Woman Climbs Mobile Tower / ପ୍ରେମ ପାଇଁ ଟାୱାର ଉପରେ ଚଢ଼ିଲେ ଯୁବତୀ, ପୋଲିସ ଉପସ୍ଥିତିରେ ହେଲା ଅନଲାଇନ୍ ବିବାହ

ଉତ୍ତରପ୍ରଦେଶର ବହରାଇଚ ଜିଲ୍ଲାରେ ଏକ ଅଜବ ପ୍ରେମ କାହାଣୀ ଦେଖିବାକୁ ମିଳିଛି । ଯାହାକୁ ଦେଖିବାକୁ ପାଇଁ ଗାଁରେ ଲୋକଙ୍କ ଭିଡ଼ ଜମିଥିଲା । ପ୍ରେମିକ ମୁମ୍ବାଇରେ ଥିବାବେଳେ ପ୍ରେମିକା ବିବାହ ଜିଦି କରି ପ୍ରାୟ ୧୦୦ ଫୁଟ୍ ଉଚ୍ଚ ମୋବାଇଲ୍ ଟାୱାର ଉପରକୁ ଚଢ଼ିଯାଇଥିଲେ । ପରିବାର ଲୋକେ ଏହି ବିବାହ ପାଇଁ ରାଜି ନଥିବାରୁ ସେ ଏଭଳି ପଦକ୍ଷେପ ନେଇଥିଲେ । ପୋଲିସ ବହୁ ବୁଝାସୁଝା କରିବା ପରେ ଶେଷରେ କାଜିଙ୍କୁ ଡକାଯାଇ ମୁମ୍ବାଇରେ ଥିବା ପ୍ରେମିକଙ୍କ ସହ ଅନଲାଇନ୍‌ରେ ବିବାହ କରାଯାଇଥିଲା । ଏହାପରେ ଯୁବତୀ ଜଣକ ଟାୱାରରୁ ତଳକୁ ଓହ୍ଲାଇଥିଲେ ।

କ’ଣ ରହିଛି ପୂରା ଘଟଣା ?

ଏହି ଘଟଣା ଉତ୍ତରପ୍ରଦେଶର ବହରାଇଚ୍ ଜିଲ୍ଲା ଅନ୍ତର୍ଗତ ମୋତିପୁର ଥାନା ଅଞ୍ଚଳର ଚୌଧୁରୀ ଗାଁରେ ଘଟିଛି । ଅକ୍ଟୋବର ୨୩ ତାରିଖରେ ଏହି ଘଟଣାଟି ଘଟିଥିଲା । ପୋଲିସ ଓ ସ୍ଥାନୀୟ ଲୋକଙ୍କ ଉପସ୍ଥିତିରେ ଦୀର୍ଘ ସମୟ ଧରି ଏହି ହାଇଭୋଲଟେଜ୍‌ ଡ୍ରାମା ଚାଲିଥିଲା ।
ମୋତିପୁର ଥାନା ଅଞ୍ଚଳର ବସ୍ଥନୱା ଗାଁର ଜଣେ ଯୁବତୀଙ୍କର ନିଜ ଗାଁର ନୁରୁଦ୍ଦିନ୍ ନାମକ ଯୁବକଙ୍କ ସହ ଦୀର୍ଘ ଦିନ ଧରି ପ୍ରେମ ସମ୍ପର୍କ ରହିଥିଲା । ଦୁହେଁ ବିବାହ କରିବାକୁ ଚାହୁଁଥିଲେ । କିନ୍ତୁ ଉଭୟ ପରିବାର ଏହି ସମ୍ପର୍କକୁ ନେଇ ରାଜି ନଥିଲେ ।

ପ୍ରେମିକ ମୁମ୍ବାଇରେ, ପ୍ରେମିକା ଟାୱାର ଉପରେ

ନୁରୁଦ୍ଦିନ୍ କାମ କରିବା ପାଇଁ ମୁମ୍ବାଇରେ ରହୁଥିଲେ । ଅନ୍ୟପଟେ, ପରିବାରର ଅସହମତିକୁ ନେଇ ଚିନ୍ତିତ ଥିବା ଯୁବତୀ ଜଣକ ଏଭଳି ପଦକ୍ଷେପ ନେଇଥିଲେ, ଯାହାକୁ ନେଇ ପୂରା ଅଞ୍ଚଳରେ ହଇଚଇ ସୃଷ୍ଟି ହୋଇଥିଲା । ସେ ଚୌଧୁରୀ ଗାଁରେ ଥିବା ବିଏସ୍‌ଏନ୍‌ଏଲ୍‌ (BSNL) ମୋବାଇଲ୍ ଟାୱାର ଉପରକୁ ଚଢ଼ିଯାଇ ବିବାହ କରିବାକୁ ଦାବି କରିଥିଲେ । ଟାୱାରଟି ପ୍ରାୟ ୧୦୦ ଫୁଟ୍ ଉଚ୍ଚ ଥିବାରୁ ଯୁବତୀଙ୍କୁ ଏଭଳି ବିପଜ୍ଜନକ ସ୍ଥାନରେ ଦେଖି ତଳେ ଲୋକଙ୍କ ଭିଡ଼ ଜମିଥିଲା ।

ଘଟଣାସ୍ଥଳରେ ପହଞ୍ଚିଲା ପୋଲିସ

ଘଟଣା ବିଷୟରେ ସୂଚନା ପାଇ ପୋଲିସ ତୁରନ୍ତ ସେଠାରେ ପହଞ୍ଚିଥିଲା । ଯୁବତୀଙ୍କୁ ସୁରକ୍ଷିତ ଭାବେ ତଳକୁ ଓହ୍ଲାଇବା ପାଇଁ ପୋଲିସ ବହୁତ ବୁଝାସୁଝା କରିଥିଲା । କିନ୍ତୁ ବିବାହ ଦାବି ପୂରଣ ନହେବା ପର୍ଯ୍ୟନ୍ତ ସେ ତଳକୁ ଓହ୍ଲାଇବାକୁ ରାଜି ହୋଇନଥିଲେ ।

ଏଭଳି ପରିସ୍ଥିତିରେ ପୋଲିସ ସମ୍ମୁଖରେ ଦୁଇଟି ବଡ଼ ଚ୍ୟାଲେଞ୍ଜ ଥିଲା । ପ୍ରଥମଟି ହେଉଛି ଯୁବତୀଙ୍କୁ ସୁରକ୍ଷିତ ଭାବେ ତଳକୁ ଓହ୍ଲାଇବା ଏବଂ ଦ୍ୱିତୀୟଟି ହେଉଛି ଯେଉଁ କାରଣରୁ ସେ ଟାୱାର ଉପରକୁ ଚଢ଼ିଥିଲେ, ସେହି ବିବାଦର ସମାଧାନ କରିବା ।

ପୋଲିସର ମଧ୍ୟସ୍ଥତାରେ ହେଲା ଅନଲାଇନ୍ ନିକାହ

ପରିସ୍ଥିତିକୁ ନିୟନ୍ତ୍ରଣ କରିବା ପାଇଁ ପୋଲିସ ଉଭୟ ପରିବାର ସହ ଆଲୋଚନା କରିଥିଲା । ଦୀର୍ଘ ସମୟର ଚେଷ୍ଟା ପରେ ପରିବାର ଲୋକଙ୍କୁ ବିବାହ ପାଇଁ ରାଜି କରାଯାଇଥିଲା ।

ଏହାପରେ ଟାୱାର ତଳକୁ କାଜିଙ୍କୁ ଡକାଯାଇଥିଲା । ଯୁବତୀ ବହରାଇଚ୍‌ରେ ଥିବାବେଳେ ତାଙ୍କ ପ୍ରେମିକ ନୁରୁଦ୍ଦିନ୍ କାମ ପାଇଁ ମୁମ୍ବାଇରେ ଥିଲେ । ତେଣୁ ଦୁହିଁଙ୍କ ବିବାହ ପାଇଁ ଅନଲାଇନ୍ ନିକାହର ବ୍ୟବସ୍ଥା କରାଯାଇଥିଲା ।

କାଜିଙ୍କ ଉପସ୍ଥିତିରେ ଅନଲାଇନ୍‌ରେ ନିକାହର ରୀତିନୀତି ସମ୍ପନ୍ନ କରାଯାଇଥିଲା । ଏହାପରେ ପୋଲିସ ଓ ଅନ୍ୟମାନେ ଯୁବତୀଙ୍କୁ ଟାୱାରରୁ ତଳକୁ ଓହ୍ଲାଇବା ପାଇଁ ବୁଝାଇଥିଲେ । ଶେଷରେ ଅନେକ ଚେଷ୍ଟା ପରେ ସେ ସୁରକ୍ଷିତ ଭାବେ ତଳକୁ ଓହ୍ଲାଇଥିଲେ ।