ଆସନ୍ତା ସେପ୍ଟେମ୍ବର ୯ରେ ଅନୁଷ୍ଠିତ ହେବାକୁ ଯାଉଛି ଉପରାଷ୍ଟ୍ରପତି ନିର୍ବାଚନ । ଏଥିପାଇଁ ବିଜେପି କରୁଛି ବଡ଼ ପ୍ରସ୍ତୁତି । ଏହି ନିର୍ବାଚନରେ NDAର ଶତ ପ୍ରତିଶତ ମତଦାନ ପାଇଁ ବିଜେପି ରଣନୀତି ପ୍ରସ୍ତୁତ କରିଛି । ସାଂସଦମାନେ କେମିତି ମତଦାନ କରିବେ ସେ ସମ୍ପର୍କରେ ୬ରୁ ୮ ସେପ୍ଟେମ୍ବର ଯାଏଁ NDA ସାଂସଦମାନଙ୍କର ୱାର୍କ ସପ୍ ବା କର୍ମଶାଳା ରଖାଯାଇଛି ।

ସେହିପରି ଉପରାଷ୍ଟ୍ରପତି ନିର୍ବାଚନର ଗୋଟିଏ ଦିନ ପୂର୍ବରୁ ଅର୍ଥାତ ସେପ୍ଟେମ୍ବର ୮ ତାରିଖ ସଂଧ୍ୟାରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି NDA ସାଂସଦମାନଙ୍କୁ ରାତ୍ରି ଭୋଜନ ଦେବେ । ସେହିଦିନ ସଂଧ୍ୟାରେ ଅନେକ ସଂସଦୀୟ ସମିତିର ବୈଠକ ମଧ୍ୟ ରଖାଯାଇଛି । ଉପରାଷ୍ଟ୍ରପତି ନିର୍ବାଚନରେ ବିଜୟ ପାଇଁ ୩୯୨ ଭୋଟ୍ ଆବଶ୍ୟକ ଥିବାବେଳେ, NDA ପାଖରେ ଅଛନ୍ତି ୪୨୩ ଜଣ ସାଂସଦ । ସିପି ରାଧାକ୍ରିଷ୍ଣନଙ୍କ ବିଜୟ ପାଇଁ NDA ହାତରେ ଯଥେଷ୍ଟ ସିଟ୍ ରହିଥଲେ ମଧ୍ୟ ଶତ ପ୍ରତିଶତ ମତଦାନ ଉପରେ ଦଳ ଜୋର ଦେଉଛି ।

କେମିତି ହୁଏ ଉପରାଷ୍ଟ୍ରପତି ନିର୍ବାଚନ

ସମ୍ବିଧାନର ଧାରା ୬୬ ଅନୁସାରେ ଇଲେକ୍ଟୋରାଲ କଲେଜ ମାଧ୍ୟମରେ ଉପରାଷ୍ଟ୍ରପତି ନିର୍ବାଚନ ଅନୁଷ୍ଠିତ ହୁଏ । ସଂସଦର ଉଭୟ ଗୃହର ନିର୍ବାଚିତ ସଦସ୍ୟ ଓ ରାଜ୍ୟସଭାର ମନୋନୀତ ସଦସ୍ୟଙ୍କୁ ନେଇ ଗଠିତ ଇଲେକ୍ଟୋରାଲ କଲେଜ । ରାଜ୍ୟସଭାର ମୋଟ ନିର୍ବାଚିତ ସଂଖ୍ୟା ୨୩୩ ହୋଇଥିବାବେଳେ ୧୨ ଜଣ ମନୋନୀତ ହୁଅନ୍ତି। ସେହିପରି ଲୋକସଭାର ନିର୍ବାଚିତ ସଦସ୍ୟଙ୍କ ସଂଖ୍ୟା ୫୪୩ । ଏହିପରି ଇଲେକ୍ଟୋରାଲ କଲେଜରେ ମୋଟ ସଦସ୍ୟ ସଂଖ୍ୟା ୭୮୮ ।

ଅଧିକ ପଢ଼ନ୍ତୁ: ଶିକ୍ଷକଙ୍କ ପାଇଁ ବଡ଼ ଖବର, TET ପାସ୍ ନ କଲେ ଦିଆଯିବ ବାଧ୍ୟତାମୂଳକ ଅବସର

କିନ୍ତୁ ଏବେ ରାଜ୍ୟସଭାର ୨୩୩ ନିର୍ବାଚିତ ପଦ ମଧ୍ୟରୁ ୫ଟି ଆସନ ଖାଲି ଅଛି । ସେହିପରି ଲୋକସଭାରେ ମଧ୍ୟ ୫୪୩ ମଧ୍ୟରୁ ଗୋଟିଏ ଆସନ ଖାଲି ପଡ଼ିଛି। ଏଣୁ ମୋଟ ୭୮୮ ଇଲେକ୍ଟୋରାଲ କଲେଜ ଭୋଟ୍ ମଧ୍ୟରୁ ଏବେ ୬ ଜଣ ସାଂସଦଙ୍କ ପଦ ଖାଲି ରହିଛି । ଏମିତିରେ ୭୮୨ ଜଣ ସଦସ୍ୟ ଏଥର ଉପରାଷ୍ଟ୍ରପତି ନିର୍ବାଚନରେ ଭୋଟ ଦେବେ । ବିଜୟ ପାଇଁ ଆବଶ୍ୟକ ସଂଖ୍ୟା ହେଉଛି ୩୯୨। NDA ପାଖରେ ୪୨୩ ସାଂସଦଙ୍କ ସମର୍ଥନ ରହିଥିବାରୁ ସି.ପି ରାଧାକ୍ରିଷ୍ଣନଙ୍କ ବିଜୟ ସମ୍ଭାବନା ଉଜ୍ଜ୍ବଳ।

Argus News | argus news | -Argusnews Home: Odisha Latest News, Breaking News, Trending News, Live TV and more