ବିଧାନସଭାରେ ଉପସ୍ଥାପନ ହେଲା CAG ରିପୋର୍ଟ । ଗୃହରେ ଉପସ୍ଥାପନ କଲେ ମୁଖ୍ୟମନ୍ତ୍ରୀ ମୋହନ ମାଝୀ । ଆଦିବାସୀଙ୍କ ନାଁରେ ହୋଇଛି ବ୍ୟାପକ ଦୁର୍ନୀତି । ବସୁଧା ଯୋଜନାରେ ଅନିୟମିତତା ଧରିଛନ୍ତି ସିଏଜି ।

CAG ଧରିଲେ ପୂର୍ବ ବିଜେଡି ସରକାରର ବଡ଼ ବଡ଼ ଦୁର୍ନୀତି । ଆଦିବାସୀଙ୍କ ବିକାଶ ନାଁରେ ବଡ଼ ଦୁର୍ନୀତି ଧରିଛନ୍ତି CAG । ୨୦୧୮ ରୁ ୨୦୨୩ ମଧ୍ୟରେ ହୋଇଛି ବଡ଼ ଅନିୟମିତତା । ସରକାରୀ ଅନୁଦାନ ଅର୍ଥ ଖର୍ଚ୍ଚ କରିପାରିନାହିଁ ITDA । ୧୭୦୯ କୋଟିରୁ ଖର୍ଚ୍ଚ ହୋଇଛି ୧୧୯୦ କୋଟି ଟଙ୍କା । ଅଡିଟ୍ ରିପୋର୍ଟରେ ITDA ଗୁଡ଼ିକର ଖରାପ ପ୍ରଦର୍ଶନ ଦର୍ଶାଯାଇଛି ।

ସରକାରୀ ଅର୍ଥକୁ ବ୍ୟକ୍ତିଗତ ଖର୍ଚ୍ଚରେ ଲଗାଇଥିବା ସାଙ୍ଘାତିକ ତଥ୍ୟ ଏହି ରିପୋର୍ଟରୁ ମିଳିଛି । ଜୁନିୟର ଓ ଆସିଷ୍ଟାଣ୍ଟ ଇଞ୍ଜିନିୟରମାନେ କୋଟି କୋଟି ଟଙ୍କା ଖର୍ଚ୍ଚ କରିଛନ୍ତି । ଆଦିବାସୀଙ୍କ ବିକାଶ ପାଇଁ ଥିବା ସରକାରୀ ଟଙ୍କାକୁ ନିଜ ସ୍ଵାର୍ଥରେ ଲଗାଇଛନ୍ତି । ମୋବାଇଲ ରିଚାର୍ଜ, UPI ପେମେଣ୍ଟ, ବୀମା ପ୍ରିମିୟମରେ ଟଙ୍କା ଖର୍ଚ୍ଚ କରିଛନ୍ତି । ATMରୁ ଟଙ୍କା ଉଠାଇ ମନଇଚ୍ଛା ଖର୍ଚ୍ଚ କରିଛନ୍ତି ଜୁନିୟର ଓ ଆସିଷ୍ଟାଣ୍ଟ ଇଞ୍ଜିନିୟର । ନିଜ ଖର୍ଚ୍ଚ ପାଇଁ 148 କୋଟି ଟଙ୍କା ଉଡ଼ାଇ ଦେଇଛନ୍ତି ସରକାରୀ ବାବୁ ।

ପୂର୍ବ ସରକାରରେ ସହରାଞ୍ଚଳରେ ପାନୀୟ ଜଳ ଯୋଗାଣ କ୍ଷେତ୍ରରେ ମଧ୍ୟ ହୋଇଛି ବ୍ୟାପକ ଅନିୟମିତତା । 2018 ରୁ 2023, 5 ବର୍ଷରେ 236 ପାନୀୟ ଜଳ ପ୍ରକଳ୍ପରୁ 161ଟି ପ୍ରକଳ୍ପ କାମ ଶେଷ ହୋଇଥିବାବେଳେ 23ଟି କାମ ଚାଲିଛି । 52 ପ୍ରକଳ୍ପର କାମ ଆରମ୍ଭ ହୋଇନାହିଁ । ଠିକାଦାରଙ୍କ ମନମାନି, ଜମି ଅଧିଗ୍ରହଣରେ ବିଳମ୍ବ ଭଳି କାରଣ ଯୋଗୁଁ ପ୍ରକଳ୍ପ ଗୁଡ଼ିକ ଦୀର୍ଘ ଦିନ ଧରି ଶେଷ ହୋଇପାରିନାହିଁ ।

ସ୍ଵତନ୍ତ୍ର ବିଦ୍ୟାଳୟ ଗୁଡିକରେ ସର୍ବନିମ୍ନ ମୌଳିକ ସୁବିଧାର ବ୍ୟବସ୍ଥା କରିନଥିଲେ ପୂର୍ବ ସରକାର । ଏପରିକି ଦିବ୍ୟାଙ୍ଗ ଛାତ୍ରଛାତ୍ରୀଙ୍କ ପାଇଁ ଆବଶ୍ୟକ ଥିବା ଶ୍ରବଣ ଯନ୍ତ୍ର, ବ୍ରେଲି ବହି ଯୋଗାଇ ଦିଆଯାଇନଥିଲା । ଭିନ୍ନକ୍ଷମ ପିଲାଙ୍କୁ ହଷ୍ଟେଲରେ ଖଟ, ବିଛଣା, ମଶା ଦାନି ବି ଦେଇନଥିଲେ ସରକାର ।

ସୂଚନାଯୋଗ୍ୟ, ଗତବର୍ଷ କାଳିଆ ଯୋଜନାରେ କେମିତି ଦୁର୍ନୀତି କରିଥିଲା ବିଜେଡି ସରକାର । ତାହା ସିଏଜି ରିପୋର୍ଟରୁ ସ୍ପଷ୍ଟ ଜଣାପଡିଥିଲା । କୋଟିଏ କି ଦୁଇ କୋଟି ନୁହେଁ ବରଂ ଅଯୋଗ୍ୟ ହିତାଧିକାରୀ ପ୍ରାୟ ୭୮୨ କୋଟି ଟଙ୍କା ନେଇଯାଇଥିବା ଜଣାପଡିଥିଲା । କୁହାଯାଉଥିଲା କି ରାଜସ୍ଵ ଲୁଟ୍‌ କରିବାକୁ ଜାଣିଶୁଣି ଫନ୍ଦି କରିଥିଲେ ସେବର ସରକାର ।

ଆହୁରି ପଢନ୍ତୁ ସିଏଜି ରିପୋର୍ଟ ଖୋଲିଦେଲା କାଳିଆ ଗୁମର, ଦୁର୍ନୀତି ହୋଇଛି...

Argus News | argus news | Odisha Latest News, Breaking News, Trending News, Live TV