ଛାତ୍ରଛାତ୍ରୀଙ୍କ ଜୀବନ ସହ ଖେଳ । ବିନା ଫିଟନେସରେ ଗଡୁଛି ରାଜ୍ୟର ବିଭିନ୍ନ ଶିକ୍ଷାନୁଷ୍ଠାନର ୧୧୭୧ ବସ୍‌ । ବିଧାନସଭାରେ ଖୋଦ ପରିବହନ ମନ୍ତ୍ରୀ ଏଭଳି ଉତ୍ତର ରଖିବା ପରେ ଅଭିଭାବକ ସଂଘ ଉଦବେଗ ପ୍ରକାଶ କରିଛି । ସେପଟେ ପରିବହନ ବିଭାଗରେ ନିୟୋଜିତ ହୋଇଥିବା ୨୪୨ଟି ଗାଡ଼ିର PUCC ଅବଧି ଶେଷ ହୋଇଥିବା ମଧ୍ୟ ତଥ୍ୟ ମିଳିଛି ।

ପିଲାମାନଙ୍କୁ ସ୍କୁଲ ବସ୍‌ରେ ପଠାଉଛନ୍ତି କି ? ସାବଧାନ ହୋଇ ଯାଆନ୍ତୁ । କେତେବେଳେ ବି ଘଟିପାରେ ଦୁର୍ଘଟଣା । କାରଣ ବିନା ଫିଟନେସରେ ଗଡ଼ୁଛି ରାଜ୍ୟର ବିଭିନ୍ନ ଶିକ୍ଷାନୁଷ୍ଠାନରେ ୧୧୭୧ ବସ୍‌ । ବଡ଼ କଥା ହେଉଛି ସବୁଠୁ ଅଧିକ ଧରପଗଡ଼ ହେଉଥିବା ରାଜଧାନୀ ଭୁବନେଶ୍ୱରର ୧୭ ସ୍କୁଲ ବସ୍‌ରେ ଫିଟନେସ ନାହିଁ । ବିଧାନସଭାରେ ଖୋଦ ପରିବହନ ମନ୍ତ୍ରୀ ଏଭଳି ଉତ୍ତର ରଖିବା ପରେ ଉଦବେଗ ପ୍ରକାଶ କରିଛି ଅଭିଭାବକ ସଂଘ । ରାଜ୍ୟର ବିଭିନ୍ନ ସ୍କୁଲର ୪୦୪୫ଟି ବସ୍‌ ପିଲାମାନଙ୍କୁ ନେବା ଆଣିବା କରୁଛି । ତେବେ ବିଭିନ୍ନ ସମୟରେ ବସ୍‌ଗୁଡିକୁ ଯାଞ୍ଜ କରାଯାଉଥିବା କହିଛି STA ।

କେବଳ ସ୍କୁଲ ବସ୍‌ ନୁହେଁ ସରକାରୀ କାର୍ଯ୍ୟରେ ଲାଗିଥିବା ମାଳ ମାଳ ଗାଡିର ବି ନାହିଁ PUCC । ବିଧାନସଭା ତଥ୍ୟ କହୁଛି ପରିବହନ ବିଭାଗ ଅଧୀନରେ ଥିବା ସମସ୍ତ କାର୍ଯ୍ୟାଳୟରେ ନିୟୋଜିତ ୨୪୨ଟି ଗାଡ଼ି ମଧ୍ୟରୁ ୪୪ଟି ଗାଡ଼ି ସରକାରଙ୍କ ନିଜସ୍ୱ ହୋଇଥିବା ବେଳେ ୧୯୮ ଗାଡ଼ି ଭଡ଼ାରେ ଲାଗିଛି । ତେବେ ଏହି ସବୁ ଗାଡ଼ିଗୁଡ଼ିକର PUCC ଅବଧି ୨୨ ଡିସେମ୍ବର ୨୦୨୫ରୁ ଶେଷ ହୋଇସାରିଛି । ପରିବହନ ମନ୍ତ୍ରୀ କହିଛନ୍ତି ATS ବା ଅଟୋମେଟିକ ଟେଷ୍ଟିଙ୍ଗ ସେଣ୍ଟର ଜରିଆରେ ଗାଡି ଗୁଡିକର ଫିଟନେସ ଦିଆଯିବ । ତୁରନ୍ତ ଗାଡିର ଫିଟନେସ ନ କଲେ RC ବାତିଲ କରାଯିବ ।

ନିୟମ ଅନୁସାରେ ଘରୋଇ ରେଜିଷ୍ଟ୍ରେସନ ଥିବା ଗାଡ଼ି କିଣା ହେବାରର ୧୫ ବର୍ଷ ପରେ ପ୍ରତି ୫ ବର୍ଷରେ ଥରେ ଫିଟନେସ ସାର୍ଟିଫିକେଟ ନବୀକରଣ କରିବା କଥା । ସେହିପରି ବ୍ୟବସାୟିକ ରେଜିଷ୍ଟ୍ରେସନ ଥିବା ଗାଡ଼ି କିଣା ହେବା ୨ ବର୍ଷ ପରେ ପ୍ରଥମ ଥର ଓ ପରେ ପ୍ରତି ୮ ବର୍ଷରେ ଥରେ ଫିଟନେସ ସାର୍ଟିଫିକେଟ ନବୀକରଣ କରିବା କଥା ।

ଫିଟନେସ୍‌ ନ ଥିଲେ ପ୍ରଥମ ଥର ୨ ହଜାରରୁ ୫ ହଜାର ଓ ପରେ ୫ ହଜାରରୁ ୧୦ ହଜାର ପର୍ଯ୍ୟନ୍ତ ଜରିମାନା ଦେବାକୁ ପଡ଼ୁଛି । ଫିଟନେସ୍‌ ନ ଥାଇ ଗାଡି ଚାଲୁଥିବାରୁ ଦୁର୍ଘଟଣା ବି ବଢୁଛି । ୨୦୨୪ ମସିହାର କ୍ରାଇମବ୍ରାଞ୍ଚ ରିପୋର୍ଟ ଅନୁସାରେ, ରାଜ୍ୟରେ ଦୈନିକ ୧୫ରୁ ୧୬ ଜଣ ସଡ଼କ ଦୁର୍ଘଟଣାରେ ମୃତ୍ୟୁବରଣ କରୁଥିବା ବେଳେ ଅଧିକାଂଶ ଗାଡିର ଫିଟନେସ ନ ଥିବା ମାମଲା ସାମ୍ନାକୁ ଆସୁଛି ।