Tamil Nadu MLA New Cars / ବିଧାୟକଙ୍କ ପାଇଁ ବିଜୟଙ୍କ ବଡ଼ ଘୋଷଣା, ନୂଆ କାର୍‌ ସହ ମାସକୁ ମିଳିବ ୭୫ ହଜାର

ତାମିଲନାଡୁ ରାଜନୀତିରେ ଏକ ବଡ଼ ଘୋଷଣା କରିଛନ୍ତି ମୁଖ୍ୟମନ୍ତ୍ରୀ ବିଜୟ । ଏଣିକି ରାଜ୍ୟର ସମସ୍ତ ବିଧାୟକଙ୍କୁ ଯାତାୟାତ ପାଇଁ ନୂଆ କାର୍‌ ଯୋଗାଇ ଦିଆଯିବ ବୋଲି ସେ ଘୋଷଣା କରିଛନ୍ତି । ବିଧାୟକମାନେ ନିଜ ନିଜ ନିର୍ବାଚନମଣ୍ଡଳୀରେ ଲୋକଙ୍କ ସମସ୍ୟା ବୁଝିବା ଏବଂ ସେଗୁଡ଼ିକର ସମାଧାନ ପାଇଁ ନିୟମିତ ଭାବେ ଅଞ୍ଚଳ ପରିଦର୍ଶନ କରିବାକୁ ପଡ଼ୁଥିବାରୁ ସରକାର ଏହି ପଦକ୍ଷେପ ନେଇଥିବା କୁହାଯାଇଛି ।

ବିଧାୟକମାନଙ୍କ ଯାତାୟାତକୁ ସୁବିଧାଜନକ କରିବା ସହ ନିଜ ଅଞ୍ଚଳରେ ସେମାନଙ୍କୁ ଅଧିକ ସକ୍ରିୟ ରହିବାରେ ସହାୟତା କରିବା ଏହି ଯୋଜନାର ମୁଖ୍ୟ ଉଦ୍ଦେଶ୍ୟ । ଏହା ଦ୍ୱାରା ବିଧାୟକମାନେ ଲୋକଙ୍କ ନିକଟରେ ଶୀଘ୍ର ପହଞ୍ଚିବା ସହ ବିକାଶମୂଳକ କାର୍ଯ୍ୟର ତଦାରଖ କରିପାରିବେ ।

ସୂଚନା ଅନୁସାରେ, ବିଧାୟକମାନଙ୍କ ପାଇଁ ଆବଶ୍ୟକ ଲଜିଷ୍ଟିକ୍‌ସ ଏବଂ ଯାନବାହନର ଆବଶ୍ୟକତା ସମ୍ପର୍କରେ ବିଧାନସଭାରେ ଦାବି ଉଠାଯାଇଥିଲା । VCK ବିଧାୟକ ଜୋତିମଣି ଏହି ପ୍ରସଙ୍ଗ ଉଠାଇ ବିଧାୟକମାନଙ୍କୁ ଯଥେଷ୍ଟ ଯାତାୟାତ ସୁବିଧା ଯୋଗାଇଦେବାକୁ ଅନୁରୋଧ କରିଥିଲେ ।

ଅଧିକ ପଢ଼ନ୍ତୁ: ୪ ଘଣ୍ଟା ଶୋ’ରୁମ୍‌ରେ ରହିଲା କଫି ପିଇଲା,ଗାଧୋଇଲା, ନାଚିଲା ଆଉ ତା’ପରେ...

ଜୋତିମଣିଙ୍କ କହିବା ଅନୁଯାୟୀ, ଆବଶ୍ୟକ ଲଜିଷ୍ଟିକ୍‌ସ ସପୋର୍ଟ ଏବଂ ଯାନବାହନ ନଥିଲେ ବିଧାୟକମାନେ ନିଜ ନିର୍ବାଚନମଣ୍ଡଳୀରେ ସୁଚାରୁ ଭାବେ କାର୍ଯ୍ୟ କରିବାରେ ସମସ୍ୟାର ସମ୍ମୁଖୀନ ହେବେ । ଲୋକଙ୍କ ନିକଟରେ ପହଞ୍ଚିବା ଓ ସେମାନଙ୍କ ସମସ୍ୟା ଜାଣିବା ପାଇଁ ଯାନବାହନ ଏକ ଆବଶ୍ୟକତା ବୋଲି ସେ ଦର୍ଶାଇଥିଲେ ।

ଜୋତିମଣିଙ୍କ ଏହି ଦାବି ଓ ପ୍ରସ୍ତାବକୁ ଗୁରୁତ୍ୱ ଦେଇ ମୁଖ୍ୟମନ୍ତ୍ରୀ ବିଜୟ ସମସ୍ତ ବିଧାୟକଙ୍କ ପାଇଁ ନୂଆ କାର୍‌ ବ୍ୟବସ୍ଥା କରିବାକୁ ଘୋଷଣା କରିଛନ୍ତି । ସରକାରଙ୍କ ଏହି ପଦକ୍ଷେପ ଦ୍ୱାରା ବିଧାୟକମାନେ ନିଜ ନିର୍ବାଚନମଣ୍ଡଳୀକୁ ଅଧିକ ସହଜରେ ଯାତାୟାତ କରିବା ସହ ବିକାଶମୂଳକ କାର୍ଯ୍ୟର ତଦାରଖ ଏବଂ ସାଧାରଣ ଲୋକଙ୍କ ସମସ୍ୟାର ସମାଧାନ ଉପରେ ଅଧିକ ଧ୍ୟାନ ଦେଇପାରିବେ ।

ସରକାରୀ ଗାଡ଼ି ବ୍ୟତୀତ, ପ୍ରତ୍ୟେକ ବିଧାୟକଙ୍କୁ ଡ୍ରାଇଭର, ଇନ୍ଧନ ଏବଂ ଗାଡ଼ି ରକ୍ଷଣାବେକ୍ଷଣ ସହିତ ଜଡିତ ଖର୍ଚ୍ଚ ପାଇଁ ମାସିକ ୭୫ ହଜାର ଭତ୍ତା ମଧ୍ୟ ମିଳିବ । ନିର୍ବାଚନମଣ୍ଡଳୀର ଚିଠିପତ୍ର ଏବଂ ଅନ୍ୟାନ୍ୟ ସରକାରୀ କାର୍ଯ୍ୟରେ ସହାୟତା କରିବା ପାଇଁ ଜଣେ ସଚିବ ନିଯୁକ୍ତ କରିବା ପାଇଁ ସରକାର ପ୍ରତ୍ୟେକ ବିଧାୟକଙ୍କୁ ପ୍ରତି ମାସରେ ୨୫ ହଜାର ଅନୁଦାନ ମଧ୍ୟ ପ୍ରଦାନ କରିବେ ।