Pan Masala Ban / ଏଣିକି ଆଉ ମିଳିବନି ଗୁଟ୍‌ଖା ଓ ପାନ ମସଲା, ୧ ବର୍ଷ ପାଇଁ ଲାଗିଲା କଟକଣା

ଜନସ୍ୱାସ୍ଥ୍ୟକୁ ଦୃଷ୍ଟିରେ ରଖି ଉତ୍ତରାଖଣ୍ଡ ସରକାରଙ୍କ ବଡ଼ ନିଷ୍ପତ୍ତି । ତମାଖୁ ଓ ନିକୋଟିନ୍‌ଯୁକ୍ତ ଗୁଟ୍‌ଖା, ପାନ ମସଲା ଏବଂ ଏହିଭଳି ଅନ୍ୟ ଉତ୍ପାଦ ଉପରେ ଏକ ବର୍ଷ ପାଇଁ ପ୍ରତିବନ୍ଧକ ଲଗାଯାଇଛି । ଖାଦ୍ୟ ସୁରକ୍ଷା ଓ ଔଷଧ ପ୍ରଶାସନର ଆୟୁକ୍ତ ବିନୟ ଶଙ୍କର ପାଣ୍ଡେୟ ୧୩ ଅକ୍ଟୋବର ୨୦୨୬ରେ ଏନେଇ ଆଦେଶ ଜାରି କରିଛନ୍ତି ।
ଏହି ନିଷ୍ପତ୍ତି ଅନୁଯାୟୀ, ତମାଖୁ ଓ ନିକୋଟିନ୍‌ଯୁକ୍ତ ଉକ୍ତ ଉତ୍ପାଦଗୁଡ଼ିକର ଉତ୍ପାଦନ, ଗଚ୍ଛିତ ରଖିବା, ବଣ୍ଟନ ଏବଂ ବିକ୍ରି ଉପରେ ରୋକ୍ ଲଗାଯାଇଛି । ଏହି ଆଦେଶ ଉତ୍ତରାଖଣ୍ଡର ସମସ୍ତ ଜିଲ୍ଲାରେ ଲାଗୁ ହେବ ।

ଜନସ୍ୱାସ୍ଥ୍ୟ ପାଇଁ ନିଆଗଲା ପଦକ୍ଷେପ

ସରକାରଙ୍କ ପକ୍ଷରୁ ଜାରି ଆଦେଶ ଅନୁସାରେ, ଖାଦ୍ୟ ସୁରକ୍ଷା ଓ ମାନକ ଆଇନ, ୨୦୦୬ ଏବଂ ଖାଦ୍ୟ ସୁରକ୍ଷା ଓ ମାନକ (ବିକ୍ରୟ ନିଷେଧ ଓ ପ୍ରତିବନ୍ଧକ) ନିୟମାବଳୀ, ୨୦୧୧ର ବ୍ୟବସ୍ଥା ଅନୁଯାୟୀ ଏହି ପଦକ୍ଷେପ ନିଆଯାଇଛି । ଆଦେଶ ଜାରି ହେବା ତାରିଖରୁ ଏହି ପ୍ରତିବନ୍ଧକ ଆଗାମୀ ଏକ ବର୍ଷ ପର୍ଯ୍ୟନ୍ତ ବଳବତ୍ତର ରହିବ ।

ନିୟମ ଉଲ୍ଲଂଘନ ଉପରେ ରୋକ୍

ପ୍ରଶାସନର କହିବା ଅନୁଯାୟୀ, ଖାଦ୍ୟ ଉତ୍ପାଦରେ ତମାଖୁ ଓ ନିକୋଟିନ୍‌ର ବ୍ୟବହାର ନିଷିଦ୍ଧ ଥିଲେ ମଧ୍ୟ ଗୁଟ୍‌ଖା ଓ ପାନ ମସଲା ଭଳି ଉତ୍ପାଦରେ ଏହି ପଦାର୍ଥ ବ୍ୟବହାର କରାଯାଉଥିବା ଘଟଣା ସାମ୍ନାକୁ ଆସୁଛି । ଏହାକୁ ରୋକିବା ସହ ଲୋକଙ୍କ ସ୍ୱାସ୍ଥ୍ୟର ସୁରକ୍ଷା ପାଇଁ ସରକାର ଏହି ନିଷ୍ପତ୍ତି ନେଇଛନ୍ତି । କୌଣସି ନାମରେ ବିକ୍ରି ହେଉଥିଲେ ମଧ୍ୟ ତମାଖୁ କିମ୍ବା ନିକୋଟିନ୍‌ଯୁକ୍ତ ସମ୍ପୃକ୍ତ ଖାଦ୍ୟ ଉତ୍ପାଦ ଉପରେ ଏହି ପ୍ରତିବନ୍ଧକ ଲାଗୁ ହେବ । ଏହା ଦ୍ୱାରା ଉତ୍ତରାଖଣ୍ଡରେ ଏଭଳି ଉତ୍ପାଦର ଉତ୍ପାଦନଠାରୁ ଆରମ୍ଭ କରି ବଜାରରେ ବିକ୍ରି ପର୍ଯ୍ୟନ୍ତ ସମସ୍ତ ପ୍ରକ୍ରିୟା ନିଷିଦ୍ଧ ରହିବ ।