ଅର୍ଗସ ବ୍ୟୁରୋ: ୨୦୨୦ ମସିହାରେ ପାଣିକୋଇଲିକୁ ଡିଏମଏଫରେ ସାମିଲ କରିଥିଲେ ପୂର୍ବ ବିଜେଡି ସରକାର l ଲୋକମାନଙ୍କ ମନରେ ଖୁସି ଭରି ଯାଇଥିଲା, ଏବେ ପାଣିକୋଇଲିର ବିକାଶ ହେବ l କିନ୍ତୁ ଡିଏମଏଫରେ ସାମିଲ କରିବା ପଛରେ ଲୁଚି ରହିଥିଲା ବିଜେଡି ନେତାଙ୍କ ଅସଲ ଚେହେରା l ରାଜ୍ୟ ସାଙ୍ଗଠନିକ ସମ୍ପାଦକ ତଥା ସେତେବେଳର ଯାଜପୁର ବିଧାୟକ ପ୍ରଣବ ପ୍ରକାଶ ଦାସଙ୍କୁ ଖୁସି କରିବା ପାଇଁ ବିଜେଡିର ଜଣେ ପ୍ରଭାବଶାଳୀ ନେତାଙ୍କ ଘରକୁ ବ୍ଲକ ପ୍ରଶାସନ ଏହି ରାସ୍ତା ନିର୍ମାଣ କରିଥିବା ଆଲୋଚନା ହେଉଛି l ୫୪ ଲକ୍ଷ ଟଙ୍କା ଜିଲ୍ଲା ଖଣିଜ ପାଣ୍ଠିରୁ ବିଭିନ୍ନ ପ୍ରକଳ୍ପ ନାମରେ ଉଜାଡି ଦେଇଥିଲା ବ୍ଲକ ପ୍ରଶାସନ l ଯାଜପୁର ଜିଲ୍ଲା କୋରେଇ ବ୍ଲକ ପାଣିକୋଇଲିଠାରେ ନିର୍ମାଣ ହୋଇଛି ଏହି ରାସ୍ତା । କେଉଁ ସ୍ବାର୍ଥରେ ବିଜେଡିର ପ୍ରଭାବଶାଳୀ ନେତାଙ୍କ ଘରକୁ ଏହି ରାସ୍ତା ନିର୍ମାଣ କରିଛି ବ୍ଲକ ପ୍ରଶାସନ ? ପାଣିକୋଇଲି ପଞ୍ଚାୟତ ଅନେକ ମୁଖ୍ୟ ରାସ୍ତା ଏବେ ସାଧାରଣ ଲୋକଙ୍କ ପାଇଁ ମରଣଯନ୍ତା ପାଲଟିଥିବା ବେଳେ ଗୋଟିଏ ରାସ୍ତା ପାଇଁ କାହିଁକି ଲକ୍ଷ ଲକ୍ଷ ଟଙ୍କା ଖର୍ଚ୍ଚ ହେଲା ? ତାହା ଏବେ ବଡ ପ୍ରଶ୍ନ ।

ତଥ୍ୟ ଅନୁଯାୟୀ, ଏହି ରାସ୍ତାରେ ପ୍ରଶାସନ ପକ୍ଷରୁ ଅଗଷ୍ଟ ୨୦୨୧ରେ ଗ୍ରାମ୍ୟ ଉନ୍ନୟନ ରାସ୍ତାଠାରୁ ନୀଳମଣି ପରିଡା ରାସ୍ତା ନାମରେ ୧ ଲକ୍ଷ ୮୬ ହଜାର ୧୯୫ ଟଙ୍କା ଖର୍ଚ୍ଚ କରିଥିବା ବେଳେ ରାସ୍ତା ସହିତ ଡ୍ରେନ ନିର୍ମାଣ ପାଇଁ ଗ୍ରାମ୍ୟ ଉନ୍ନୟନ ରାସ୍ତାଠାରୁ ସନ୍ତୋଷ ମହାନ୍ତି ଘର ନାମରେ ୨୦୨୨ରେ ଖର୍ଚ୍ଚ କରାଯାଇଛି ୪ ଲକ୍ଷ ୭୪ ହଜାର ୭୧୫ ଟଙ୍କା । ସେହିପରି ବ୍ଲକ ପ୍ରଶାସନ ଜିଲ୍ଲା ଖଣିଜ ପାଣ୍ଠିରୁ ୨୦୨୧ -୨୦୨୨ ଆର୍ଥିକ ବର୍ଷରେ ୩ଟି ଅଲଗା ଅଲଗା ପ୍ରକଳ୍ପ ନାମରେ ୨୭ଲକ୍ଷ ଟଙ୍କା ଖର୍ଚ୍ଚ କରିଥିବା ବେଳେ ୨୦୨୩-୨୦୨୪ ଆର୍ଥିକ ବର୍ଷରେ ପୁନଃ ଅଲଗା ଅଲଗା ପ୍ରକଳ୍ପ ନାମରେ ଏହି ରାସ୍ତା ପାଇଁ ୨୭ ଲକ୍ଷ ଟଙ୍କା ଖର୍ଚ୍ଚ କରାଯାଇଛି । ଅନ୍ୟପକ୍ଷରେ ସରକାରୀ ନିୟମକୁ ଉଲ୍ଲଂଘନ କରାଯାଇ ୩୦ଫୁଟରୁ ଉର୍ଦ୍ଧ୍ବ ଚଉଡା ରାସ୍ତା କରାଯାଇଛି ।

ତେଣୁ ଭିଜିଲାନ୍ସ ତଦନ୍ତ ପାଇଁ ଦାବି କରିଛନ୍ତି ସ୍ଥାନୀୟ ଲୋକେ । ସେପଟେ ଏହି ରାସ୍ତାରେ ହୋଇଥିବା ଦୁର୍ନୀତି ସମ୍ପର୍କରେ ତଦନ୍ତ କରାଯିବ ଓ ଯେଉଁମାନେ ଏହି ଦୁର୍ନୀତିରେ ସାମିଲ ଅଛନ୍ତି ସେମାନଙ୍କ ବିରୁଦ୍ଧରେ ଆଇନଗତ କାର୍ଯ୍ୟାନୁଷ୍ଠାନ ନିଆଯିବ ବୋଲି କହିଛନ୍ତି ସ୍ଥାନୀୟ ବିଧାୟକ । ଗୋଟିଏ ରାସ୍ତାକୁ ଏତେ ଟଙ୍କା ବ୍ୟୟରେ, କାହା ନିର୍ଦ୍ଦେଶରେ ଖର୍ଚ୍ଚ କରାଗଲା ? କୋରେଇ ବ୍ଲକର କେଉଁ କେଉଁ ଅଧିକାରୀ ଏହି ଦୁର୍ନୀତିରେ ସାମିଲ ଅଛନ୍ତି ? ପୁଙ୍ଖାନୁପୁଙ୍ଖ ତଦନ୍ତ କରି ସେମାନଙ୍କ ବିରୁଦ୍ଧରେ ଦୃଢ କାର୍ଯ୍ୟାନୁଷ୍ଠାନ ହେବାର ଆବଶ୍ୟକ ଅଛି ।

ଅଧିକ ପଢ଼ନ୍ତୁ ଓଡିଶା ଖବର:

Argus News | argus news | Odisha Latest News, Breaking News, Trending News, Live TV