ଦୁର୍ଗମରେ ଦୁର୍ଦ୍ଦିନରେ 30 ଆଦିବାସୀ ପରିବାର
ଅର୍ଗସ ବ୍ୟୁରୋ: ପୀଢି ପରେ ପୀଢି ବଦଳୁଛି । ହେଲେ ବଦଳୁନି ବଞ୍ଚିବାର ଚିତ୍ର । ଆଜି ବି ଅପହଞ୍ଚ ରାସ୍ତା, ପାନୀୟ, ସ୍ବାସ୍ଥ୍ୟ, ଶିକ୍ଷା । କେବେ ଉଇଁବ ବିକାଶର ସୂର୍ଯ୍ୟ?। ଚାହିଁ ବସିଛି କନ୍ଧମାଳ ଜିଲ୍ଲା ବାଲିଗୁଡ଼ା ବ୍ଲକ ପରମପାଙ୍ଗାର ଉଡ୍ରାପାଙ୍ଗା, ଟିଟମାହା ଓ କିଲୁପଡ଼ା ଗାଁ । ପ୍ରଶାସନର ଭୁଲ୍ ନକ୍ସା ଯୋଗୁଁ ସମସ୍ୟା ଭୋଗୁଛନ୍ତି ଉଡ୍ରାପାଙ୍ଗା ଗ୍ରାମବାସୀ । ଦୀର୍ଘ ଦିନର ଦାବି ପରେ ସ୍ଥାୟୀ ପୋଲ ନିର୍ମାଣ ହେଲା, ହେଲେ ନାଳ ଉପରେ ନୁହେଁ ଶୁଖିଲା ସ୍ଥାନରେ । ଫଳରେ ଏବେ ପାଣି ଭିତରେ ପଶି ନିତି ଯାତାୟତ କରିବାକୁ ବାଧ୍ୟ ହେଉଛନ୍ତି । ସେହିପରି ଘଞ୍ଚ ଜଙ୍ଗଲ ଦେଇ ପ୍ରତିଦିନ ଯାତାୟତ କରୁଛନ୍ତି ଟିଟମାହା, କିଲୁପଡ଼ା ଗ୍ରାମବାସୀ । ଗାଁରେ ସ୍କୁଲ ନଥିବାରୁ 3 କିମି ଦୂର ପରମପାଙ୍ଗା ବିଦ୍ୟାଳୟକୁ ନିତି ଏହି ବିପଦପୂର୍ଣ୍ଣ ରାସ୍ତା ଦେଇ ଯାଉଛନ୍ତି ଏହି ତିନି ଗାଁର ଛାତ୍ରଛାତ୍ରୀ ।
ଏହି ଦୁଇ ଗାଁରେ ପାନୀୟ ଜଳର ବି ଘୋର ସମସ୍ୟା । ବସୁଧା ଯୋଜନା ଫେଲ୍ ମାରିଥିବାବେଳେ ନଳକୂପରୁ ବାହାରୁଛି ଗୋଳିଆ ପାଣି । ଗାଁ ମଝିରେ ବହି ଯାଇଥିବା ନାଳ ଭିତରେ ଗାତ ଖୋଳି ଚୂଆ ପାଣି ଭରସାରେ 30 ଆଦିବାସୀ ପରିବାର । ରାତି ପାହିଲେ ବନ୍ୟଜନ୍ତୁଙ୍କୁ ଖାତିର ନକରି ଗରା, ବାଲ୍ଟି କାଖେଇ ପାଣି ଆଣିବାକୁ ଯାଇଥାନ୍ତି । ସେପଟେ ଏ ସଂପର୍କରେ ପଚାରିବାରୁ ବାଲିଗୁଡ଼ା କନିଷ୍ଠ ଯନ୍ତ୍ରୀ କହିଛନ୍ତି, ଖୁବ ଶୀଘ୍ର ସରିବ ରାସ୍ତା କାମ । ଏହାପରେ
ପାଣି ସମସ୍ୟାର ସମାଧାନ ହୋଇଯିବ ।
ଅଧିକ ପଢ଼ନ୍ତୁ ଓଡିଶା ଖବର:
