ବାରସ୍ଥ ହୋଇଥିଲେ । ସୋନାଲି ଅଭିଯୋଗ କରିଛନ୍ତି ଯେ ଯେତେବେଳେ ସେ ପ୍ରଥମେ ସଦର ପୋଲିସ ଷ୍ଟେସନକୁ ତାଙ୍କ ଅଭିଯୋଗ ନେଇ ଯାଇଥିଲେ, ପୋଲିସ ତାଙ୍କ ରିପୋର୍ଟ ରେଜିଷ୍ଟର କରିନଥିଲା । ତାଙ୍କୁ ନ୍ୟାୟ ମିଳୁ ନଥିବା ଦେଖି ସେ ଜିଲ୍ଲାର ଉଚ୍ଚ ଅଧିକାରୀଙ୍କ ନିକଟରେ ଏକ ଆବେଦନ ଦାଖଲ କରି ତାଙ୍କ ସୁରକ୍ଷା ଏବଂ ଦୋଷୀଙ୍କ ବିରୁଦ୍ଧରେ କାର୍ଯ୍ୟାନୁଷ୍ଠାନ ପାଇଁ ଆବେଦନ କରିଥିଲେ । ବର୍ତ୍ତମାନ ଅଧିକାରୀଙ୍କ ନିର୍ଦ୍ଦେଶକ୍ରମେ ପୋଲିସ ମାମଲାର ଗମ୍ଭୀରତାକୁ ବିଚାର କରି ତଦନ୍ତ ଆରମ୍ଭ କରିଛି ।