ମହାନଗରଗୁଡ଼ିକରେ ଗିଗ୍ ଓ୍ୱାର୍କ ଇକୋନୋମି ଲୋକଙ୍କ ପାଇଁ ରୋଜଗାରର ନୂଆ ରାସ୍ତା ଖୋଲିଦେଇଛି । ଗୋଟିଏ ପଟେ ଅନେକ ପୁରୁଷ ଡେଲିଭରି ବୟ ଓ ବାଇକ୍ ରାଇଡର୍ ଭାବେ କାମ କରୁଥିବା ବେଳେ, ଅନ୍ୟପଟେ ଘରୋଇ ମହିଳାଙ୍କ ପାଇଁ ମଧ୍ୟ ବିଭିନ୍ନ ଆପ୍ ଆୟ କରିବାର ସୁଯୋଗ ଆଣିଛି । ଏହି ପ୍ଲାଟଫର୍ମଗୁଡ଼ିକରେ ଘର ସଫା କରିବା, ବାସନ ମାଜିବା ଭଳି ଘରୋଇ କାମ କରି ମହିଳାମାନେ ରୋଜଗାର କରିପାରିବେ । ତେବେ କାମ ଆରମ୍ଭ କରିବା ପୂର୍ବରୁ ଟ୍ରେନିଂ ନେବା ଜରୁରୀ ।

ପ୍ରୋଣ୍ଟୋ (Pronto) ଓ ସ୍ନାବିଟ୍ (Snabbit) ଭଳି ପ୍ଲାଟଫର୍ମ ସହ ଯୋଡ଼ି ହେଉଥିବା ମହିଳାଙ୍କୁ ମାଗଣାରେ ଟ୍ରେନିଂ ଦିଆଯାଉଛି । ଏହି ଟ୍ରେନିଂ କାର୍ଯ୍ୟକ୍ରମ ୩ ଦିନ ଧରି ଚାଲେ, ଯେଉଁଥିରେ ମୋଟ ୨୫ ଘଣ୍ଟାର ପ୍ରଶିକ୍ଷଣ ଦିଆଯାଏ । କାମ ଆରମ୍ଭ କରିବା ପୂର୍ବରୁ ମହିଳାମାନଙ୍କୁ ଆବଶ୍ୟକୀୟ କାର୍ଯ୍ୟପ୍ରଣାଳୀ, ସୁରକ୍ଷା ନିୟମ ଓ ଗ୍ରାହକଙ୍କ ସହ ଉଚିତ ବ୍ୟବହାର କରିବା ବିଷୟରେ ଶିକ୍ଷା ଦେବା ଏହାର ମୁଖ୍ୟ ଉଦ୍ଦେଶ୍ୟ ।

ଏହି ଟ୍ରେନିଂକୁ ସହଜ ଓ ବ୍ୟବହାରିକ କରିବା ଉପରେ ଗୁରୁତ୍ୱ ଦିଆଯାଏ । ନିକଟସ୍ଥ ଟ୍ରେନିଂ ସେଣ୍ଟରରେ ଅଭିଜ୍ଞ ପ୍ରଶିକ୍ଷକମାନେ ସରଳ ଭାଷାରେ ପ୍ରତ୍ୟେକ କାମ ବୁଝାଇଥାନ୍ତି । ବାସନ ମାଜିବା, ଘର ସଫା କରିବା ଓ କାମ ସମୟରେ ସୁରକ୍ଷା ନିୟମ ପାଳନ କରିବା ଭଳି ବିଷୟରେ ହାତକୁ କାମ ଦେଇ ଶିକ୍ଷା ଦିଆଯାଏ । ଏହାଦ୍ୱାରା ମହିଳାମାନେ କାମକୁ ଭଲ ଭାବେ ବୁଝିବା ସହ ଆତ୍ମବିଶ୍ୱାସର ସହ କାମ କରିପାରିବେ ।

ଟ୍ରେନିଂ ସମ୍ପୂର୍ଣ୍ଣ କରିବା ପରେ ମହିଳାମାନଙ୍କୁ ପ୍ରଥମ ୟୁନିଫର୍ମ ମଧ୍ୟ ମାଗଣାରେ ଦିଆଯାଏ । ଉଦାହରଣ ସ୍ୱରୂପ, ପ୍ରୋଣ୍ଟୋ ପକ୍ଷରୁ ଟି-ଶାର୍ଟ ଯୋଗାଇ ଦିଆଯାଏ । ଟ୍ରେନିଂରେ ଉତ୍ତୀର୍ଣ୍ଣ ହେବା ପରେ ପରଦିନଠାରୁ ପ୍ରଥମ ସିଫ୍ଟ ଆରମ୍ଭ କରି ରୋଜଗାର କରିବାର ସୁଯୋଗ ମିଳିପାରେ ।
ଏଥି ସହ ପଢନ୍ତୁ:  ବୀମା, ୧୦ ଲକ୍ଷର ପ୍ୟାକେଜ୍ ଓ ୫୦% ସଂରକ୍ଷଣ… ପୂର୍ବତନ ଅଗ୍ନିବୀରଙ୍କୁ ସରକାର ଦେବେ ଏସବୁ ସୁବିଧା  

କେବଳ ପ୍ରାରମ୍ଭିକ ଟ୍ରେନିଂ ନୁହେଁ, ନୂଆ ସେବା ଯୋଡ଼ାଯିବା, ସୁରକ୍ଷା ନିୟମରେ ପରିବର୍ତ୍ତନ ହେବା କିମ୍ବା ସେବାର ଗୁଣବତ୍ତା ବଢ଼ାଇବା ପାଇଁ ସମୟ ସମୟରେ ଅତିରିକ୍ତ ପ୍ରଶିକ୍ଷଣ ମଧ୍ୟ ଦିଆଯାଏ । ଅନେକ ମହିଳାଙ୍କ ପାଇଁ ଅଜଣା ଘରକୁ ଯାଇ କାମ କରିବା ଏକ ଚ୍ୟାଲେଞ୍ଜ ହୋଇଥାଏ । ଏହି ଦ୍ୱିଧା ଓ ଭୟ ଦୂର କରିବା ସହ କାମ ପ୍ରତି ଆତ୍ମବିଶ୍ୱାସ ବଢ଼ାଇବାରେ ଟ୍ରେନିଂ ସହାୟକ ହୋଇଥାଏ ।

ଏହି ବ୍ୟବସ୍ଥା ଜେପ୍ଟୋ (Zepto) ଓ ବ୍ଲିଙ୍କିଟ୍ (Blinkit) ଭଳି ଡେଲିଭରି ପ୍ଲାଟଫର୍ମଗୁଡ଼ିକ ନିଜ ପାର୍ଟନରମାନଙ୍କୁ ଦେଉଥିବା ପ୍ରଶିକ୍ଷଣ ସହ ସମାନ । ଗିଗ୍ ଓ୍ୱାର୍କ ଇକୋନୋମିର ଏହି ନୂଆ ଧାରା ମହିଳାମାନଙ୍କୁ ଆର୍ଥିକ ଭାବେ ସ୍ୱାବଲମ୍ବୀ ହେବା ଦିଗରେ ଏକ ନୂଆ ସୁଯୋଗ ଦେଉଛି ।