Vadodara Horror Accident / ବସ୍ କବାଟରେ ଫସିଗଲା କୁନିପୁଅର ବେକ...ମନ୍ଦିର ପ୍ରସାଦ ଖାଇବାକୁ ବାହାରିଥିଲା

ଗାନ୍ଧୀନଗର: ସତରେ କେଉଁଠି କେତେବେଳେ ମୃତ୍ୟୁ ଆପଣଙ୍କୁ ଛକି ବସିଥିବ ତାହା କହିବା ମୁସ୍କିଲ । ଦୁନିଆକୁ ବୁଝିବା ଆଗରୁ ଚାଲିଗଲା କୋମଳମତୀ କୁନିପୁଅର ଜୀବନ । ବସ୍‌ର ଅଟୋମେଟିକ୍ କବାଟରେ ୭ ବର୍ଷୀୟ ଏହି କୁନିପୁଅର ବେକ ଅଟକି ଯାଇଥିଲା । ଆଉ ଶେଷରେ କୁନିପୁଅର ଜୀବନ ଚାଲିଯାଇଛି । ଏଭଳି ଘଟଣା ଗୁଜରାଟ ଭଦୋଦରାର ସୂର୍ଯ୍ୟନଗର-ତର୍ସାଲୀ ବାଇପାସ୍‌ରୁ ଆସିଛି । କୁନିପୁଅ ଦିବ୍ୟାଂଶର ଏହି ଅକସ୍ମାତ ମୃତ୍ୟୁ ପରିବାର ଲୋକଙ୍କୁ ସ୍ତବ୍ଧ କରିଦେଇଛି ।

ଦିବ୍ୟାଂଶ ଦ୍ଵିତୀୟ ଶ୍ରେଣୀରେ ପାଠ ପଢୁଥିଲା । ସ୍କୁଲରୁ ଫେରିବା ପରେ ପ୍ରସାଦ କିଣିବା ପାଇଁ ବାହାରୁଥିଲା । କିନ୍ତୁ ବସ୍ କବାଟ ନିକଟରେ ଛକି ବସିଥିଲ ଯମ । ଏକ ବିଳାସପୂର୍ଣ୍ଣ ବସ୍‌ର ସ୍ଵୟଂଚାଳିତ କବାଟରେ ତାର ବେକ ଫସିଯାଇଥିଲା । ଏହାପରେ ଦିବ୍ୟାଂଶଙ୍କୁ ଗମ୍ଭୀର ଅବସ୍ଥାରେ ସଙ୍ଗେ ସଙ୍ଗେ ହସ୍ପିଟାଲକୁ ନିଆଯାଇଥିଲା । ମାତ୍ର ସେଠାରେ ଡାକ୍ତର ତାକୁ ମୃତ ଘୋଷଣା କରିଥିଲେ ।

• କଣ ଥିଲା ପୂରା ଘଟଣା ?

ମୃତ କୁନିପୁଅ ଦିବ୍ୟାଂଶ ହେଉଛି ତର୍ସାଲି-୨ ସ୍ଥିତ ଡକ୍ଟର ଏପିଜେ ଅବଦୁଲ କାଲାମ ପ୍ରାଥମିକ ବିଦ୍ୟାଳୟର ଦ୍ଵିତୀୟ ଶ୍ରେଣୀର ଛାତ୍ର । ତା ପିତା ରୋକଶଭାଇ ରାଠୱା ସୂର୍ଯ୍ୟନଗର ନିକଟ ଏସ.ଆର ବାୟୋଗ୍ୟାସ କମ୍ପାନୀରେ କାମ କରନ୍ତି । ଦିବ୍ୟାଂଶ ସ୍କୁଲରୁ ଫେରିବା ପରେ ପ୍ରସାଦ କିଣିବା କହି ଘରୁ ବାହାରିଥିଲା । ବହୁତ ସମୟ ପରେ ସେ ଘରକୁ ନ ଫେରିବା ପରେ ପରିବାର ଲୋକଙ୍କ ସନ୍ଦେହ ହୋଇଥିଲା । ପରିବାର ଲୋକେ ଖୋଜାଖୋଜି କରିବା ପରେ ଏକ ବିଳାସପୂର୍ଣ୍ଣ ବସ୍‌ ଡୋରରେ ତାର ବେକ ଫସିଯାଇଥିବା ଓ ପୂରା ଘଟଣା ସମ୍ପର୍କରେ ଜାଣିବାକୁ ପାଇଥିଲେ ।

ପଢନ୍ତୁ ଏହି ଖବର: ଉଡ଼ାଣ ଭରିବା ସମୟରେ ବିମାନକୁ ଧକ୍କା ଦେଲା ପକ୍ଷୀ, ୧୮୮ ଜଣଙ୍କୁ ନେଇ ଫେରିଲା ବିମାନ

• ୧୫ ମିନିଟ୍‌ର ସିସିଟିଭି ଫୁଟେଜ ଗାଏବ

ଏହାପରେ ପରିବାର ଓ ସ୍ଥାନୀୟ ଲୋକେ ଦିବ୍ୟାଂଶଙ୍କୁ ୧୦୮ ଆମ୍ବୁଲାନ୍ସ ଯୋଗେ ଭଦୋଦରା ଏସଏସଜି ହସ୍ପଟାଲକୁ ନେଇଥିଲେ । ସେଠାରେ ଡାକ୍ତର ତାକୁ ମୃତ ଘୋଷଣା କରିଥିଲେ । ଏହି ଘଟଣା ସମ୍ପର୍କରେ ଖବର ପାଇବା ପରେ କପୁରାଇ ପୋଲିସ ଘଟଣାସ୍ଥଳରେ ପହଞ୍ଚିଥିଲା । ତଦନ୍ତ ବେଳେ ପୋଲିସ ସିସିଟିଭି କ୍ୟାମେରା ଯାଞ୍ଚ କରିଥିଲା । ପୋଲିସ ଅଘଟଣ ଘଟିବାର ପୂର୍ବ ଓ ପର ଭିଡିଓ ଫୁଟେଜ ଯାଞ୍ଚ କରିଥିଲା । ତେବେ ଘଟଣା ଘଟିବାର ପ୍ରାୟ ୧୫ ମିନିଟ୍‌ର ସିସିଟିଭି ଫୁଟେଜ ମିଳିନାହିଁ, ଯାହାକି ଘଟଣାକୁ ସନ୍ଦେହ ଘେରକୁ ଆଣିଛି । ତେବେ ସେହି ସମୟରେ ପାୱାର କଟ୍ ହୋଇଥାଇପାରେ ବୋଲି କୁହାଯାଉଛି । ମାତ୍ର ପୋଲିସ ସମସ୍ତ ଦିଗରୁ ଘଟଣାଟିକୁ ଯାଞ୍ଚ କରୁଛି ।