ଭୁବନେଶ୍ଵର: ପୁଣି ୩୬ ଟପିଲା ତାପମାତ୍ରା । ଫେବ୍ରୁଆରୀ ଅଧା ହୋଇଥିବା ବେଳେ ବଢ଼ିଲାଣି ଖରାର ପ୍ରକୋପ । ଆଜି ରାଜ୍ୟର ୧୩ ସହରରେ ପାରଦ ୩୬ ଡିଗ୍ରୀ ଉପରେ ରହିଛି । ପାରଳାଖେମୁଣ୍ଡିରେ ରାଜ୍ୟର ସର୍ବୋଚ୍ଚ ଦିନ ତାପମାତ୍ରା ୩୬.୬ ଡିଗ୍ରୀ ରେକର୍ଡ କରା ଯାଇଥିବା ବେଳେ ଝାରସୁଗୁଡ଼ାରେ ୩୬.୨ ଡିଗ୍ରୀ, ଅନୁଗୁଳରେ ୩୬.୧ ଡିଗ୍ରୀ ରହିଛି ।

ସେହିଭଳି ବଲାଙ୍ଗିର, ଭବାନୀପାଟଣା, ଟିଟିଲାଗଡ଼ ଓ ବୌଦ୍ଧରେ ସର୍ବୋଚ୍ଚ ଦିନ ତାପମାତ୍ରା ୩୬ ଡିଗ୍ରୀ ରେକର୍ଡ ହୋଇଛି । ଢେଙ୍କାନାଳ ୩୫.୮ ଡିଗ୍ରୀ, ସମ୍ବଲପୁର ଓ ସୋନପୁରରେ ୨୫.୭ ଡିଗ୍ରୀ, ହୀରାକୁଦ ୩୫.୬ ଡିଗ୍ରୀ, ଭଦ୍ରକ ୩୫.୫ ଡିଗ୍ରୀ, ଭୁବନେଶ୍ଵର ୩୫.୪ ଡିଗ୍ରୀ ଓ ବାରିପଦାରେ ୩୫ ଡିଗ୍ରୀ ରେକର୍ଡ ହୋଇଛି । ଫେବ୍ରୁଆରୀରେ ଦ୍ଵିତୀୟଥର ପାଇଁ ରାଜଧାନୀ ଭୁବନେଶ୍ଵରର ତାପମାତ୍ରା ୩୫ ଡିଗ୍ରୀ ପାର୍ କରିଛି ।

ସେପଟେ ପାଣିପାଗ ବିଭାଗର ଆକଳନ ଏ ତାତିରୁ ସାମାନ୍ୟ ଆଶ୍ଵସ୍ତି ଦେବ ହାଲୁକା ବର୍ଷା । ରାଜ୍ୟରେ ଏବେ ଶୁଖିଲା ପାଗ ଜାରି ରହିଥିବା ବେଳେ ଆସନ୍ତା ୧୯ରୁ ୨୧ ତାରିଖ ପର୍ଯ୍ୟନ୍ତ ରାଜ୍ୟର କେତେକ ସ୍ଥାନରେ ମଧ୍ୟମରୁ ହାଲୁକା ବର୍ଷା ହେବା ସମ୍ଭାବନା ରହିଛି ।

ବିଶେଷ କରି ୧୯ ତାରିଖରେ ମୟୂରଭଞ୍ଜ, କେନ୍ଦୁଝର, ସୁନ୍ଦରଗଡ଼, ଭଦ୍ରକ, ଯାଜପୁର ଓ ଢେଙ୍କାନାଳରେ ହାଲୁକାରୁ ମଧ୍ୟମ ଧରଣର ବର୍ଷା ହୋଇପାରେ । କିଛି ସ୍ଥାନରେ ବିଜୁଳି ଓ ଘଡ଼ଘଡ଼ି ଆଶଙ୍କା ରହିଛି । ସେହିଭଳି ୨୦ ଓ ୨୧ ତାରିଖରେ କଟକ, ଢେଙ୍କାନାଳ, ଜଗତସିଂହପୁର, ଯାଜପୁର, କେନ୍ଦ୍ରାପଡା, ଭଦ୍ରକ, କେନ୍ଦୁଝର, ବାଲେଶ୍ଵର ମୟୂରଭଞ୍ଜ ଜିଲ୍ଲାର ଗୋଟିଏରୁ ଦୁଇଟି ସ୍ଥାନରେ ହାଲୁକା ବର୍ଷା ହୋଇପାରେ ।