Fake IAS Groom / ମାଟ୍ରିମୋନିର IAS ବର ବାହାରିଲା ନକଲି; ମିଛ ଫଟୋ ଦେଖାଇ ଠକିଥିଲା, କରିଥାନ୍ତା ତୃତୀୟ ବିବାହ

ମାଟ୍ରୋମୋନିରେ ନିଜକୁ ଆଇଏଏସ ଅଫିସର ବୋଲି ଦର୍ଶାଇଥିଲା । ଇଣ୍ଟରଭ୍ୟୁ, ଅଫିସ ଓ କିଛି ନେତାଙ୍କ ସହିତ ମିଛ ଫଟୋ ମଧ୍ୟ ପୋଷ୍ଟ କରିଥିଲା । ଆଉ ବିବାହ କରିବାଠୁ ଆରମ୍ଭ କରି ଝିଅ ଘରୁ ଲକ୍ଷ ଲକ୍ଷ ଟଙ୍କା ଠକିବାରେ ସଫଳ ମଧ୍ୟ ହୋଇଥିଲା । ବିବାହ ପରେ ସ୍ତ୍ରୀକୁ ଗୋଆରେ ବିକ୍ରି କରି ତୃତୀୟ ବିବାହ କରିବାକୁ ଯୋଜନା କରିଥିଲା । କିନ୍ତୁ ଶେଷରେ ନକଲି ବରର ପର୍ଦ୍ଦାଫାଶ ହୋଇଛି । ଗିରଫ କରିଛି ଉତ୍ତରପ୍ରଦେଶ ଗୋରଖପୁର ପୋଲିସ ।

• ନିର୍ବନ୍ଧ ନକରି ଆଦାୟ କରିଥିଲା ୧୫ ଲକ୍ଷ

ଉତ୍ତରପ୍ରଦେଶର ଇଟାୱା ଜିଲ୍ଲାର ଅଧିବାସୀ ପ୍ରୀତମ କୁମାର ନିଶାଦ ନିଜକୁ IAS ଅଧିକାରୀ ବୋଲି ପରିଚୟ ଦେଇ ମାର୍ଚ୍ଚ ୧୧ ତାରିଖରେ ଜଣେ ଝିଅକୁ ବିବାହ କରିଥିଲା । ସେ ନିର୍ବନ୍ଧ ନକରି ଏହା ବଦଳରେ ଝିଅର ପରିବାରଠାରୁ ୧୫ ଲକ୍ଷ ଟଙ୍କା ଆଦାୟ କରିଥିଲା । ବିବାହ ପାଇଁ ପ୍ରାୟ ୩୦ ଲକ୍ଷ ଟଙ୍କା ଖର୍ଚ୍ଚ କରିଥିଲେ ଝିଅ ପକ୍ଷ ।

• ପୂର୍ବରୁ କରିଛି ୨ଥର ବିବାହ

ଅଭିଯୁକ୍ତ ଜଣକ ନିଜକୁ IAS ଅଧିକାରୀ ବୋଲି ପରିଚୟ ଦେଇ ପୂର୍ବରୁ ଦୁଇଥର ବିବାହ କରିସାରିଛି । ଏହା ତାର ତୃତୀୟ ବିବାହ ଥିଲା । ଘଟଣା ସାମ୍ନାକୁ ଆସିବା ପରେ ସେ ପରିବାର ସହ ଏବେ ଫେରାର ଅଛି । ପୋଲିସ ନକଲି IAS ଅଧିକାରୀ ଏବଂ ତାର ପରିବାର ବିରୁଦ୍ଧରେ ମାମଲା ରୁଜୁ କରି ସେମାନଙ୍କୁ ଖୋଜାଖୋଜି ଆରମ୍ଭ କରିଛି ।

• କଣ ପୁରା ଘଟଣା ?

ଗୋରଖପୁରର କ୍ୟାଣ୍ଟନମେଣ୍ଟ ପୋଲିସ ଷ୍ଟେସନ ଅଞ୍ଚଳ ଅନ୍ତର୍ଗତ ମୋହାଦ୍ଦିପୁରରେ ରହୁଥିବା ଯୁବତୀଙ୍କ ବାପା ପୋଲିସକୁ କହିଛନ୍ତି ଯେ ସେ ତାଙ୍କ ଝିଅ ପାଇଁ ଏକ ଉପଯୁକ୍ତ ବରପାତ୍ର ଖୋଜୁଥିଲେ । ଏହାରି ମଧ୍ୟରେ ସେ ଏକ ନିଷାଦ ବିବାହ ଗ୍ରୁପ୍ ମାଧ୍ୟମରେ ଅଭିଯୁକ୍ତ ପ୍ରୀତମର ବାୟୋଡାଟା ପାଇଥିଲେ । ପ୍ରୀତମ ଇଟାୱାର ଇକଡିଲ ପୋଲିସ ଷ୍ଟେସନ ଅଞ୍ଚଳ ଅନ୍ତର୍ଗତ ଲୁଧିୟାତ ମୋହଲ୍ଲାର ବାସିନ୍ଦା ଏବଂ ନିଜକୁ ଶିବପାଲ ସିଂହ ନିଶାଦଙ୍କ ପୁଅ ବୋଲି କହିଥିଲା ।

ପଢନ୍ତୁ ଏହି ଖବର: କ୍ୟାବିନ କ୍ରୁଙ୍କ ପାଇଁ ଆସିଲା କଡ଼ା ନିୟମ; ଟିକେ ଓଜନ ଏପଟ ସେପଟ ହେଲେ କଟିବ ଦରମା

କନିଆଁ ପକ୍ଷ କହିଛନ୍ତି ଯେ ଯେତେବେଳେ ସେମାନେ ପ୍ରୀତମକୁ ଯୋଗାଯୋଗ କରିଥିଲେ, ସେ ନିଜକୁ ଜଣେ IAS ଅଧିକାରୀ ଭାବରେ ପରିଚୟ ଦେଇଥିଲା ଏବଂ ମାଣିକପୁରରେ ପୋଷ୍ଟିଂ ହୋଇଥିବା କହିଥିଲା । ବରପକ୍ଷଙ୍କ ଭରସା ଜିତିବା ପାଇଁ ସେ କାର୍ଯ୍ୟାଳୟରେ ଏବଂ କିଛି ରାଜନେତାଙ୍କ ସହ ନିଜର ଫଟୋ ଏବଂ ଭିଡିଓ ପଠାଇଥିଲା । ଖାଲି ସେତିକି ନୁହେଁ ନ୍ୟୁଜ୍ ଚ୍ୟାନେଲରେ ଦେଇଥିବା କଥିତ ସାକ୍ଷାତକାର ମଧ୍ୟ ପଠାଇଥିଲା ।

• ନିର୍ବନ୍ଧ ପୂର୍ବରୁ ହଡ଼ପ କରିଥିଲା ଲକ୍ଷ ଲକ୍ଷ ଟଙ୍କା

କଥାବାର୍ତ୍ତା ସମୟରେ, ନକଲି IAS ଅଧିକାରୀ ପ୍ରୀତମ କହିଥିଲା ଯେ ସେ ଯୌତୁକ ବିନା ବିବାହ କରିବ, କିନ୍ତୁ ଝିଅଟି ତାର ପସନ୍ଦର ହେବା ଉଚିତ । ପରିବାର ତାର ଫାଶରେ ପଡ଼ି ବିବାହ ସ୍ଥିର କଲେ । ନିର୍ବନ୍ଧର ୩ ଦିନ ପୂର୍ବରୁ ପ୍ରୀତମ ନିଜର ଅସଲ ରୂପ ଦେଖାଇଥିଲା । ନିର୍ବନ୍ଧ ବଦଳରେ ୧୫ ଲକ୍ଷ ଟଙ୍କା ଦେବାକୁ ଝିଅ ପକ୍ଷ ନିକଟରେ ଦାବି କରିଥିଲା । ସେ ଏହା ମଧ୍ୟ ସ୍ପଷ୍ଟ କରିଥିଲା ଯେ ଯଦି ଟଙ୍କା ନ ଦିଆଯାଏ, ତେବେ ସେ ବିବାହ କରିବ ନାହିଁ । ଝିଅ ପରିବାର ବ୍ୟସ୍ତ ହୋଇ ନିର୍ବନ୍ଧ ଦିନ ପ୍ରୀତମକୁ ୧୦ ଲକ୍ଷ ଟଙ୍କା ନଗଦ ଦେବାକୁ ବାଧ୍ୟ ହୋଇଥିଲେ । ବାକି ୫ ଲକ୍ଷ ଟଙ୍କା ବିବାହ ଦିନ ଦେବେ ବୋଲି କହିଥିଲେ ।

• କେମିତି ଜଣାପଡ଼ିଲା ସତ ?

ଗତ ମାର୍ଚ୍ଚ ୧୨ ତାରିଖରେ ପ୍ରୀତମ ସହିତ ଯୁବତୀଙ୍କ ବିବାହ ହୋଇଥିଲା । ବିଦାଈ ପରେ ସତ କହିଥିଲେ ବାହାଘରକୁ ଆସିଥିବା ଜଣେ ବ୍ୟକ୍ତି । ପ୍ରୀତମ କୌଣସି ଆଇଏଏସ ଅଫିସର ନୁହେଁ ବୋଲି ସେ କହିଥିଲେ । ଏହାପରେ ସେ ପ୍ରୀତମର ଠିକଣା ଦେଇଥିଲେ । ଯୁବତୀଙ୍କ ପରିବାର ଲୋକେ ଉକ୍ତ ଠିକଣାରେ ପହଞ୍ଚିବା ପରେ ଏକ ଛୋଟଘରେ ଯୁବତୀଙ୍କୁ ଉଦ୍ଧାର କରିଥିଲେ । ଅନ୍ୟପଟେ ପ୍ରୀତମ ଓ ତାର ପରିବାର ଘଟଣାସ୍ଥଳରୁ ଫେରାର ହୋଇଯାଇଥିଲା । ଯୁବତୀଙ୍କ ଅଭିଯୋଗ ଅନୁସାରେ ପ୍ରୀତମ ତାଙ୍କୁ ଗୋଆରେ ବିକ୍ରି କରିବାକୁ ଯୋଜନା ମଧ୍ୟ କରିଥିଲା ।