ଅର୍ଗସ ବ୍ୟୁରୋ : ଅନ୍ତର୍ଜାତୀୟ ସ୍ତରରେ ଦିନକୁ ଦିନ ବଢି ଚାଲିଛି ମୋଦିଙ୍କ ନେତୃତ୍ବର ସମ୍ମାନ । ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ଶାସନରେ ବଢି ଚାନିଛି ମହିଳାଙ୍କ ବିକାଶ । ପ୍ରଧାନମନ୍ତ୍ରୀଙ୍କ ନେତୃତ୍ବକୁ ପ୍ରଶଂସା କରିଛନ୍ତି ଲୋକପ୍ରିୟ ଆଫ୍ରିକାନ-ଆମେରିକୀୟ ଗାୟିକା ମ୍ୟାରୀ ମିଲବେନ ।

ଗାୟିକା ମ୍ୟାରୀ ମିଲବେନ କହିଛନ୍ତି, ମୁଁ ଭାରତକୁ ଭଲପାଏ । ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ କାର୍ଯ୍ୟକାଳରେ ଭାରତକୁ ବୈଶ୍ବିକ ସ୍ତରରେ ମିଳିଛି ଦୃଢ ନେତୃତ୍ବ । ଯାହା ଭାରତୀୟଙ୍କ ସାମୁହିକ ଉନ୍ନତିର ବାଟ ଫିଟାଇଛି । ଏହା ବ୍ୟତୀତ ମୋଦିଙ୍କ କାର୍ଯ୍ୟକାଳରେ ମହିଳାଙ୍କୁ ମିଳୁଥିବା ଗୁରୁତ୍ବ ଏବଂ ନେତୃତ୍ବ ଯୋଗୁ ମହିଳା ବିକାଶ କ୍ଷେତ୍ରରେ ଭାରତ ବିଶ୍ବ ଦରବାରରେ ଉଦାହରଣ ସାଜିଛି ।

ସେପଟେ, ନଭେମ୍ବର ୬ ତାରିଖରେ ବିହାର ମୁଖ୍ୟମନ୍ତ୍ରୀ ନୀତୀଶ କୁମାର ବିଧାନସଭାରେ ଜନସଂଖ୍ୟା ନିୟନ୍ତ୍ରଣ ପ୍ରସଙ୍ଗରେ ମହିଳାଙ୍କୁ ନେଇ ଅପମାନଜନକ ଶବ୍ଦ କହିଥିଲେ । ଏହି ଘଟଣାକୁ କେନ୍ଦ୍ର କରି ଦେଶ ତଥା ଦେଶ ବାହାରେ ନୀତୀଶଙ୍କୁ ସମାଲୋଚନା ମଧ୍ୟ କରାଯାଉଛି । ଏହି ଘଟଣାକୁ ନେଇ ଆଫ୍ରିକା-ଆମେରିକା ଅଭିନେତ୍ରୀ ତଥା ସିଙ୍ଗର୍‌ ମ୍ୟାରି ମିଲବେନ ମଧ୍ୟ ନୀତୀଶ କୁମାରଙ୍କ ବୟାନକୁ ସମାଲୋଚନା କରିଛନ୍ତି । ନୀତୀଶଙ୍କ ସମାଲୋଚନା କରି ମ୍ୟାରି କହିଛନ୍ତି, ମୁଁ ଯଦି ଭାରତର ନାଗରିକ ହୋଇଥାଆନ୍ତି ତେବେ ନୀତୀଶଙ୍କ ବିରୋଧରେ ମୁଖ୍ୟମନ୍ତ୍ରୀ ନିର୍ବାଚନ ଲଢିଥାଆନ୍ତି । ଏଥିପାଇଁ ବିହାର ନିଶ୍ଚୟ ଯାଇଥାଆନ୍ତି ।

ମୋ ମତରେ ବିଧାନସଭାରେ ଜନସଂଖ୍ୟା ନିୟନ୍ତ୍ରଣ ପ୍ରସଙ୍ଗରେ ମହିଳାଙ୍କୁ ନେଇ ଅପମାନଜନକ ଶବ୍ଦ ପ୍ରୟୋଗ କରିବା ଘଟଣାକୁ କେନ୍ଦ୍ର କରି ବିହାର ମହିଳାଙ୍କୁ ନୀତୀଶ କୁମାରଙ୍କ ବିରୋଧରେ ସ୍ୱର ଉତ୍ତୋଳନ କରିବା ଉଚିତ । କେବଳ ଏତିକି ନୁହେଁ ଏଭଳି ସମୟରେ ଜଣେ ସାହସୀ ମହିଳା ଆଗକୁ ଆସିବା ଦରକାର । ଏମିତିକି ନିଜ ଟ୍ବିଟରେ ଶାହରୁଖଙ୍କ ସିନେମା ଜୱାନର ଏକ ଦୃଶ୍ୟର ଉଦାହରଣ ଦେଇ ଏଭଳି ନେତାଙ୍କୁ ଭୋଟିଂର କ୍ଷମତା ଦେଖାଇବାକୁ ସେ ସମସ୍ତ ଭାରତୀୟ ଏବଂ ବିହାରବାସୀଙ୍କୁ ଅପିଲ୍ କରିଛନ୍ତି ।

Argus News | argus news | -Argusnews Home: Odisha Latest News, Breaking News, Trending News, Live TV and more