ଦୀର୍ଘ ୬୦ ବର୍ଷ ପରେ ତାମିଲନାଡ଼ୁକୁ ମିଳିଛି ନୂଆ ସରକାର। ବଡ଼ ବଡ଼ ଦଳକୁ ହରାଇ ନୂଆ ମୂଖ୍ୟମନ୍ତ୍ରୀ ଭାବରେ ଶପଥ ନେଇଛନ୍ତି ଭିଜୟ ଥାଲାପତି । ଶପଥ ଗ୍ରହଣ ଉତ୍ସବ ପୂର୍ବରୁ ବହୁତ ସାରା ଅସୁବିଧା ଆସିଥିଲେ ମଧ୍ୟ ମୂଖ୍ୟମନ୍ତ୍ରୀ ହୋଇଛନ୍ତି ଭିଜୟ । ଶପଥ ଗ୍ରହଣରେ ଏମିତି କହି ଶପଥ ନେଇଛନ୍ତି ବିଜୟ ।

"ମୁଁ, ବିଜୟ ଜୋସେଫ, ଈଶ୍ୱରଙ୍କ ନାମରେ ସତ୍ୟନିଷ୍ଠାର ସହ ପ୍ରତିଜ୍ଞା କରୁଛି ଯେ, ମୁଁ ବିଧିଦ୍ୱାରା ସ୍ଥାପିତ ଭାରତର ସମ୍ବିଧାନ ପ୍ରତି ପ୍ରକୃତ ଶ୍ରଦ୍ଧା ଓ ନିଷ୍ଠା ରଖିବି । ମୁଁ ଭାରତର ସାର୍ବଭୌମତ୍ୱ ଓ ଅଖଣ୍ଡତା ବଜାୟ ରଖିବି । ମୁଁ ତାମିଲନାଡ଼ୁ ରାଜ୍ୟର ମୁଖ୍ୟମନ୍ତ୍ରୀ ଭାବରେ ମୋର କର୍ତ୍ତବ୍ୟ ଶ୍ରଦ୍ଧାପୂର୍ବକ ଓ ଶୁଦ୍ଧ ଅନ୍ତଃକରଣ ସହିତ ନିର୍ବାହ କରିବି ଏବଂ ମୁଁ ଭୟ ବା ପକ୍ଷପାତ, ଅନୁରାଗ ବା ବିଦ୍ୱେଷ ନରଖି ସବୁପ୍ରକାର ବ୍ୟକ୍ତିଙ୍କ ପ୍ରତି ସମ୍ବିଧାନ ଓ ବିଧି ଅନୁସାରେ ନ୍ୟାୟ କରିବି ।"

ହଜାର ହଜାର ଲୋକଙ୍କ ଗହଳି କହି ଦେଉଛି ବିଜୟଙ୍କ ପ୍ରତି ଥିବା ଭଲପାଇବା । ତାମିଲନାଡ଼ୁର ଇତିହାସ ଆଜି ବଦଳି ଯାଇଛି । ସୁପରଷ୍ଟାରରୁ ସିଦ୍ଧା ମୁଖ୍ୟମନ୍ତ୍ରୀ ହୋଇଛନ୍ତି ବିଜୟ । ଚେନ୍ନାଇର ଜବାହରଲାଲ ନେହେରୁ ଷ୍ଟାଡିୟମରେ ଆୟୋଜିତ ଏହି ଭବ୍ୟ ସମାରୋହରେ ଲକ୍ଷ ଲକ୍ଷ ପ୍ରଶଂସକଙ୍କ ଗହଣରେ ରାଜ୍ୟପାଳ ଆର.ଭି. ଆର୍ଲେକର ବିଜୟଙ୍କୁ ପଦ ଓ ଗୋପନୀୟତାର ଶପଥ ପାଠ କରାଇଛନ୍ତି । ପ୍ରାୟ ୬୦ ବର୍ଷ ପରେ ରାଜ୍ୟରେ DMK ଏବଂ AIADMK ବ୍ୟତୀତ କୌଣସି ତୃତୀୟ ଦଳ କ୍ଷମତାକୁ ଆସିଛି ।

ତେବେ ଏହି ଶପଥ ଗ୍ରହଣ ଏତେ ସହଜ ନଥିଲା । ନିର୍ବାଚନରେ ବିଜୟଙ୍କ ଦଳ ‘ତାମିଲଗା ଭେଟ୍ଟ୍ରି କାଜାଗାମ’ ୧୦୮ଟି ଆସନ ଜିତି ଏକକ ସଂଖ୍ୟାଗରିଷ୍ଠ ଦଳ ହୋଇଥିଲେ ମଧ୍ୟ ସଂଖ୍ୟା ଗରିଷ୍ଠତା ପାଇଁ ୧୧୮ଟି ସିଟ୍ ଦରକାର ଥିଲା । ଗତ ୫ ଦିନ ଧରି ଚାଲିଥିବା ରାଜନୈତିକ ଟଣାଓଟରା । ରାଜ୍ୟପାଳଙ୍କ ସହ ବାରମ୍ବାର ବୈଠକ ଏବଂ ବିରୋଧୀଙ୍କ ଚକ୍ରବ୍ୟୁହ ଭିତରେ ବିଜୟଙ୍କୁ ଅନେକ ସମସ୍ୟାର ସାମ୍ନା କରିବାକୁ ପଡ଼ିଥିଲା । କିନ୍ତୁ ଶେଷରେ କଂଗ୍ରେସ, ବାମଦଳ ଏବଂ VCK ର ସମର୍ଥନ ପରେ ୧୨୦ ଜଣ ବିଧାୟକଙ୍କ ସହ ବିଜୟ ସରକାର ଗଠନ କରିବାକୁ ସକ୍ଷମ ହୋଇଛନ୍ତି ।