ନିକଟରେ ପାକିସ୍ତାନର ସାମରିକ ବାହିନୀରେ ଏକ ବଡ଼ ସାଂଗଠନିକ ପରିବର୍ତ୍ତନ ହୋଇଛି । ପାକିସ୍ତାନ ସେନା ମୁଖ୍ୟ ଅସୀମ ମୁନିରଙ୍କୁ ଅଧିକ କ୍ଷମତା ପ୍ରଦାନ କରାଯାଇଛି । ତାଙ୍କୁ ପାକିସ୍ତାନର ପ୍ରଥମ CDF ଭାବେ ନିଯୁକ୍ତି କରାଯାଇଛି । ଯାହା ତାଙ୍କୁ ପାକିସ୍ତାନର ସ୍ଥଳ ସେନା, ନୌସେନା ଓ ବାୟୁସେନାର ମୁଖ୍ୟ କରିଛି । ଏହା ଦର୍ଶାଉଛି ଯେ ଅସୀମ ମୁନିର ହେଉଛନ୍ତି ପାକିସ୍ତାନର ସବୁଠାରୁ ଶକ୍ତିଶାଳୀ ବ୍ୟକ୍ତି । ଏହା ବ୍ୟତୀତ ମୁନିରଙ୍କୁ ପାକିସ୍ତାନର ପରମାଣୁ ଅସ୍ତ୍ର ବ୍ୟବସ୍ଥାର ଦାୟତ୍ବ ମଧ୍ୟ ଦିଆଯାଇଛି ।

ପାକିସ୍ତାନରେ ଏହି ବଡ଼ ପରିବର୍ତ୍ତନ ଏବଂ ପରମାଣୁ ଅସ୍ତ୍ର ବ୍ୟବସ୍ଥାର ନିୟନ୍ତ୍ରଣ ଅସୀମ ମୁନିରଙ୍କୁ ହସ୍ତାନ୍ତର ପରେ ଲୋକମାନେ ଭାରତର ପରମାଣୁ ଅସ୍ତ୍ର ଉପରେ ପ୍ରଶ୍ନ ଉଠାଇଛନ୍ତି। ଲୋକମାନେ ଜାଣିବାକୁ ଚାହୁଁଛନ୍ତି ଯେ ଭାରତରେ ପରମାଣୁ ଅସ୍ତ୍ର କିଏ ନିୟନ୍ତ୍ରଣ କରେ ? ପ୍ରଧାନମନ୍ତ୍ରୀ ସିଧାସଳଖ ପରମାଣୁ ଅସ୍ତ୍ର ବ୍ୟବହାର ପାଇଁ ନିର୍ଦ୍ଦେଶ ଦେଇପାରିବେ କି ? ଏଥିପାଇଁ କ’ଣ ନିୟମ ଅଛି ? ଆସନ୍ତୁ ଜାଣିବା...

ଭାରତର ପରମାଣୁ ନୀତି କ’ଣ?

ଭାରତ ବିଶ୍ୱର ୯ଟି ପରମାଣୁ ଅସ୍ତ୍ରଶସ୍ତ୍ର ସମ୍ପନ୍ନ ଦେଶ ମଧ୍ୟରୁ ଗୋଟିଏ । ତଥାପି ଭାରତର ପରମାଣୁ ନୀତି ଅନ୍ୟ ଦେଶଠାରୁ ଭିନ୍ନ । ଭାରତର ମତ ସ୍ପଷ୍ଟ ଯେ ଏହା କୌଣସି ଦେଶ ଉପରେ ଆକ୍ରମଣ କରିବା ପାଇଁ ନୁହେଁ ବରଂ ପରମାଣୁ ଅସ୍ତ୍ରଶସ୍ତ୍ର ଥିବା ରାଷ୍ଟ୍ରଗୁଡ଼ିକଠାରୁ ନିଜକୁ ରକ୍ଷା କରିବା ପାଇଁ ପରମାଣୁ ଅସ୍ତ୍ର ବିକଶିତ କରିଛି । ତେଣୁ ଭାରତ କେବେବି କୌଣସି ଦେଶ ଉପରେ ପରମାଣୁ ଆକ୍ରମଣ କରିବ ନାହିଁ । ଏହି ପରିପ୍ରେକ୍ଷୀରେ, ଭାରତ ''ନୋ ଫାଷ୍ଟ୍ ୟୁଜ୍‌ (No First Use) ନୀତି ଅନୁସରଣ କରେ । ଏହାର ଅର୍ଥ ହେଉଛି ଯେପର୍ଯ୍ୟନ୍ତ ଭାରତ ପରମାଣୁ ଆକ୍ରମଣର ବିପଦର ସମ୍ମୁଖୀନ ନହୁଏ, ଭାରତ ଏହି ଅସ୍ତ୍ର ବ୍ୟବହାର କରିବ ନାହିଁ ।

ପରମାଣୁ ଅସ୍ତ୍ରକୁ କିଏ ନିୟନ୍ତ୍ରଣ କରେ?

ତେବେ ପରମାଣୁ ଅସ୍ତ୍ର ଲଞ୍ଚ କରିବା ପାଇଁ କୌଣସି ଗୋଟିଏ ରିମୋଟ୍ ନଥାଏ । ସବୁଠାରୁ ଗୁରୁତ୍ୱପୂର୍ଣ୍ଣ କଥା ହେଉଛି, ଭାରତରେ ପରମାଣୁ ଅସ୍ତ୍ର ଜଣେ ବ୍ୟକ୍ତି ଦ୍ୱାରା ନିୟନ୍ତ୍ରିତ ହୁଏ ନାହିଁ । ପ୍ରଧାନମନ୍ତ୍ରୀ ମଧ୍ୟ ଏକାକୀ ପରମାଣୁ ଅସ୍ତ୍ର ବ୍ୟବହାର ପାଇଁ ନିର୍ଦ୍ଦେଶ ଦେଇପାରିବେ ନାହିଁ । ଏଥିପାଇଁ ଭାରତ ସରକାରଙ୍କ ଦ୍ୱାରା ନିୟମ ଏବଂ ନିୟମାବଳୀ ସ୍ଥାପନ କରାଯାଇଛି । ଭାରତରେ ପରମାଣୁ ଅସ୍ତ୍ର ବ୍ୟବହାର ସମ୍ପର୍କରେ ଚୂଡ଼ାନ୍ତ ନିଷ୍ପତ୍ତି ପରମାଣୁ କମାଣ୍ଡ ଅଥରିଟି ଦ୍ୱାରା ନିଆଯାଇଥାଏ । ଏହି ଅଥରିଟି ଦୁଇ ଭାଗରେ ବିଭକ୍ତ । ପ୍ରଥମ ହେଉଛି ରାଜନୈତିକ ପରିଷଦ ଏବଂ ଅନ୍ୟଟି ହେଉଛି କାର୍ଯ୍ୟନିର୍ବାହୀ ପରିଷଦ । ପ୍ରଧାନମନ୍ତ୍ରୀ ରାଜନୈତିକ ପରିଷଦର ଅଧ୍ୟକ୍ଷତା କରିଥାନ୍ତି ସେହିପରି କାର୍ଯ୍ୟନିର୍ବାହୀ ପରିଷଦର ଅଧ୍ୟକ୍ଷତା ଜାତୀୟ ସୁରକ୍ଷା ପରାମର୍ଶଦାତା(NSA) କରିଥାନ୍ତି । ପରମାଣୁ ଅସ୍ତ୍ର କେବଳ ସେମାନଙ୍କ ନିର୍ଦ୍ଦେଶରେ ଲଞ୍ଚ କରାଯାଇପାରିବ ।