Argus News - ୧୫ ମନ୍ତ୍ରୀ ବୁଲିବେ ୩୦ ଜିଲ୍ଲା

ଅର୍ଗସ ବ୍ୟୁରୋ: ମୋଦି ମଡଲେକୁ ନେଇ ଲୋକଙ୍କ ସହ ଯୋଡି ହେବେ ମୋହନ ସରକାର । ଏଥିପାଇଁ ପ୍ରସ୍ତୁତ ହୋଇଛି ବ୍ଲୁ ପ୍ରିଣ୍ଟ । ମନ୍ତ୍ରୀ ବୁଲିବେ ଜିଲ୍ଲାରୁ ଜିଲ୍ଲା । 30 ଜିଲ୍ଲା ବୁଲିବାକୁ 15 ମନ୍ତ୍ରୀଙ୍କୁ ଦିଆଯାଇଛି ଦାୟିତ୍ବ । ପ୍ରତି ମନ୍ତ୍ରୀ ଦୁଇଟି ଜିଲ୍ଲା ଗସ୍ତ କରିବେ । ଗସ୍ତ କାଳରେ ବଜେଟରେ ମୋହନ ସରକାର ଆଣିଥିବା ଲୋକାଭିମୁଖୀ ଯୋଜନା ବାବଦରେ ଲୋକଙ୍କୁ ଅବଗତ କରିବେ , ମତାମତ ନେବେ । ତା ସହ କେନ୍ଦ୍ରର ଜନକଲ୍ୟାଣକାରୀ ଯୋଜନା କଥା ବି କହିବେ । ସାଧାରଣ ଲୋକ ଓ ସରକାରଙ୍କ ମଧ୍ୟରେ ସମନ୍ବୟ ରଖିବ ସଂଙ୍ଗଠନ । 

ଯୋଜନା ଅନୁସାରେ ମନ୍ତ୍ରୀ ଜିଲ୍ଲା ବୁଲିବା ଆରମ୍ଭ କରି ଦେଇଛନ୍ତି । ମୟୂରଭଞ୍ଜ ଗସ୍ତରେ ଅଛନ୍ତି ଉପମୁଖ୍ୟମନ୍ତ୍ରୀ କନକ ବର୍ଦ୍ଦନ ସିଂ ଦେଓ  ଓ  ଖାଦ୍ୟ ଯୋଗାଣ ମନ୍ତ୍ରୀ କୃଷ୍ଣ ପାତ୍ର । କେନ୍ଦ୍ର ସରକାରଙ୍କ  ବୃହତ ତାଳତେଲ ବୃକ୍ଷରୋପଣ ଅଭିଯାନର ଶୁଭାରମ୍ଭ  ବେତନଟୀରୁ କରିଛନ୍ତି ଉପମୁଖ୍ୟମନ୍ତ୍ରୀ । ଓଡିଶାର ୨୦ଟି ଜିଲ୍ଲାରେ ଏହା ଚାଲିବ । ଚାଷୀଙ୍କ ରୋଜଗାର ବଢାଇବା ପାଇଁ ଏହି ଅଭିଯାନ ସହାୟକ ହେବ ବୋଲି  କହିଛନ୍ତି ଉପମୁଖ୍ୟମନ୍ତ୍ରୀ । ସେପଟେ ଯୋଗାଣ ବିଭାଗର ବିଭିନ୍ନ ଯୋଜନା ଜିଲ୍ଲାରେ କେମିତି କାମ କରୁଛି ତାର ସମୀକ୍ଷା କରିଛନ୍ତି ଖାଦ୍ୟ ଯୋଗାଣ ମନ୍ତ୍ରୀ ।

ମନ୍ତ୍ରୀଙ୍କ ଜିଲ୍ଲା ବୁଲିବା କୁ ନେଇ ବିଜେଡି କହିଛି  ସେମାନେ ତାଙ୍କ କର୍ତ୍ତବ୍ୟ କରୁଛନ୍ତି ବିରୋଧୀ ଦଳ ଭାବେ ବିଜେଡି ନେତା ବି 30  ଜିଲ୍ଲା ବୁଲିବେ । ସରକାରଙ୍କ ତ୍ରୁଟି ବିଚ୍ୟୁତି ବିଷୟରେ ଲୋକଙ୍କୁ ବୁଝାଇବେ ।  ନିଜେ ନବୀନ ବି ଜିଲ୍ଲା ଯିବେ । ସେପଟେ ବିଜେପି ରାଜ୍ୟ ସଭାପତି ଓ ସଙ୍ଗଠନ ସଂପାଦକ ବି ଜିଲ୍ଲାବୁଲିବା ଆରମ୍ଭ କରିଛନ୍ତି । 

ମୋଦିଙ୍କ ମଡେଲ ହେଉଛି, ଲୋକଙ୍କ ପାଖକୁ ସମସ୍ୟା ଶୁଣ । ଜନକଲ୍ୟାଣକାରୀ ଯୋଜନାର ସୁଫଳ ପହଁଞ୍ଚାଇବାକୁ ପ୍ରୟାସ କର । ଏପଟେ 24 ବର୍ଷ ଧରି ସରକାରରେ ଥିବା ବିଜେଡି ନେତା- ମନ୍ତ୍ରୀଙ୍କ କ୍ଷମତାକୁ ଗୌଣ କରି ଜଣେ ସଚିବଙ୍କୁ ଜିଲ୍ଲାରୁ ଜିଲ୍ଲା ବୁଲାଇବାରୁ ଏହା ବୁଂମେରା ହେଲା । ତେଣୁ ବିଜେପି ରାସ୍ତାରେ ଏବେ ବିଜେଡି ନେତା ଯିବା ପାଇଁ ଯୋଜନା କରୁଥିବା ଚର୍ଚ୍ଚା । 

ଆହୁରି ପଢନ୍ତୁ ଓଡିଶା ଖବର...