ମୟୂରଭଞ୍ଜ: ବାରିପଦାରେ ରାଷ୍ଟ୍ରପତି ଦ୍ରୌପଦୀ ମୁର୍ମୁ । ସହିଦ ସ୍ମୃତି ଭବନରେ ଆୟୋଜିତ "ସର୍ବଭାରତୀୟ ସାନ୍ତାଳୀ ଲେଖକ ସଂଘ"ର ୩୬ତମ ବାର୍ଷିକ ସମ୍ମିଳନୀରେ ଯୋଗ ଦେଇଥିଲେ ମହାମହିମ । ସେଠାରୁ ବାହାରି ସର୍କିଟ ହାଉସ ଅଭିମୁଖେ ଯାଉଥିବା ବେଳେ କିଛି ସମୟ ପାଇଁ ରାସ୍ତାରେ ଅଟକିଥିଲା ରାଷ୍ଟ୍ରପତିଙ୍କ କାର୍‌କେଡ୍ । ସେଠାରେ ଉପସ୍ଥିତ ଲୋକଙ୍କୁ ଦେଖି ହାତ ହଲାଇ ଅଭିବାଦନ ଜଣାଇଥିଲେ ରାଷ୍ଟ୍ରପତି । ପରେ ସର୍କିଟ ହାଉସ ଅଭିମୁଖେ ବାହାରିଥିଲେ । ସେଠାରେ ମଧ୍ୟାହ୍ନ ଭୋଜନ କରି କୁଳିଅଣା ଅଭିମୁଖେ ବାହାରିବେ ।  "ପାଣିଜିଆ" ଠାରେ "ଏକଲବ୍ୟ ମଡେଲ ରେସିଡେନ୍ସିଆଲ ସ୍କୁଲ"ର କରିବେ ଶୁଭ ଉଦଘାଟନ । ଦିନ ୧୧ଟା ସମୟରେ ରାଷ୍ଟ୍ରପତି ବାୟୁସେନାର ସ୍ବତନ୍ତ୍ର ହେଲିକପ୍ଟର ଯୋଗେ ବାରିପଦା ପୋଲିସ ପଡ଼ିଆରେ ପହଞ୍ଚିଥିଲେ । ସେଠାରେ ତାଙ୍କୁ ଭବ୍ୟ ସ୍ବାଗତ ସମ୍ବର୍ଦ୍ଧନା ଦିଆଯାଇଥିଲା ।

ସେଠାରେ ସେ ସହିଦ ସ୍ମୃତି ଭବନ ଅଭିମୁଖେ ବାହାରିଥିଲେ । ଆସନ୍ତାକାଲି ରାଇରଙ୍ଗପୁରରେ ପହଞ୍ଚିବା ପରେ ମୁର୍ମୁ ଛକରେ ସ୍ବାମୀ ଶ୍ୟାମ ଚରଣ ମୁର୍ମୁଙ୍କ ପ୍ରତିମୂର୍ତ୍ତିରେ ପୁଷ୍ପମାଲ୍ୟ ଅର୍ପଣ କରିବେ । ଏହାସହ ଏଲଆଣ୍ଡଟି ପକ୍ଷରୁ ନିର୍ମାଣ ହୋଇଥିବା ସ୍କିଲ୍ ଟ୍ରେନିଂ ସେଣ୍ଟର ଉଦଘାଟନର ରହିଛି କାର୍ଯ୍ୟକ୍ରମ । ଏସ୍.ଏଲ୍.ଏସ୍. ମେମୋରିଆଲ ରେସିଡେନସିଆଲ ସ୍କୁଲରେ ସାଂସ୍କୃତିକ କାର୍ଯ୍ୟକ୍ରମରେ ଯୋଗଦେବେ ମହାମହିମ । ଏଥିସହ ବାଦାମପାହାଡ଼ ଷ୍ଟେସନରେ ସକାଳ ୯ଟା ୩୫ରୁ ୧୦ଟା ୪୫ ଭିତରେ ୩ଟି ନୂଆ ଏକ୍ସପ୍ରେସ୍ ଟ୍ରେନର ଶୁଭ ଉଦଘାଟନ କରିବେ ରାଷ୍ଟ୍ରପତି । ବାଦାମପାହାଡ଼ରୁ ଟ୍ରେନରେ ଛୋଟ ପିଲାଙ୍କ ସହ ୪୦ ମିନିଟର ଟ୍ରେନ ଯାତ୍ରା କରି ରାଇରଙ୍ଗପୁର ରେଳଷ୍ଟେସନରେ ପହଞ୍ଚିବେ । ପରେ ପରେ ରାଇରଙ୍ଗପୁର ପୋଷ୍ଟାଲ ଡିଭିଜନର ଭର୍ଚୁଆଲ ମାଧ୍ୟମରେ ଉଦଘାଟନ କରିବେ । ଆସନ୍ତା ୨୨ ତାରିଖରେ ପ୍ରଜାପିତା ବ୍ରହ୍ମକୁମାରୀ ଆଶ୍ରମରେ ନୂତନ ଭାରତ ନୂତନ ଶିକ୍ଷା କାର୍ଯ୍ୟକ୍ରମରେ ଯୋଗଦେବେ ରାଷ୍ଟ୍ରପତି । ରାଇରଙ୍ଗପୁର ଗସ୍ତ ଅବସରରେ ଘରକୁ ମଧ୍ୟ ଆସିବେ ରାଷ୍ଟ୍ରପତି । ପରିବାର ଲୋକଙ୍କ ସହ ସମ୍ପର୍କୀୟମାନେ ମଧ୍ୟ ଘରେ ରାଷ୍ଟ୍ରପତିଙ୍କୁ ଭେଟିବାର କାର୍ଯ୍ୟକ୍ରମ ରହିଛି ।

 ଅଧିକ ପଢନ୍ତୁ ଓଡ଼ିଶା ଖବର