ଅର୍ଗସ ବ୍ୟୁରୋ: ପାଣି ପାଇଁ ଲମ୍ବା ଲାଇନ । ବିପଦ ସଙ୍କୁଳ ଅବସ୍ଥାରେ ଏକ ପରିତ୍ୟକ୍ତ କୁଅରୁ ପାଣି କାଢୁଛନ୍ତି ମାହିଳାମାନେ । କେତେବେଳେ ଗୋଡ ଖସିଯିବ କହିହେବ ନାହିଁ । ଜଣେ କି ଦୁଇ ଜଣ ନୁହେଁ ଲମ୍ବା ଲାଇନ ଲଗାଇ ଏକା ସାଙ୍ଗରେ ପାଣି ନେବାକୁ ଅସିଛନ୍ତି ମହିଳାମାନେ । ଏ ଦୃଶ୍ୟ ହେଉଛି ସୁବର୍ଣ୍ଣପୁର ଜିଲ୍ଲା ଉଲୁଣ୍ଡା ବ୍ଲକ ଅନ୍ତର୍ଗତ ନାୟକପଡା ଗାଁର । ଚାରୋଟି ୱାର୍ଡ ବିଶିଷ୍ଟ ଏହି ଗାଁରେ ପ୍ରାୟ ୧୫ ଶହ ଲୋକ ବସବାସ କରୁଥିବାବେଳେ ଏଯାଏଁ ଗାଁକୁ ହୋଇ ପାରିନି ବିଶୁଦ୍ଧ ପାନୀୟ ଜଳ ଯୋଗାଣ । ଫଳରେ ଏହି ପରିତ୍ୟକ୍ତ କୁଅରୁ ପାଣି ବ୍ୟବହାର କରି ଚଳୁଛନ୍ତି ଗ୍ରାମବାସୀ । କେବଳ ସେତିକି ନୁହେଁ ଗାଁ ଦେଇ ଯାଇଥିବା ସୁବର୍ଣ୍ଣପୁର-ସମ୍ବଲପୁର ରାଜ୍ୟ ରାଜପଥ ଥିବାରୁ ସବୁବେଳେ ନିଜ ଜୀବନକୁ ବାଜି ଲହଗାଇ ରାସ୍ତା ପାର ହେଉଛନ୍ତି ମହିଳାମାନେ । କେତେବେଳେ ଯେ ଅଘଟଣ ନ ଘଟିବ ତାହା କହିହେବ ନାହିଁ ।  

କାନ୍ଥ ଉପରେ ଲେଖା ହୋଇଛି ବସୁଧା ଯୋଜନା। ସମସ୍ତରଙ୍କ ଘରକୁ ପାଣି । ହେଲେ ବାସ୍ତବ ଚିତ୍ର ସମ୍ପୂର୍ଣ୍ଣ ଭିନ୍ନ । ନା ଅଛି ଓଭରହେଡ ଟ୍ୟାଙ୍କ, ନା ଗାଁରେ ପଡିଛି ପାଇପ। କିଛି ବର୍ଷ ଆଗରୁ ଜଳ ଯୋଗାଣ ପାଇଁ ଓଭର ହେଡ ଟ୍ୟାଙ୍କ ନିର୍ମାଣ କରାଯାଉଥିବାବେଳେ ଅଧାରେ କାମ ଛାଡି ଠିକାଦାର ଫେରାର ମାରିଛି। କେବଳ ପିଲର ନିର୍ମାଣ କରି ସରକାର ଚୁପ । ଗାଁରେ ନଳକୁପ ଯାହା ଅଛି ସେଥିରୁ ଖାଇବା ଯୋଗ୍ୟ ପାଣି ବାହାରୁ ନାହିଁ । ଏହାକୁ ନେଇ ଜିଲ୍ଲାପାଳ ଅଫିସ ଆଗରେ ଭିଡ ଜମାଇଛନ୍ତି ଶହ ଶହ ମହିଳା । ହକ ପାଇଁ ଜିଲ୍ଲାପାଳଙ୍କୁ ମହିଳାମାନେ ଚେତାବନୀ ଦେଉଛନ୍ତି । ତୁରନ୍ତ ଗାଁକୁ ପାଣି ଯୋଗାଇ ନ ଦେଲେ ଆଗାମୀ ଦିନରେ ଆନ୍ଦୋଳନର ଧମକ ମଧ୍ୟ ଦେଇଛନ୍ତି ମହିଳାମାନେ । ଅପରପକ୍ଷରେ ଗାଁକୁ ମେଗା ଉଠା ଜଳ ସେଚନରୁ କମ ଦିନ ଭିତରେ ପାଣି ଦିଆଯିବ ବୋଲି କହିଛନ୍ତି ଉଲୁଣ୍ଡା ବ୍ଲକ ଜଳ ଓ ପରିମଳ ମିଶନର କନିଷ୍ଠ ଯନ୍ତ୍ରୀ ।

ଅଧିକ ପଢ଼ନ୍ତୁ ଓଡ଼ିଶା ଖବର