ସିନେମା ପରଦାରେ ନୁହେଁ, ଏଥର କାଦୁଅ କ୍ଷେତରେ ବିଜୟଙ୍କ ନିଆରା ଅନ୍ଦାଜ । ଧଳା ସାର୍ଟ-ଧୋତି ପିନ୍ଧି ପ୍ରଚାର ମଝିରେ ହଠାତ୍ ଗାଡ଼ିରୁ ଓହ୍ଲାଇଲେ, କୃଷକଙ୍କ ସହ କଥା ହେଲେ, ଆଉ ପରେ ନିଜେ ଧରିଲେ ଟ୍ରାକ୍ଟରର ଷ୍ଟିୟରିଂ । କାଦୁଅ ଭର୍ତ୍ତି କ୍ଷେତରେ ଟ୍ରାକ୍ଟର ଚଳାଇବାଠାରୁ ରାସ୍ତାକଡ଼ ଦୋକାନରେ ଚା’ ପିଇବା ପର୍ଯ୍ୟନ୍ତ ମଦୁରନ୍ତକମ ଉପନିର୍ବାଚନ ପ୍ରଚାରରେ ଟିଭିକେ ଅଧ୍ୟକ୍ଷ ଓ ତାମିଲନାଡୁ ମୁଖ୍ୟମନ୍ତ୍ରୀ ବିଜୟଙ୍କ ଏହି ଜନସମ୍ପର୍କ ଅଭିଯାନ ଏବେ ଚର୍ଚ୍ଚାରେ । ଅକ୍ଟୋବର ୬ ଉପନିର୍ବାଚନ ପୂର୍ବରୁ ସେ ୩୦ରୁ ଅଧିକ ଗାଁ ଦେଇ ପ୍ରଚାର କରିଥିବା ବେଳେ କ୍ଷେତରେ ଟ୍ରାକ୍ଟର ଚଳାଇଥିବା ଘଟଣା ମଧ୍ୟ ସାମ୍ନାକୁ ଆସିଛି ।

ତାମିଲନାଡୁରେ ଅକ୍ଟୋବର ୬ରେ ହେବାକୁ ଥିବା ଉପନିର୍ବାଚନ ପାଇଁ ପ୍ରଚାର ସମୟରେ ଟିଭିକେ ଅଧ୍ୟକ୍ଷ ତଥା ମୁଖ୍ୟମନ୍ତ୍ରୀ ଥଲପତି ବିଜୟଙ୍କ ଭିନ୍ନ ଅନ୍ଦାଜ ଦେଖିବାକୁ ମିଳିଛି । ପ୍ରଚାର ମଧ୍ୟରେ ସେ ଜଣେ କୃଷକଙ୍କ ଟ୍ରାକ୍ଟର ଚଳାଇ ଚର୍ଚ୍ଚାରେ ଆସିଛନ୍ତି।

ମଦୁରନ୍ତକମ ବିଧାନସଭା ଅଞ୍ଚଳରେ ଦଳୀୟ ପ୍ରାର୍ଥୀ ମରଗାଥମ କୁମାରଭେଲଙ୍କ ପାଇଁ ଭୋଟ ମାଗିବା ସମୟରେ ବିଜୟଙ୍କ କାଫିଲା ଏକ ଗାଁ ନିକଟରେ ପହଞ୍ଚିଥିଲା । ସେଠାରେ ଜଣେ କୃଷକଙ୍କୁ କ୍ଷେତରେ ଟ୍ରାକ୍ଟର ଚଳାଉଥିବା ଦେଖି ବିଜୟ ନିଜ ଗାଡ଼ି ଅଟକାଇଥିଲେ । ଧଳା ସାର୍ଟ ଓ ଧୋତି ପିନ୍ଧି ସେ ଗାଡ଼ିରୁ ଓହ୍ଲାଇ ସିଧା କ୍ଷେତକୁ ଯାଇ କୃଷକଙ୍କ ସହ କଥା ହୋଇଥିଲେ ।

ଏଥି ସହ ପଢନ୍ତୁ : ମୁଖ୍ୟମନ୍ତ୍ରୀ ବିଜୟ ହଠାତ୍ ବସ୍ କଣ୍ଡକ୍ଟର ପରି ଟିକେଟ୍ ଦେବା ଆରମ୍ଭ କାହିଁକି କଲେ

 
ପରେ ବିଜୟ ନିଜେ ଟ୍ରାକ୍ଟରର ଡ୍ରାଇଭିଂ ସିଟ୍‌ରେ ବସିଥିଲେ । କାଦୁଅ ଭର୍ତ୍ତି କ୍ଷେତରେ ସେ କିଛି ସମୟ ଟ୍ରାକ୍ଟର ଚଳାଇଥିଲେ। ଏହାପରେ ସେ ଟ୍ରାକ୍ଟରକୁ ମୁଖ୍ୟ ରାସ୍ତାକୁ ନେଇ ଆସିଥିଲେ । ସେଠାରେ ଅପେକ୍ଷା କରୁଥିବା ଲୋକମାନେ ତାଙ୍କୁ ସ୍ୱାଗତ କରିଥିଲେ। ଟ୍ରାକ୍ଟର ଚଳାଇବାକୁ ଅନୁମତି ଦେଇଥିବାରୁ ବିଜୟ କୃଷକଙ୍କୁ ଧନ୍ୟବାଦ ଜଣାଇଥିଲେ ଏବଂ ତାଙ୍କ କାନ୍ଧରେ ହାତ ରଖି ସେଲ୍ଫି ମଧ୍ୟ ନେଇଥିଲେ ।

ପ୍ରଚାର ସମୟରେ ବିଜୟ ବାରମ୍ବାର ନିଜ ଗାଡ଼ିରୁ ଓହ୍ଲାଇ ସ୍ଥାନୀୟ ଲୋକଙ୍କ ସହ ମିଶୁଥିଲେ । ସେ ଏକ ଗାଁରେ ଦିବ୍ୟାଙ୍ଗମାନଙ୍କୁ ଭେଟିବା ସହ କ୍ଷେତରେ କାମ କରୁଥିବା କୃଷି ଶ୍ରମିକଙ୍କ ସହ ମଧ୍ୟ କଥା ହୋଇଥିଲେ । ଏହାଛଡ଼ା ସ୍ଥାନୀୟ ଲୋକଙ୍କ ସହ ଏକ ଦୋକାନରେ ବସି ଚା’ ପିଇଥିଲେ ।

ଏକ ସ୍ଥାନରେ ଜଣେ ମହିଳା ଓ ତାଙ୍କ ଶିଶୁ ପାରମ୍ପରିକ ଆରତି କରୁଥିବା ଦେଖି ବିଜୟ ଗାଡ଼ିରୁ ଓହ୍ଲାଇ ସେମାନଙ୍କ ଆରତି କରିଥିଲେ ଏବଂ ଉଭୟଙ୍କ କପାଳରେ ତିଳକ ଲଗାଇଥିଲେ । ବିଜୟ ଆଗରୁ ମଧ୍ୟ ବିଭିନ୍ନ ସରକାରୀ କାର୍ଯ୍ୟକ୍ରମରେ କାର ସମେତ ଅନ୍ୟାନ୍ୟ ଯାନ ଚଳାଇଥିବା ଦେଖାଯାଇଛି ।