Pia Dandiya / ୧୩ ବର୍ଷ ବୟସରୁ ରାଜନୀତି ସ୍ୱପ୍ନ; ଆମେରିକା ପାର୍ଲାମେଣ୍ଟରେ ପହଞ୍ଚିଲେ ମୂଳ ଭାରତୀୟ ପିଆ ଦାଣ୍ଡିଆ

ନୂଆଦିଲ୍ଲୀ: ଛୋଟବେଳୁ ରାଜନୀତିରେ ଆସିବାର ସ୍ୱପ୍ନ ଦେଖୁଥିଲେ । ମାତ୍ର ୧୩ ବର୍ଷ ବୟସରେ ବାପାଙ୍କୁ କହିଥିଲେ, ସେ ଡାକ୍ତର ନୁହେଁ, ଜଣେ ରାଜନେତା ହେବାକୁ ଚାହାନ୍ତି । ଏପରିକି ଦିନେ ଆମେରିକାର ରାଷ୍ଟ୍ରପତି ହେବାର ସ୍ୱପ୍ନ ମଧ୍ୟ ଦେଖିଥିଲେ । ଆଜି ସେହି ସ୍ୱପ୍ନର ଗୋଟିଏ ବଡ଼ ପାହାଚ ଅତିକ୍ରମ କରିଛନ୍ତି ଭାରତୀୟ ବଂଶୋଦ୍ଭବ ପିଆ ଦାଣ୍ଡିଆ । ଆମେରିକା ମିଡଟର୍ମ ଇଲେକ୍ସନରେ ପିଆ ରିପବ୍ଲିକାନ ପାର୍ଟିର ପ୍ରାର୍ଥୀଙ୍କୁ ହରାଇ ଦ୍ଵିତୀୟ ଭାରତୀୟ-ଆମେରିକୀୟ ମହିଳା ଭାବରେ ଆମେରିକା ପାର୍ଲାମେଣ୍ଟ (ୟୁଏସ କଂଗ୍ରେସ)ରେ ପହଞ୍ଚିଛନ୍ତି ।

ଆମେରିକାର ଫ୍ଲୋରିଡାରୁ ଡେମୋକ୍ରାଟିକ୍ ପାର୍ଟିର ପ୍ରାର୍ଥୀ ଭାବେ ନିର୍ବାଚନ ଲଢ଼ିଥିଲେ । ନଭେମ୍ବର ୩ ତାରିଖରେ ଆମେରିକାରେ ମିଡଟର୍ମ ଇଲେକ୍ସନ ହୋଇଥିଲା । ଏଥିରେ ସେ ଡୋନାଲ୍ଡ ଟ୍ରମ୍ପଙ୍କ ଦଳ ରିପବ୍ଲିକାନ ପାର୍ଟିର ପ୍ରାର୍ଥୀ କେସି ଅସକରଙ୍କୁ ହରାଇ ୫୧ ପ୍ରତିଶତ ଭୋଟ୍ ପାଇ ଆମେରିକା ପାର୍ଲାମେଣ୍ଟକୁ ନିର୍ବାଚିତ ହୋଇଛନ୍ତି ପିଆ । ଫ୍ଲୋରିଡାର ୨୨ତମ କଂଗ୍ରେସନାଲ୍ ଜିଲ୍ଲାରୁ ସେ ବିଜୟୀ ହୋଇଛନ୍ତି ।

• ପରିବାରରେ ଖୁସିର ମାହୋଲ

ପିଆଙ୍କ ସଫଳତାକୁ ନେଇ ତାଙ୍କ ପରିବାରରେ ଖୁସିର ମାହୋଲ। ତାଙ୍କ ସମ୍ପର୍କୀୟ ଭାଇ ଧ୍ରୁବ ଦାଣ୍ଡିଆ ଗଣମାଧ୍ୟମକୁ କହିଛନ୍ତି, "ଏହା ସମଗ୍ର ପରିବାର ପାଇଁ ଗର୍ବର ମୁହୂର୍ତ୍ତ । ସେ ଦାଣ୍ଡିଆ ପରିବାରର ନାମକୁ ବିଶ୍ୱ ସ୍ତରରେ ପହଞ୍ଚାଇଛନ୍ତି । ସାରା ବିଶ୍ୱରେ ନିଜର ପରିଚୟ ସୃଷ୍ଟି କରିଛନ୍ତି ।" ପିଆଙ୍କ ବାପା ରୋହିତ ଦାଣ୍ଡିଆ ଓ ଜେଜେବାପା ଉଭୟ ଡାକ୍ତର ଥିଲେ । ତେବେ ପରିବାରର ଡାକ୍ତରୀ ପରମ୍ପରାକୁ ଛାଡ଼ି ରାଜନୀତିକୁ ନିଜର ଲକ୍ଷ୍ୟ କରିଥିଲେ ପିଆ । ତାଙ୍କ ବାପା ମଧ୍ୟ ଏହି ନିଷ୍ପତ୍ତିରେ ସମର୍ଥନ ଜଣାଇଥିଲେ।

• ରାଜସ୍ଥାନର ମୂଳ ବାସିନ୍ଦା

ପିଆଙ୍କ ମାତାପିତା ୧୯୮୦ ଦଶକରେ ରାଜସ୍ଥାନର ଜୟପୁରରୁ ଆମେରିକାକୁ ଯାଇଥିଲେ । ଆମେରିକାର ପାମ୍ ବିଚ୍ କାଉଣ୍ଟିରେ ଜନ୍ମ ନେଇଥିବା ପିଆ ହାର୍ଭାର୍ଡ ବିଶ୍ୱବିଦ୍ୟାଳୟରେ ପାଠ ପଢ଼ିଥିଲେ । ପାଠପଢ଼ା ପରେ ଭାରତକୁ ଆସି କିଛି ମାସ ଧରି ବସ୍ତି ଅଞ୍ଚଳର ପିଲାମାନଙ୍କୁ ଶିକ୍ଷାଦାନ କରିଥିଲେ । ପରେ ମାତ୍ର ୨୮ ବର୍ଷ ବୟସରେ ନ୍ୟୁୟର୍କର ହାର୍ଲେମ୍‌ରେ ଆଫ୍ରିକୀୟ-ଆମେରିକୀୟ ଛାତ୍ରଛାତ୍ରୀଙ୍କ ପାଇଁ ଏକ ସ୍କୁଲ୍ ପ୍ରତିଷ୍ଠା କରିଥିଲେ ।

• ସକାରାତ୍ମକ ରାଜନୀତିକୁ ଗୁରୁତ୍ଵ

ସ୍କୁଲ୍‌ର ଅଧିକାଂଶ ଛାତ୍ରଛାତ୍ରୀ ଆର୍ଥିକ ଦୃଷ୍ଟିରୁ ଅନଗ୍ରସର ଥିଲେ । ସେମାନଙ୍କୁ ଶିକ୍ଷାଦାନ କରିବା ସହ ସ୍କୁଲ୍‌ର ଚିତ୍ର ବଦଳାଇବାରେ ସଫଳ ହୋଇଥିଲେ ପିଆ । ଶିକ୍ଷା ମାଧ୍ୟମରେ ସମାଜରେ ପରିବର୍ତ୍ତନ ଆଣିବାର ତାଙ୍କ ଲକ୍ଷ୍ୟ ଧୀରେ ଧୀରେ ରାଜନୀତି ଆଡ଼କୁ ଅଗ୍ରସର ହୋଇଥିଲା । ପିଆଙ୍କ ସକାରାତ୍ମକ ମନୋଭାବକୁ ମଧ୍ୟ ପ୍ରଶଂସା କରିଛନ୍ତି ଧ୍ରୁବ । ତାଙ୍କ କହିବା ଅନୁଯାୟୀ, ନିର୍ବାଚନ ପ୍ରଚାର ସମୟରେ ବିରୋଧୀଙ୍କ ଅଭିଯୋଗର ଜବାବ ସେ ସବୁବେଳେ ଗଠନମୂଳକ ଭାବେ ଦେଉଥିଲେ । ନକାରାତ୍ମକ ରାଜନୀତିରୁ ଦୂରେଇ ରହି ସକାରାତ୍ମକ ରାଜନୀତି ଓ ଜନସେବାକୁ ସେ ଗୁରୁତ୍ୱ ଦେଉଥିଲେ ।

ପଢନ୍ତୁ ଏହି ଖବର: ଆମେରିକା ମଧ୍ୟବର୍ତ୍ତୀ ନିର୍ବାଚନରେ ଟ୍ରମ୍ପଙ୍କୁ ଝଟକା, ଭାରତ ପାଇଁ କମିଲା ଟ୍ରେଡ୍ ଡିଲ୍‌ର ଚାପ

ଆମେରିକାରେ ବଢ଼ୁଥିବା ମୁଦ୍ରାସ୍ଫୀତି ତାଙ୍କର ମୁଖ୍ୟ ପ୍ରାଥମିକତା ରହିବ ବୋଲି ଧ୍ରୁବ କହିଛନ୍ତି। ଆମେରିକା-ଇରାନ ଯୁଦ୍ଧ ଯୋଗୁଁ ମୁଦ୍ରାସ୍ଫୀତି ବଢ଼ିଥିବା ନେଇ ସେ ଉଲ୍ଲେଖ କରିଛନ୍ତି । ଶିକ୍ଷାଦାନରୁ ରାଜନୀତି, ଆଉ ଏବେ ଆମେରିକାର ସଂସଦ ପର୍ଯ୍ୟନ୍ତ ପିଆ ଦାଣ୍ଡିଆଙ୍କ ଯାତ୍ରା ଭାରତୀୟ ବଂଶୋଦ୍ଭବଙ୍କ ପାଇଁ ଏକ ପ୍ରେରଣାଦାୟକ କାହାଣୀ ହୋଇଛି ।