ଆସାମର ଲୋକପ୍ରିୟ କଣ୍ଠଶିଳ୍ପୀ ଜୁବିନ ଗର୍ଗଙ୍କ ମୃତ୍ୟୁ ଘଟଣାର ତଦନ୍ତ ଶେଷ ହୋଇଛି । ଡିସେମ୍ବର ୧୨ ତାରିଖରେ ଏହି ଚାଞ୍ଚଲ୍ୟକର ମାମଲାରେ ଏକ ଚାର୍ଜସିଟ୍‌ ଦାଖଲ କରାଯିବ ବୋଲି ଆସାମ ପୋଲିସ୍‌ ଶନିବାର ଦିନ ସ୍ପଷ୍ଟ କରିଛି । ଗୌହାଟୀରେ CID ସ୍ୱତନ୍ତ୍ର ପୋଲିସ ମହାନିର୍ଦ୍ଦେଶକ ମୁନ୍ନା ପ୍ରସାଦ ଗୁପ୍ତା ଏହି ସୂଚନା ପ୍ରଦାନ କରିଛନ୍ତି। ଏହି ମାମଲାରେ ଏପର୍ଯ୍ୟନ୍ତ ସାତ ଜଣଙ୍କୁ ଗିରଫ କରାଯାଇଛି ଏବଂ ୩୦୦ରୁ ଅଧିକ ସାକ୍ଷୀଙ୍କୁ ପଚରାଉଚରା କରାଯାଇଛି ।

ସ୍ୱତନ୍ତ୍ର ପୋଲିସ ମହାନିର୍ଦ୍ଦେଶକ ମୁନ୍ନା ପ୍ରସାଦ ଗୁପ୍ତା କହିଛନ୍ତି ଯେ ଜୁବିନ ଗର୍ଗଙ୍କ ମୃତ୍ୟୁର ତଦନ୍ତ କରୁଥିବା ସ୍ୱତନ୍ତ୍ର ତଦନ୍ତ ଦଳ ତଦନ୍ତ କାର୍ଯ୍ୟ ଶେଷ କରିଛି । ଏହି ମାମଲାର ସମସ୍ତ ଡାଟା ଚାର୍ଜସିଟ୍‌ରେ ରଖାଯିବ । ସେ କହିଛନ୍ତି ଯେ ଜୁବିନ ଗର୍ଗଙ୍କ ମୃତ୍ୟୁ ପରେ ରାଜ୍ୟ ସାରା ଦାୟର ହୋଇଥିବା ପ୍ରାୟ ୬୦ଟି ଏଫଆଇଆର ପରେ ଦାୟର ହୋଇଥିବା CID ମାମଲା ନଂ ୧୮/୨୦୨୫ରେ ଚାର୍ଜସିଟ୍ ଦାଖଲ କରାଯିବ।

ସେ ଆହୁରି କହିଛନ୍ତି, ସମ୍ପତ୍ତି ମାମଲା ଏବଂ ଅନ୍ୟାନ କାର୍ଯ୍ୟକଳାପ ସହିତ ଜଡ଼ିତ ପୃଥକ ମାମଲା CID ମାମଲା ନଂ ୧୯/୨୦୨୫ ଅଧୀନରେ ପଞ୍ଜିକୃତ ହୋଇଛି ଏବଂ ବର୍ତ୍ତମାନ ତଦନ୍ତ ଚାଲିଛି । ଏହି ମାମଲାଗୁଡ଼ିକର ବିଭିନ୍ନ ଦୃଷ୍ଟିକୋଣରୁ ମଧ୍ୟ ତଦନ୍ତ କରାଯାଉଛି। ସେପ୍ଟେମ୍ବର ୧୯ ତାରିଖରେ ସିଙ୍ଗାପୁରରେ ସମୁଦ୍ରରେ ପହଁରିବା ସମୟରେ ଜୁବିନ ଗର୍ଗଙ୍କ ମୃତ୍ୟୁ ହୋଇଥିଲା। ସେ ୨୦୨୫ ମସିହାର ଉତ୍ତର-ପୂର୍ବ ଭାରତ ମହୋତ୍ସବରେ ଅଂଶଗ୍ରହଣ କରିବାକୁ ସେଠାକୁ ଯାଇଥିଲେ।

ଜୁବିନ ଗର୍ଗଙ୍କ ମୃତ୍ୟୁ ସମଗ୍ର ଆସାମରେ ହଇଚଇ ସୃଷ୍ଟି କରିଥିଲା। ନଭେମ୍ବର ୨୬ ତାରିଖରେ ମୁଖ୍ୟମନ୍ତ୍ରୀ ହିମନ୍ତ ବିଶ୍ୱ ଶର୍ମା ଆସାମ ବିଧାନସଭାରେ କହିଥିଲେ ଯେ ସିଙ୍ଗାପୁରରେ ସମୁଦ୍ରରେ ପହଁରିବା ସମୟରେ ଜୁବିନ ଗର୍ଗଙ୍କ ମୃତ୍ୟୁ ଏକ ଦୁର୍ଘଟଣା ନୁହେଁ ବରଂ ଏକ ହତ୍ୟା । ଏହି ବୟାନ ପରେ ତଦନ୍ତକାରୀ ସଂସ୍ଥାଗୁଡ଼ିକ ତଦନ୍ତକୁ ଜୋରଦାର କରିଥିଲା ।

ଏହି ମାମଲାରେ ଜୁବିନ ଗର୍ଗଙ୍କ ଅନେକ ନିକଟତର ସହଯୋଗୀଙ୍କୁ ଗିରଫ କରାଯାଇଛି । ଏଥିରେ ଉତ୍ତର-ପୂର୍ବ ଭାରତ ମହୋତ୍ସବର ମୁଖ୍ୟ ଆୟୋଜକ ଶ୍ୟାମକାନୁ ମହାନ୍ତ, ଗାୟକଙ୍କ ପରିଚାଳକ ସିଦ୍ଧାର୍ଥ ଶର୍ମା, ତାଙ୍କ ବ୍ୟାଣ୍ଡ ସଦସ୍ୟ ଶେଖର ଜ୍ୟୋତି ଗୋସ୍ୱାମୀ ଏବଂ ଅମ୍ରିତ ପ୍ରଭା ମହାନ୍ତ, ତାଙ୍କ ସମ୍ପର୍କୀୟ ଭାଇ, ଆସାମ ପୋଲିସ ଡିଏସ୍ପି ସନ୍ଦିପାନ ଗର୍ଗ ଏବଂ ତାଙ୍କର ଦୁଇ ପିଏସ୍ଓ, ନନ୍ଦେଶ୍ୱର ବୋରା ଏବଂ ପ୍ରବୀଣ ବୈଶ୍ୟ ଅନ୍ତର୍ଭୁକ୍ତ। ସିଙ୍ଗାପୁର ପୋଲିସ ମଧ୍ୟ ଜୁବୀନ ଗର୍ଗଙ୍କ ବୁଡ଼ିଯିବା ଘଟଣାର ନିଜସ୍ୱ ତଦନ୍ତ କରୁଛି।

ଅକ୍ଟୋବର ୧୭ ତାରିଖରେ, SPF ଏକ ବିବୃତ୍ତି ଜାରି କରି କହିଛି ଯେ ପ୍ରାଥମିକ ତଦନ୍ତରେ ମୃତ୍ୟୁରେ କୌଣସି ଗଡ଼ବଡ଼ ସଙ୍କେତ ମିଳିନାହିଁ । ସମ୍ପୂର୍ଣ୍ଣ ତଦନ୍ତ ପାଇଁ ଆହୁରି ତିନି ମାସ ସମୟ ଲାଗି ପାରେ। ଏହା ପରେ, ରିପୋର୍ଟ ଷ୍ଟେଟ୍‌ କରୋନରଙ୍କ ନିକଟରେ ଦାଖଲ କରାଯିବ। ଆସାମ CID ର ଚାର୍ଜସିଟ୍ ଏବେ ଜୁବିନ ଗର୍ଗଙ୍କ ମୃତ୍ୟୁ ପଛରେ ପ୍ରକୃତ ଷଡ଼ଯନ୍ତ୍ର ଏବଂ ସମଗ୍ର ଘଟଣାର ପାଇଁ କିଏ ଦାୟୀ ତାହା ସ୍ପଷ୍ଟ କରିବ ବୋଲି ଆଶା କରାଯାଉଛି ।