UP Leaders Bulletproof Jackets / UPରେ ୫୨ ନେତାଙ୍କୁ ମିଳିଲା ସୁରକ୍ଷା କବଚ, ଯୋଗୀ ଆଦିତ୍ୟନାଥ-ଅଖିଳେଶ-ମାୟାବତୀ ପିନ୍ଧିବେ ବୁଲେଟ୍‌ ପ୍ରୁଫ୍‌ ଜ୍ୟାକେଟ୍‌

ଉତ୍ତରପ୍ରଦେଶରେ ୨୦୨୭ ନିର୍ବାଚନ ପୂର୍ବରୁ ନେତାଙ୍କ ସୁରକ୍ଷାକୁ ନେଇ ବଡ଼ ପଦକ୍ଷେପ ନିଆଯାଇଛି । ମୁଖ୍ୟମନ୍ତ୍ରୀ ଯୋଗୀ ଆଦିତ୍ୟନାଥ, ଅଖିଳେଶ ଯାଦବ ଓ ମାୟାବତୀଙ୍କ ସମେତ ୫୨ ଜଣ ନେତାଙ୍କୁ ଦିଆଯାଇଛି ବୁଲେଟ୍‌ ପ୍ରୁଫ୍ ଜ୍ୟାକେଟ୍ । ତେବେ ନିର୍ବାଚନ ପୂର୍ବରୁ ହଠାତ୍ ନେତାଙ୍କ ସୁରକ୍ଷାକୁ ନେଇ କାହିଁକି ଏତେ ବଡ଼ ପ୍ରସ୍ତୁତି ? ଆଉ ଏହି ୫୨ ଜଣଙ୍କ ତାଲିକାରେ କେଉଁ କେଉଁ ବଡ଼ ନେତା ଅଛନ୍ତି ?

ସୂଚନା ଅନୁସାରେ, ବୁଲେଟପ୍ରୁଫ୍ ଜ୍ୟାକେଟ୍ ପାଇଥିବା ୫୨ ଜଣଙ୍କ ମଧ୍ୟରେ ଉତ୍ତରପ୍ରଦେଶ ସରକାରଙ୍କ ୧୧ ଜଣ ମନ୍ତ୍ରୀ ମଧ୍ୟ ସାମିଲ ଅଛନ୍ତି । ମନ୍ତ୍ରୀ ସଞ୍ଜୟ ନିଷାଦ, ନନ୍ଦ ଗୋପାଳ ଗୁପ୍ତା ନନ୍ଦୀ, ଓମ୍ ପ୍ରକାଶ ରାଜଭର ଏବଂ ଅପର୍ଣ୍ଣା ଯାଦବଙ୍କୁ ମଧ୍ୟ ଏହି ସୁରକ୍ଷା କବଚ ଦିଆଯାଇଛି । ଏହାଛଡ଼ା ସ୍ୱତନ୍ତ୍ର ଦେବ ସିଂହ, ଜୟବୀର ସିଂହ ଏବଂ ମହେନ୍ଦ୍ର ସିଂହଙ୍କ ଭଳି ନେତାମାନେ ମଧ୍ୟ ବୁଲେଟପ୍ରୁଫ୍ ଜ୍ୟାକେଟ୍ ପାଇଛନ୍ତି ।

ଅଧିକ ପଢ଼ନ୍ତୁ: କାହିଁକି ହଠାତ୍ ବଢ଼ୁଛି ଚିନି ଦର ? କାରଣ କହିଲେ କେନ୍ଦ୍ର ସରକାର

୨୦୨୭ ନିର୍ବାଚନ ପୂର୍ବରୁ ବଡ଼ ପ୍ରସ୍ତୁତି

ଉତ୍ତରପ୍ରଦେଶରେ ୨୦୨୭ ମସିହାରେ ବିଧାନସଭା ନିର୍ବାଚନ ହେବ । ଏହା ପୂର୍ବରୁ ନେତାମାନଙ୍କ ସୁରକ୍ଷାକୁ ନେଇ ସରକାରଙ୍କ ଏହି ପଦକ୍ଷେପକୁ ଗୁରୁତ୍ୱପୂର୍ଣ୍ଣ ମନେ କରାଯାଉଛି । ପ୍ରଥମ ପର୍ଯ୍ୟାୟରେ ୮ ଜଣ ଏବଂ ଦ୍ୱିତୀୟ ପର୍ଯ୍ୟାୟରେ ୪୪ ଜଣ ନେତାଙ୍କୁ ବୁଲେଟପ୍ରୁଫ୍ ଜ୍ୟାକେଟ୍ ଦିଆଯାଇଛି ।
ଏହା ସହିତ ରାଜ୍ୟରେ ୯୮ ଜଣ ନେତା ଏବଂ ଅନ୍ୟାନ୍ୟ ଗୁରୁତ୍ୱପୂର୍ଣ୍ଣ ବ୍ୟକ୍ତିଙ୍କୁ ବିଭିନ୍ନ ଶ୍ରେଣୀର ସୁରକ୍ଷା ମଧ୍ୟ ଯୋଗାଇ ଦିଆଯାଇଛି । ଏଥିରେ Y ଠାରୁ Z ପର୍ଯ୍ୟନ୍ତ ବିଭିନ୍ନ ସୁରକ୍ଷା ବର୍ଗ ସାମିଲ ରହିଛି ।

କାହିଁକି ଦିଆଯାଉଛି ବୁଲେଟପ୍ରୁଫ୍ ଜ୍ୟାକେଟ୍ ?

ସୁରକ୍ଷା ମୁଖ୍ୟାଳୟ ପକ୍ଷରୁ ପ୍ରତିବର୍ଷ ବୁଲେଟପ୍ରୁଫ୍ ଜ୍ୟାକେଟ୍ କିଣାଯାଇଥାଏ । ସୁରକ୍ଷାରେ ନିୟୋଜିତ ଯବାନ ଏବଂ ଆବଶ୍ୟକତା ଅନୁସାରେ ନେତାମାନଙ୍କ ପାଇଁ ଏହି ଜ୍ୟାକେଟ୍ ବ୍ୟବସ୍ଥା କରାଯାଏ । ଚଳିତଥର ଯେଉଁ ନେତାମାନଙ୍କୁ ପୂର୍ବରୁ ସୁରକ୍ଷା ମିଳିଛି, ସେମାନଙ୍କ ମଧ୍ୟରୁ କିଛି ନେତାଙ୍କୁ ମଧ୍ୟ ବୁଲେଟପ୍ରୁଫ୍ ଜ୍ୟାକେଟ୍ ଦିଆଯାଉଛି।
ଉତ୍ତରପ୍ରଦେଶରେ ୯୮ ଜଣ ନେତା ଓ ଗୁରୁତ୍ୱପୂର୍ଣ୍ଣ ବ୍ୟକ୍ତି ବିଭିନ୍ନ ସୁରକ୍ଷା ବର୍ଗରେ ଥିବାବେଳେ, ସେମାନଙ୍କ ମଧ୍ୟରୁ ୫୨ ଜଣଙ୍କୁ ବୁଲେଟପ୍ରୁଫ୍ ଜ୍ୟାକେଟ୍ ଦିଆଯାଇଛି । ୨୦୨୭ ନିର୍ବାଚନ ପୂର୍ବରୁ ସୁରକ୍ଷା ମୁଖ୍ୟାଳୟର ଏହି ପଦକ୍ଷେପ ଏବେ ରାଜ୍ୟ ରାଜନୀତିରେ ଚର୍ଚ୍ଚାର ବିଷୟ ପାଲଟିଛି ।