୪ ଦିନିଆ ଭାରତ ଗସ୍ତରେ ଆମେରିକା ବିଦେଶ ସଚିବ ମାର୍କୋ ରୁବିଓ । ଗସ୍ତର ପ୍ରଥମ ଦିନରେ ମାର୍କୋ ରୁବିଓ ଦିଲ୍ଲୀରେ ପହଞ୍ଚିବା ପରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କୁ ସାକ୍ଷାତ କରିଛନ୍ତି । ଏହି ହାଇ-ପ୍ରୋଫାଇଲ୍ ବୈଠକରେ ଭାରତ ଓ ଆମେରିକା ମଧ୍ୟରେ ଚାଲିଥିବା ରଣନୈତିକ ସହଭାଗିତାର ସମ୍ପୂର୍ଣ୍ଣ ସମୀକ୍ଷା କରାଯାଇଛି । ସେହିପରି ବିଦେଶ ସଚିବ ମାର୍କୋ ରୁବିଓ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କୁ ଆମେରିକା ଗସ୍ତ ପାଇଁ ନିମନ୍ତ୍ରଣ କରିଛନ୍ତି । ରୁବିଓ ରାଷ୍ଟ୍ରପତି ଡୋନାଲ୍ଡ ଟ୍ରମ୍ପଙ୍କ ପକ୍ଷରୁ ପ୍ରଧାନମନ୍ତ୍ରୀ ମୋଦିଙ୍କୁ ହ୍ୱାଇଟ୍ ହାଉସ୍ ଗସ୍ତ କରିବା ପାଇଁ ନିମନ୍ତ୍ରଣ କରିଛନ୍ତି ।

ଆମେରିକା ବିଦେଶ ସଚିବ ମାର୍କୋ ରୁବିଓ ପ୍ରଧାନମନ୍ତ୍ରୀ ମୋଦିଙ୍କୁ ପ୍ରତିରକ୍ଷା ସହଯୋଗ, ଗୁରୁତ୍ୱପୂର୍ଣ୍ଣ ଓ ରଣନୈତିକ ପ୍ରଯୁକ୍ତିବିଦ୍ୟା (Strategic Technologies), ବାଣିଜ୍ୟ, ନିବେଶ, ଶକ୍ତି ସୁରକ୍ଷା ଏବଂ କନେକ୍ଟିଭିଟି କ୍ଷେତ୍ରରେ ହୋଇଥିବା ଅଗ୍ରଗତି ସମ୍ପର୍କରେ ସୂଚନା ଦେଇଛନ୍ତି । ଖାଲି ସେତିକି ନୁହେଁ, ବୈଠକରେ ଆମେରିକା ପକ୍ଷରୁ ମଧ୍ୟ-ପ୍ରାଚ୍ୟରେ ଉପୁଜିଥିବା ଯୁଦ୍ଧ ପରିସ୍ଥିତି ଉପରେ ୱାଶିଂଟନ୍‌ର ଦୃଷ୍ଟିକୋଣ ରଖିଛନ୍ତି ରୁବିଓ । ଯାହାକୁ ନେଇ ପ୍ରଧାନମନ୍ତ୍ରୀ ମୋଦି ସ୍ପଷ୍ଟ କରିଛନ୍ତି— ଭାରତ ସର୍ବଦା ଶାନ୍ତି ପକ୍ଷରେ ଅଛି ଏବଂ କୌଣସି ବି ବିବାଦର ସମାଧାନ କେବଳ 'ଆଲୋଚନା ଓ କୂଟନୀତି' ମାଧ୍ୟମରେ ହିଁ ସମ୍ଭବ ।

Happy to receive the US Secretary of State, Mr. Marco Rubio.

We discussed sustained progress in the India-US Comprehensive Global Strategic Partnership and issues related to regional and global peace and security.

India and the United States will continue to work closely for… pic.twitter.com/CuD0DdDXB7

— Narendra Modi (@narendramodi) May 23, 2026

ସେହିପରି ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପଙ୍କ ଉଦ୍ଦେଶ୍ୟରେ ନିଜର ଶୁଭେଚ୍ଛା ବାର୍ତ୍ତା ରୁବିଓଙ୍କ ହାତରେ ପଠାଇଛନ୍ତି । ଆଗାମୀ ଦିନରେ ଦୁଇ ଦେଶର ବନ୍ଧୁତାକୁ ସୁଦୃଢ଼ କରିବାକୁ ସେ ରାଷ୍ଟ୍ରପତି ଟ୍ରମ୍ପଙ୍କ ସହ ନିରନ୍ତର ଆଲୋଚନା ପାଇଁ ଆଶାୟୀ ଥିବା କହିଛନ୍ତି । ଏହି ବୈଠକରେ ଭାରତର ବିଦେଶ ମନ୍ତ୍ରୀ ଏସ.ଜୟଶଙ୍କର ଏବଂ ଜାତୀୟ ସୁରକ୍ଷା ପରାମର୍ଶଦାତା ଅଜିତ ଡୋଭାଲ ମଧ୍ୟ ଉପସ୍ଥିତ ଥିଲେ ।

ମାର୍କୋ ରୁବିଓଙ୍କ ଭାରତ ଗସ୍ତ ଏବଂ ପ୍ରଧାନମନ୍ତ୍ରୀ ମୋଦିଙ୍କ ସହ ବୈଠକ ଏକ ଅତ୍ୟନ୍ତ ଗୁରୁତ୍ୱପୂର୍ଣ୍ଣ ସମୟରେ ହେଉଛି । ଟ୍ରମ୍ପ ପ୍ରଶାସନ ଇରାନ ଏବଂ ଚୀନ୍ ଉପରେ କଠୋର ଆଭିମୁଖ୍ୟ ରଖୁଥିବା ବେଳେ ଆମେରିକା ଚାହୁଁଛି ଭାରତ ତା’ର ଏକ ପ୍ରମୁଖ ରଣନୈତିକ ଭାଗିଦାର ହେଉ । ଏହି ବୈଠକ ଦୁଇ ଦେଶର ଭବିଷ୍ୟତର ସାମରିକ ଓ ବାଣିଜ୍ୟିକ ସମ୍ପର୍କର ନକ୍ସା ପ୍ରସ୍ତୁତ କରୁଛି ।