Senior Women Free Travel / ଯୋଗୀ ସରକାରଙ୍କ ବଡ଼ ଘୋଷଣା, ଏହି ମହିଳାଙ୍କ ପାଇଁ ବସ୍ ଯାତ୍ରା ସମ୍ପୂର୍ଣ୍ଣ ମାଗଣା

ରାକ୍ଷୀ ପୂର୍ଣ୍ଣିମା ପୂର୍ବରୁ ଉତ୍ତରପ୍ରଦେଶର ମହିଳାଙ୍କ ପାଇଁ ଖୁସି ଖବର । ଯୋଗୀ ସରକାରଙ୍କ କ୍ୟାବିନେଟ୍ ବୈଠକରେ ମୋଟ ୨୪ଟି ପ୍ରସ୍ତାବକୁ ମଞ୍ଜୁରୀ ମିଳିଥିବା ବେଳେ, ସେଥିମଧ୍ୟରୁ ୬୦ ବର୍ଷରୁ ଅଧିକ ବୟସର ମହିଳାଙ୍କ ପାଇଁ ରହିଛି ବଡ଼ ଘୋଷଣା । ଏଣିକି ଉତ୍ତରପ୍ରଦେଶ ରୋଡୱେଜ୍ ବସ୍‌ରେ ଏହି ବୟସ ବର୍ଗର ମହିଳାମାନେ ମାଗଣାରେ ଯାତ୍ରା କରିପାରିବେ ।

ସରକାରଙ୍କ ସୂଚନା ଅନୁସାରେ, ମୁଖ୍ୟମନ୍ତ୍ରୀ ଯୋଗୀ ଆଦିତ୍ୟନାଥ ବୁଧବାର ଏହି ଯୋଜନାର ଶୁଭାରମ୍ଭ କରିବେ । ଯୋଜନା ଲାଗୁ ହେବା ପରେ ୬୦ ବର୍ଷରୁ ଅଧିକ ବୟସର ମହିଳାଙ୍କୁ ରୋଡୱେଜ୍ ବସ୍‌ରେ ଯାତ୍ରା ପାଇଁ ଆଉ ଭଡ଼ା ଦେବାକୁ ପଡ଼ିବ ନାହିଁ । ଏହି ସୁବିଧା ପାଇଁ ମହିଳାମାନଙ୍କୁ ନିଜ ବୟସ ପ୍ରମାଣପତ୍ର ପାଇଁ ଆଧାର କାର୍ଡ କିମ୍ବା ଭୋଟର ଆଇଡି ଦେଖାଇବାକୁ ପଡ଼ିବ ।

ଏହି ଯୋଜନାକୁ ‘ଲୋକମାତା ଅହିଲ୍ୟାବାଇ ମାତୃଶକ୍ତି ଯୋଜନା’ ନାମରେ ମଞ୍ଜୁରୀ ଦିଆଯାଇଛି । ପରିବହନ ମନ୍ତ୍ରୀ ଦୟାଶଙ୍କର ସିଂହଙ୍କ କହିବା ଅନୁସାରେ, ୬୦ ବର୍ଷରୁ ଅଧିକ ବୟସର ମହିଳାମାନେ ପରିବହନ ନିଗମର ସମସ୍ତ ବସ୍‌ରେ ଆଜୀବନ ନିଃଶୁଳ୍କ ଯାତ୍ରାର ସୁବିଧା ପାଇବେ । ଏହାଦ୍ୱାରା ପ୍ରାୟ ଏକ କୋଟିରୁ ଅଧିକ ମହିଳା ଉପକୃତ ହେବେ ବୋଲି ସରକାର କହିଛି ।

ବିଶେଷ କଥା ହେଉଛି, ୨୦୨୨ ଉତ୍ତରପ୍ରଦେଶ ବିଧାନସଭା ନିର୍ବାଚନ ସମୟରେ ବିଜେପି ୬୦ ବର୍ଷରୁ ଅଧିକ ବୟସର ମହିଳାଙ୍କୁ ମାଗଣା ବସ୍ ଯାତ୍ରାର ପ୍ରତିଶ୍ରୁତି ଦେଇଥିଲା । ଏବେ କ୍ୟାବିନେଟ୍ ମଞ୍ଜୁରୀ ପରେ ସେହି ପ୍ରତିଶ୍ରୁତି ଯୋଜନାର ରୂପ ନେଇଛି । ୨୦୧୧ ଜନଗଣନା ଆଧାରରେ ପ୍ରାୟ ୮୧ ଲକ୍ଷ ମହିଳା ଏହି ସୁବିଧା ପାଇପାରନ୍ତି ।

କେବଳ ମହିଳାଙ୍କ ପାଇଁ ମାଗଣା ଯାତ୍ରା ନୁହେଁ, ପରିବହନ ବିଭାଗ ପାଇଁ ମଧ୍ୟ କ୍ୟାବିନେଟ୍ ଏକ ବଡ଼ ନିଷ୍ପତ୍ତି ନେଇଛି । ୨୫୦ଟି ଇଲେକ୍ଟ୍ରିକ୍ ବସ୍ କିଣିବାକୁ ମଞ୍ଜୁରୀ ମିଳିଛି। ଏହି ବସ୍‌ଗୁଡ଼ିକ ୪୨ ଓ ୫୨ ସିଟ୍ ବିଶିଷ୍ଟ ହେବ ।

ସେପଟେ ରକ୍ଷାବନ୍ଧନ ଅବସରରେ ମଧ୍ୟ ଉତ୍ତରପ୍ରଦେଶରେ ମହିଳାଙ୍କୁ ମାଗଣା ବସ୍ ଯାତ୍ରାର ସୁବିଧା ମିଳିବ । ମୁଖ୍ୟମନ୍ତ୍ରୀ ଯୋଗୀ ଆଦିତ୍ୟନାଥଙ୍କ ନିର୍ଦ୍ଦେଶ ଅନୁସାରେ ୨୭ ଅଗଷ୍ଟ ସକାଳ ୬ଟାରୁ ୨୯ ଅଗଷ୍ଟ ରାତି ୧୨ଟା ପର୍ଯ୍ୟନ୍ତ ପରିବହନ ନିଗମର ବସ୍‌ରେ ମହିଳାମାନେ ନିଃଶୁଳ୍କ ଯାତ୍ରା କରିପାରିବେ ।