Mayurbhanj tiger terror news / ଦୀର୍ଘ ୧୩ ଘଣ୍ଟାର କସରତ ପରେ ଉଦ୍ଧାର ହେଲା ମହାବଳ, ଖେଳାଇଥିଲା ଆତଙ୍କ

କରଞ୍ଜିଆ, ୨୫/୦୯: ରାତିର ନିରବତା ଭାଙ୍ଗି ଗାଁ ଭିତରକୁ ପଶିଥିଲା ମହାବଳ। ଘର ଆଗରେ ବାଘର ଚଳପ୍ରଚଳ ଦେଖି ଭୟରେ ଥରି ଉଠିଥିଲେ ଗ୍ରାମବାସୀ। କିଛି ସମୟ ପରେ ଜଣାପଡ଼ିଲା, ବାଘଟି ଗାଁର ଜଣେ ବ୍ୟକ୍ତିଙ୍କ ଖାଲି ଘର ଭିତରେ ପଶି ଯାଇଛି। ତା’ପରେ ଘରକୁ ବାହାରୁ ତାଲା ପକାଇ ଦିଆଗଲା। ଘର ଭିତରେ ମହାବଳ ଓ ବାହାରେ ଶହ ଶହ ଆଖି। କେତେବେଳେ କ’ଣ ହେବ, ସେହି ଆଶଙ୍କାରେ କଟିଲା ପ୍ରାୟ ୧୩ ଘଣ୍ଟା।

ଶେଷରେ ଦୀର୍ଘ ଅପେକ୍ଷାର ଅନ୍ତ ଘଟିଛି। ବନ ବିଭାଗର ଦୀର୍ଘ ଉଦ୍ଧାର ଅଭିଯାନ ପରେ ଘର ଭିତରୁ ବାଘଟିକୁ ସୁରକ୍ଷିତ ଭାବେ କାବୁ କରାଯାଇଛି। ଉଦ୍ଧାର ପରେ ବାଘକୁ ଠାକୁରମୁଣ୍ଡା ବନ୍ୟପ୍ରାଣୀ ରେଞ୍ଜ କାର୍ଯ୍ୟାଳୟକୁ ନେଇଛି ବନ ବିଭାଗ।

ଗାଁରେ ଖେଳିଗଲା ବାଘଆତଙ୍କ

ଏହି ଘଟଣାଟି ମୟୂରଭଞ୍ଜ ଜିଲ୍ଲା କରଞ୍ଜିଆ ବନଖଣ୍ଡ ଅନ୍ତର୍ଗତ ଖପରଖାଇ ଗାଁର। ଗୁରୁବାର ରାତିରେ ଗାଁ ଭିତରେ ଏକ ବାଘ ବୁଲୁଥିବା ଦେଖିଥିଲେ କିଛି ଗ୍ରାମବାସୀ। ହଠାତ୍ ଗାଁ ଭିତରେ ମହାବଳକୁ ଦେଖି ଲୋକଙ୍କ ମଧ୍ୟରେ ଭୟ ଖେଳିଯାଇଥିଲା। ବାଘଟି କେଉଁଆଡ଼େ ଯିବ ଏବଂ କେଉଁଠି ଲୁଚିବ, ତାହା ନେଇ ଗ୍ରାମବାସୀ ଚିନ୍ତାରେ ପଡ଼ିଥିଲେ। ସ୍ଥିତି ଗମ୍ଭୀର ହେଉଥିବା ଦେଖି ତୁରନ୍ତ ବନ ବିଭାଗକୁ ଖବର ଦିଆଯାଇଥିଲା। ସୂଚନା ପାଇ ବନ କର୍ମଚାରୀମାନେ ଘଟଣାସ୍ଥଳରେ ପହଞ୍ଚି ଖୋଜାଖୋଜି ଆରମ୍ଭ କରିଥିଲେ।

ପଢନ୍ତୁ ଏହି ଖବର: ବାଘ ଆତଙ୍କରେ ଥରହର ଗ୍ରାମବାସୀ,ଘରେ ପଶିଥିବା ଅନୁମାନ କରି କବାଟ କିଳି ଜଗି ବସିଛି ବନବିଭାଗ

ଘର ଭିତରେ ପଶିଗଲା ବାଘ

ବାଘଟିକୁ ଖୋଜୁଥିବା ବେଳେ ଏକ ଘର ଭିତରେ ତାହାର ଉପସ୍ଥିତି ଜଣାପଡ଼ିଥିଲା। ଗାଁର ଜଣେ ବ୍ୟକ୍ତିଙ୍କ ଖାଲି ଘର ଭିତରେ ବାଘଟି ପଶି ରହିଥିବା ଜଣାପଡ଼ିବା ପରେ ପରିସ୍ଥିତି ଆହୁରି ରୋମାଞ୍ଚକର ହୋଇଯାଇଥିଲା। ଲୋକଙ୍କ ସୁରକ୍ଷାକୁ ନଜରରେ ରଖି ଘରକୁ ବାହାରୁ ବନ୍ଦ କରି ଦିଆଯାଇଥିଲା। ଏହାପରେ ଘର ଚାରିପଟେ ଗ୍ରାମବାସୀଙ୍କ ଭିଡ଼ ଜମିଥିଲା। କିନ୍ତୁ କେହି ଘର ପାଖକୁ ଯିବାକୁ ସାହସ କରୁନଥିଲେ। ସମସ୍ତଙ୍କ ନଜର ଥିଲା ସେହି ବନ୍ଦ ଘର ଉପରେ।

ଘର ଭିତରେ ମହାବଳ ଥିବାରୁ ବନ ବିଭାଗ ମଧ୍ୟ ଅତ୍ୟନ୍ତ ସତର୍କତାର ସହ ଉଦ୍ଧାର କାର୍ଯ୍ୟ ଆରମ୍ଭ କରିଥିଲା। ଘରକୁ ଚାରିପଟୁ ଘେରି ରଖାଯାଇଥିଲା, ଯେପରି ବାଘଟି କୌଣସି ପ୍ରକାରେ ବାହାରକୁ ଖସି ନଯାଏ।

ଏଥି ସହ ପଢନ୍ତୁ: ବାଘ ଆତଙ୍କରେ ଥରହର ଗ୍ରାମବାସୀ,ଘରେ ପଶିଥିବା ଅନୁମାନ କରି କବାଟ କିଳି ଜଗି ବସିଛି ବନବିଭାଗ

ଘର ବାହାରେ ଲୋକ, ଭିତରେ ମହାବଳ

ଏହି ଘଟଣା ପରେ ଖପରଖାଇ ଗାଁରେ ଦୀର୍ଘ ସମୟ ଧରି ଆତଙ୍କର ପରିବେଶ ଲାଗି ରହିଥିଲା। ଘର ଭିତରେ ବାଘ ରହିଥିବା ବେଳେ ବାହାରେ ଲୋକେ ଜଗି ରହିଥିଲେ। ତେବେ ବାଘଟି ଯେପରି କୌଣସି ମଣିଷଙ୍କୁ ଆକ୍ରମଣ ନକରେ, ସେଥିପାଇଁ ଗ୍ରାମବାସୀଙ୍କୁ ଘଟଣାସ୍ଥଳଠାରୁ ଦୂରେ ରହିବାକୁ କୁହାଯାଇଥିଲା। ବନ ବିଭାଗ ପକ୍ଷରୁ ଗ୍ରାମବାସୀଙ୍କୁ ମଧ୍ୟ ସତର୍କ କରାଯାଇଥିଲା। ବିଶେଷକରି ରାତି ସମୟରେ ଏକାକୀ ବାହାରକୁ ନଯିବା ଏବଂ ବାଘ ଦେଖାଗଲେ ତା’ର ନିକଟକୁ ନଯିବା ପାଇଁ ପରାମର୍ଶ ଦିଆଯାଇଥିଲା।

୧୩ ଘଣ୍ଟା ପରେ ଶେଷ ହେଲା ଅପରେସନ

ଘର ଭିତରେ ବାଘଟି ପଶିବାଠାରୁ ତାକୁ ଉଦ୍ଧାର କରିବା ପର୍ଯ୍ୟନ୍ତ ପ୍ରାୟ ୧୩ ଘଣ୍ଟା ଧରି ଚାଲିଥିଲା ବନ ବିଭାଗର ଅଭିଯାନ। ଦୀର୍ଘ ସମୟର ଅପେକ୍ଷା ପରେ ଶେଷରେ ବନ କର୍ମଚାରୀମାନେ ବାଘଟିକୁ କାବୁ କରିଥିଲେ।

ବାଘକୁ ଉଦ୍ଧାର କରାଯିବା ପରେ ତାକୁ ଠାକୁରମୁଣ୍ଡା ବନ୍ୟପ୍ରାଣୀ ରେଞ୍ଜ କାର୍ଯ୍ୟାଳୟକୁ ନିଆଯାଇଛି। ତେବେ ବାଘଟି କେଉଁ ପରିସ୍ଥିତିରେ ଗାଁ ଭିତରକୁ ପଶିଲା ଏବଂ ଖାଲି ଘର ଭିତରେ କାହିଁକି ଆଶ୍ରୟ ନେଲା, ତାହା ଜଣାପଡ଼ିନାହିଁ। ମହାବଳ ଉଦ୍ଧାର ହେବା ପରେ ଖପରଖାଇ ଗାଁବାସୀ ଆଶ୍ୱସ୍ତ ହୋଇଛନ୍ତି। ତେବେ ଗାଁ ନିକଟରେ ବାଘର ଚଳପ୍ରଚଳ ଥିବାରୁ ବନ ବିଭାଗର ସତର୍କତା ଏବଂ ନଜରଦାରୀ ଜାରି ରହିବ ବୋଲି ଜଣାପଡ଼ିଛି।