ଚାର୍ଟଡ ଫ୍ଲାଇଟରେ ବୁଲି 50 କୋଟି ଖର୍ଚ୍ଚ, ଭି.କେ. ପାଣ୍ଡିଆନ ଓ ତାଙ୍କ ସହଯୋଗୀ ନୁହନ୍ତି ତ ?
ଅର୍ଗସ ବ୍ୟୁରୋ: ସରକାରୀ ବାବୁଙ୍କ ମଜଲିସ ପାଇଁ ରାଜ୍ୟ ରାଜକୋଷରୁ କୋଟି କୋଟି ଟଙ୍କା ସ୍ବାହା । ସୂଚନା ଅଧିକାର ଆଇନରେ ସାମ୍ନାକୁ ଆସିଛି ଆଖି ତରାଟି ହେଲା ଭଳି ତଥ୍ୟ । ଚାଟାର୍ଡ ଫ୍ଲାଇଟରେ ବୁଲି 51 କୋଟି ଟଙ୍କା ଉଡ଼େଇ ଦେଲେ ସରକାରୀ ଅଫିସର । କିଏ ସେହି ସରକାରୀ ଅଫିସର ? ସେତେବେଳର 5T ସଚିବ ତଥା ବର୍ତ୍ତମାନର ବିଜେଡିର 2 ନମ୍ବର ନେତା ପାଣ୍ଡିଆନ ସେହି ଅଫିସର ନୁହନ୍ତି ତ ? ଏଭଳି ପ୍ରଶ୍ନ ଏବେ ସମସ୍ତଙ୍କ ମନରେ। ତେବେ କୋଭିଡ ମହାମାରୀ ସମୟ ଅର୍ଥାତ 2021-22ରେ ଖର୍ଚ୍ଚ ହୋଇଛି 19 କୋଟି 88 ଲକ୍ଷ ଟଙ୍କା ।
ଯେତେବେଳେ ସବୁ ବନ୍ଦ, ମହାମାରୀ କରୋନାରେ କଲବଲ ହେଉଥିଲେ ରାଜ୍ୟବାସୀ । ସେତେବେଳେ କିଏ ରାଜକୋଷରୁ ଟଙ୍କା ନେଇ ଚାଟାର୍ଡ ଫ୍ଲାଇଟରେ ଆକାଶ ମାର୍ଗରେ ପରିଭ୍ରମଣ କରୁଥିଲେ । ରାଜ୍ୟରେ ଗତ ୫ ବର୍ଷ ମଧ୍ୟରେ ହେଲିକପ୍ଟର ଭଡା ବାବଦରେ ୫୨ କୋଟି ଖର୍ଚ୍ଚ ହୋଇଥିଲା ବେଳେ , ଚାଟାର୍ଡ ଫ୍ଲାଇଟ ଭଡ଼ା ବାବଦରେ ୫୦ କୋଟି ଟଙ୍କା ଖର୍ଚ୍ଚ ହୋଇଛି । ଚାଟାର୍ଡ ଫ୍ଲାଇଟ ବାବଦରେ ୨୦୧୯-୨୦ରେ ୧୦ କୋଟି , ୨୦୨୦-୨୧ରେ ୧୯ କୋଟି ଟଙ୍କା, ୨୦୨୧-୨୨ରେ ୧୯କୋଟି, ୨୦୨୨-୨୩ରେ ୧୫ କୋଟି ଟଙ୍କା ଏବଂ ୨୦୨୩-୨୪ରେ ୯ କୋଟି ଟଙ୍କା ଖର୍ଚ୍ଚ ହୋଇଛି । ତେବେ ଏଠି ସବୁଠାରୁ ବଡ଼ ପ୍ରଶ୍ନ , କୋଭିଡ ସମୟରେ କିଏ ଓ କାହିଁକି ଚାଟାର୍ଡ ଫ୍ଲାଇଟ୍ ବ୍ୟବହାର କରି ୧୯ କୋଟି ଟଙ୍କାର ବିଲ ଦେଇଛନ୍ତି । ଏଥିପାଇଁ ରାଜ୍ୟ ସରକାର କାହାକୁ ଅନୁମତି ଦେଇଥିଲେ, ମୁଖ୍ୟମନ୍ତ୍ରୀ ସ୍ପଷ୍ଟ କରନ୍ତୁ ବୋଲି ଦାବି କରିଛନ୍ତି ସୂଚନା ଅଧିକାର ଅଭିଯାନର ଆବାହକ ପ୍ରଦୀପ ପ୍ରଧାନ ।
ତେବେ କେବଳ ଯେ ଏହି ଫ୍ଲାଇଟ ଭଡ଼ାରେ କୋଟି କୋଟି ଟଙ୍କା ଉଡାଯାଇଛି ତାହା ନୁହେଁ । Z ପ୍ଲସ ସିକ୍ୟୁରିଟିରୁ ଅଧିକ ବିଜେଡ଼ି ନେତା ପାଣ୍ଡିଆନଙ୍କ ସିକ୍ୟୁରିଟି । ବିଜେଡ଼ି ନେତା ପାଣ୍ଡିଆନଙ୍କ ସିକ୍ୟୁରୁଟି ପାଇଁ 74 ପୋଲିସ କର୍ମୀ ନିୟୋଜିତ କରିଛନ୍ତି ରାଜ୍ୟ ସରକାର । ଭି.କେ. ପାଣ୍ଡିଆନଙ୍କ ସୁରକ୍ଷା ପାଇଁ ରାଜ୍ୟ ରାଜକୋଷରୁ ଖର୍ଚ୍ଚ ହେଉଛି ବର୍ଷକୁ 3 କୋଟି ଟଙ୍କା । କାହିଁକି ପାଣ୍ଡିଆନଙ୍କୁ ଦିଆଯାଉଛି ଏତେ ସୁରକ୍ଷା ? ତେବେ ଏ ତଥ୍ୟ ସୂଚନା ଅଧିକାର ଆଇନରେ ସାମ୍ନାକୁ ଆସିବା ପରେ ମୁଖ୍ୟ ନିର୍ବାଚନରେ ଅଧିକାରୀଙ୍କୁ ଭେଟି କିଛି ଦିନ ତଳେ ବିଜେପି ଅଭିଯୋଗ କରିଥିଲା । ଏହାସହ ପୂର୍ବରୁ ଭି.କେ. ପାଣ୍ଡିଆନ ଚାଟାର୍ଡ ଫ୍ଲାଇଟ ବ୍ୟବହାର କରିବା ନେଇ ମଧ୍ୟ ପ୍ରଶ୍ନ ଉଠାଇଥିଲା ବିଜେପି । ତେଣୁ ଚାଟାର୍ଡ ଫ୍ଲାଇଟ ବ୍ୟବହାର କରିଥିବା ଅଫିସରଙ୍କ ବିରୋଧରେ ଦୃଢ଼ କାର୍ଯ୍ୟାନୁଷ୍ଠାନ ଦାବି କରିଛି ଦଳ ।
📱 Get Argus News App
✨କିଏ ଏହି ଚାଟାର୍ଡ ଫ୍ଲାଇଟ ବ୍ୟବହାର କରିଛନ୍ତି ଓ ମୁଖ୍ୟମନ୍ତ୍ରୀ କାହାକୁ ଚାଟାର୍ଡ ଫ୍ଲାଇଟ ବ୍ୟବହାର ପାଇଁ ଅନୁମତି ଦେଇଛନ୍ତି ? ଏହାର ତଥ୍ୟ ହାସଲ ପାଇଁ ଗତ 9 ଫେବୃଆରୀ 2024ରେ ମୁଖ୍ୟମନ୍ତ୍ରୀଙ୍କ କାର୍ଯ୍ୟାଳୟ, ସାଧାରଣ ପ୍ରଶାସନ ବିଭାଗ ଓ ସଂସଦୀୟ ବ୍ୟାପାର ବିଭାଗ ପାଖରେ ଆବେଦନ କରିଥିଲେ ସୂଚନା ଅଧିକାର କର୍ମୀ ପ୍ରଦୀପ ପ୍ରଧାନ । ଏହି ତଥ୍ୟ ଦେବା ପାଇଁ 3ଟି ଯାକ ବିଭାଗ ପରିବହନ ବିଭାଗକୁ ଦରଖାସ୍ତ ପଠେଇ ଦେଇଥିଲେ । କିନ୍ତୁ ଏ ପର୍ଯ୍ୟନ୍ତ ପରିବହନ ବିଭାଗ କୌଣସି ତଥ୍ୟ ଦେଉ ନାହିଁ ।
ଅଧିକ ପଢ଼ନ୍ତୁ ଓଡିଶା ଖବର: