ଅର୍ଗସ ବ୍ୟୁରୋ: କିଟ୍ କିଟ୍ ଅନ୍ଧାର ରାତି । ଚାରିଆଡ ଘଞ୍ଚ ଜଙ୍ଗଲ ଆଉ ଶୂନଶାନ୍ ରାସ୍ତା । ଦୂର ଦୂର ଯାଏ ନାହିଁ ଆଲୁଅର ଦେଖା । ଅଣ ଓସାରିଆ ମାଟି, ପଥର ରାସ୍ତାକୁ ମଝିରେ ନାଳ ପାଣିରେ ପଶି ଯିବାକୁ ପଡେ । ଏମିତି ପାଖାପାଖି 3 କିମି ଚାଲି ଚାଲି ଗଲେ ଆସିବ ସମ୍ବଲପୁର ଜିଲ୍ଲା ରେଢାଖୋଲ ବ୍ଲକର ସେନାଘାଟି ଆଦର୍ଶ ଗାଁ । ଯେଉଁଠି ବିକାଶର ବାସ୍ତବତାକୁ ପରଖିବାକୁ ପହଞ୍ଚିଥିଲା ଆମ ଟିମ୍ । ଏଠାରେ ବଡ଼ ଦୟନୀୟ ଅବସ୍ଥାରେ ଜୀବନ ଅତିବାହିତ କରୁଛନ୍ତି 30 ପରିବାର । ଭଲ ରାସ୍ତା ଖଣ୍ଡିଏ ନଥିବା ବେଳେ ଜରୁରୀକାଳୀନ ପରିସ୍ଥିତିରେ ରୋଗୀ, ଗର୍ଭବତୀଙ୍କୁ ଖଟିଆ ସାହା । ସଞ୍ଜ ନଇଁଲେ ମାତ୍ରେ ମାଡିଆସେ ବନ୍ୟଜନ୍ତୁଙ୍କ ଭୟ ।

ଖାଲି ସେତିକି ନୁହେଁ, ଶୁଦ୍ଧ ପାନୀୟ ଜଳ ଏମାନଙ୍କ ପାଇଁ ସାତ ସପନ । ନଳକୂପରୁ ଆଇରନ୍ ପାଣି ଓ କୂଅରୁ ଦୂଷିତ ପାଣି ପିଇ ଗାଁର 5 ବର୍ଷରେ କିଡନୀ ରୋଗରେ ଆକ୍ରାନ୍ତ ହୋଇ 10 ଜଣ ପୁରୁଷ ଓ 2 ମହିଳା ଜୀବନ ଯାଇଛି । ଗାଁରେ ଅଙ୍ଗନୱାଡି କି ସ୍କୁଲ ନାହିଁ । ଫଳରେ ଅନେକ ଛାତ୍ରଛାତ୍ରୀଙ୍କ ପାଠପଢାରେ ଡୋରୀ ପଡିଛି । ସେହିପରି ସରକାରୀ ଯୋଜନା ଅପହଞ୍ଚ ପାଲଟିଥିବାବେଳେ ଝୁମ୍ପୁଡିରେ ଦିନ କାଟୁଛନ୍ତି ଗ୍ରାମବାସୀ ।

ସ୍ବାଧୀନତାର ଦୀର୍ଘ ବର୍ଷ ପରେ ବି କାହିଁକି ସେନାଘାଟି ଗ୍ରାମବାସୀଙ୍କ ପାଇଁ ଅପହଞ୍ଚ ବିକାଶ ? । କ'ଣ ଏୟା ଦୀର୍ଘ ବର୍ଷ ସ୍ଥିର ବିଜେଡି ସରକାରର ରୂପାନ୍ତରୀକରଣ ? । ଖାଲି ପ୍ରତିଶ୍ରୁତି ପରେ ପ୍ରତିଶ୍ରୁତି ଦେଇ ଚାଲିଛନ୍ତି ସ୍ଥାନୀୟ ବିଧାୟକ ରୋହିତ ପୂଜାରୀ । ହେଲେ ସ୍ଥିତି ଯଥା ପୂର୍ବଂ ତଥା ପରଂ । ଏଥର ଭୋଟରେ ଉଚିତ ଜବାବ ଦେବେ ବୋଲି ଚେତାବନୀ ଦେଇଛନ୍ତି ଗ୍ରାମବାସୀ ।

ଅଧିକ ପଢ଼ନ୍ତୁ ଓଡିଶା ଖବର:

Argus News: ଓଡ଼ିଶାର ଖବର | Breaking News, ରାଜନୀତି, କ୍ରୀଡ଼ା ଓ Live TV