August 11 Independence Day / ଦେଶର ଏହି ୨ ମନ୍ଦିରରେ କାହିଁକି ଅଗଷ୍ଟ ୧୧ରେ ପାଳନ ହୁଏ ସ୍ଵାଧୀନତା ଦିବସ ? ଜାଣନ୍ତି କି

ଦେଶ ସାରା ଅଗଷ୍ଟ ୧୫ ତାରିଖରେ ପାଳନ କରାଯାଏ ସ୍ଵାଧୀନତା ଦିବସ । ମାତ୍ର ମଧ୍ୟପ୍ରଦେଶରେ ଏପରି ଦୁଇଟି ମନ୍ଦିର ଅଛି ଯେଉଁଠି ୪ ଦିନ ପୂର୍ବରୁ ଅର୍ଥାତ ଅଗଷ୍ଟ ୧୧ ତାରିଖରେ ସ୍ଵାଧୀନତାର ଉତ୍ସବ ପାଳନ ହୁଏ । ରାଜ୍ୟର ମନ୍ଦସୌରର ପଶୁପତିନାଥ ଓ ଉଜ୍ଜୈନର ବଡ଼ ଗଣେଶ ମନ୍ଦିରରେ ଏହି ପ୍ରଥା ରହିଛି । ଅଗଷ୍ଟ ୧୧ ତାରିଖରେ ଉଭୟ ମନ୍ଦିରରେ ସ୍ଵତନ୍ତ୍ର ପୂଜାପାଠ କରାଯିବା ସହ ତ୍ରିରଙ୍ଗା ଯାତ୍ରା ଓ ଧ୍ଵଜାରୋହଣ କରାଯାଏ ।

ଏବେ ପ୍ରଶ୍ନ ଉଠୁଛି ଯେତେବେଳେ ସାରା ଭାରତବର୍ଷ ଅଗଷ୍ଟ ୧୫ ତାରିଖକୁ ସ୍ଵାଧୀନତା ଦିବସ ମାନୁଛି, ଦେଶ ଭିତରେ ଥାଇ ମଧ୍ୟ ଏହି ଦୁଇଟି ମନ୍ଦିରରେ ଏପରି ଭିନ୍ନ ପ୍ରଥା କାହିଁକି ପ୍ରଚଳିତ ହୋଇଆସୁଛି । ଏହି ପ୍ରଥାର ପ୍ରକୃତ କାରଣ ହେଉଛି ଏକ ସ୍ଵତନ୍ତ୍ର ପରମ୍ପରା ଓ ହିନ୍ଦୁ ପଞ୍ଚାଗ ତାରିଖ । ଏକ ଏଜେନ୍ସିର ରିପୋର୍ଟ ମୁତାବକ, ମନ୍ଦସୌର ପଶୁପତିନାଥ ମନ୍ଦିର ଓ ଉଜ୍ଜୈନ ବଡ଼ ଗଣେଶ ମନ୍ଦିରରେ ସ୍ଵାଧୀନତା ଦିବସ ପାଳନ କରିବାର ତାରିଖ ଇଂଲିଶ କ୍ୟାଲେଣ୍ଡର ଅପେକ୍ଷା ହିନ୍ଦୁ ପଞ୍ଚାଗ ଆଧାରରେ ନିର୍ଦ୍ଧାରଣ କରାଯାଏ ।

• କଣ ଏହା ପଛର କାରଣ ?

ମନ୍ଦିର ସହ ଜଡ଼ିତ ଲୋକଙ୍କ ଅନୁସାରେ, ୧୯୪୭ ଅଗଷ୍ଟ ୧୫ ତାରିଖରେ ଭାରତ ଇଂରେଜ ଶାସନରୁ ଆଜାଦ୍ ହୋଇଥିଲା । ସେହି ଦିନ ହିନ୍ଦୁ ପଞ୍ଚାଗ ଅନୁସାରେ ଶ୍ରାବଣ କୃଷ୍ଣ ଚତୁର୍ଦ୍ଦଶୀ ଥିଲା । ଏଥିଲାଗି ଦୁଇ ମନ୍ଦିରରେ ପ୍ରତିବର୍ଷ ଶ୍ରାବଣ କୃଷ୍ଣ ଚତୁର୍ଦ୍ଦଶୀରେ ସ୍ଵାଧୀନତା ଦିବସ ପାଳନ କରାଯାଏ । ଚଳିତ ବର୍ଷ ଏହି ତିଥି ଅଗଷ୍ଟ ୧୧ ତାରିଖରେ ପଡୁଛି । ଏଥିଲାଗି ଏହି ଦୁଇ ମନ୍ଦିରରେ ୪ ଦିନ ପୂର୍ବରୁ ପାଳିତ ହେଉଛି ସ୍ଵାଧୀନତା ଦିବସ ।

• ପଶୁପତିନାଥରେ ହେଲା ସ୍ଵତନ୍ତ୍ର ଅଭିଷେକ

ମନ୍ଦସୌରର ଶିବନା ନଦୀକୂଳରେ ଥିବା ପୁରାତନ ପଶୁପତିନାଥ ମନ୍ଦିରରେ ଗତ ମଙ୍ଗଳବାର ସ୍ଵାଧୀନତା ଦିବସ ଅବସରରେ ଅନେକ ଧାର୍ମିକ କାର୍ଯ୍ୟକ୍ରମ ଅନୁଷ୍ଠିତ ହୋଇଥିଲା । ଇନ୍ଦୋରଠାରୁ ପ୍ରାୟ ୨୫୦ କିଲୋମିଟର ଦୂର ଏହି ମନ୍ଦିରରେ ଭଗବାନ ପଶୁପତିନାଥଙ୍କ ଅଷ୍ଟମୁଖ ବିଶିଷ୍ଟ ଶିବଲିଙ୍ଗର ସ୍ଵତନ୍ତ୍ର ଭାବେ ସଜା ଯାଇଥିଲା । ଏହି କାର୍ଯ୍ୟକ୍ରମରେ ପ୍ରାୟ ୨୫୦ ଜଣ ଶ୍ରଦ୍ଧାଳୁ ସାମିଲ ହୋଇଥିଲେ । ଏହି ସମୟରେ ବୈଦିକ ମନ୍ତ୍ରଧ୍ଵନିରେ ଶିବଲିଙ୍ଗର ଅଭିଷେକ କରାଯାଇଥିଲା । ୧୯୮୫ରୁ ଏହି ପରମ୍ପରା ଏଠାରେ ପ୍ରଚଳିତ ହୋଇଆସୁଛି ।

ପଢନ୍ତୁ ଏହି ଖବର: ସ୍ୱାଧୀନତା ଦିବସ ପୂର୍ବରୁ ୧୦୫୭ ଜଣ କର୍ମଚାରୀଙ୍କୁ ବୀରତ୍ୱ ଏବଂ ସେବା ପଦକ ପ୍ରଦାନ

• ଦେଶଭକ୍ତିରେ ବୁଡ଼ିଲା ଉଜ୍ଜୈନ ଗଣେଶ ମନ୍ଦିର

ଉଜ୍ଜୈନର ପ୍ରସିଦ୍ଧ ଗଣେଶ ମନ୍ଦିରରେ ମଧ୍ୟ ଅଗଷ୍ଟ ୧୧ ତାରିଖରେ ଦେଶଭକ୍ତିର ଝଲକ ଦେଖିବାକୁ ମିଳିଥିଲା । ଏଠାରେ ମଧ୍ୟ ଜାତୀୟ ପର୍ବ ଅନୁଷ୍ଠିତ ହୋଇଥିଲା । ମନ୍ଦିରର ପୂଜାରୀ ଅକ୍ଷତ ବ୍ୟାସ କହିଛନ୍ତି ଯେ ମନ୍ଦିରରେ ଜାତୀୟ ପର୍ବକୁ ଗ୍ରେଗୋରିୟନ କ୍ୟାଲେଣ୍ଡର ଅର୍ଥାତ ଦୁନିଆରେ ପ୍ରଚଳିତ ହେଉଥିବା ଇଂଲିଶ କ୍ୟାଲେଣ୍ଡର ତାରିଖ ବଦଳରେ ହିନ୍ଦୁ ପଞ୍ଚାଗ ତିଥି ଅନୁସାରେ ପାଳନ କରାଯାଏ । ଏହି ମନ୍ଦିରରେ ପ୍ରଭୁ ଗଣେଶଙ୍କୁ 'ରାଷ୍ଟ୍ର ଦେବ' ରୂପରେ ପୂଜା କରାଯାଏ । ଏଠାରେ ଅଗଷ୍ଟ ୧୧ ତାରିଖରେ ତ୍ରିରଙ୍ଗା ଶୋଭାଯାତ୍ରା ଅନୁଷ୍ଠିତ ହୋଇଥିଲା । ବିଶେଷ ପୂଜାର୍ଚ୍ଚନା ପରେ ମନ୍ଦିରର ମୁଖ୍ୟ ଶିଖରରେ ଜାତୀୟ ପତାକା ଉଡ଼ାଯାଇଥିଲା ।