ସରିଲା ରାଜ୍ୟ କ୍ୟାବିନେଟର ଗୁରୁତ୍ୱପୂର୍ଣ୍ଣ ବୈଠକ । ୧୦ ବିଭାଗର ୧୨ଟି ପ୍ରସ୍ତାବ ଉପରେ ବାଜିଲା କ୍ୟାବିନେଟ ମୋହର । ବୈଠକ ଶେଷ ହେବାପରେ ଏ ନେଇ ଗଣମାଧ୍ୟମକୁ ସୂଚନା ଦେଇଛନ୍ତି ମୁଖ୍ୟ ଶାସନ ସଚିବ ଅନୁ ଗର୍ଗ । ତେବେ ଲୋକସେବା ଭବନରେ ଆଜି ପୂର୍ବାହ୍ନ ୧୧ଟାରେ ମୁଖ୍ୟମନ୍ତ୍ରୀ ମୋହନ ଚରଣ ମାଝୀଙ୍କ ଅଧ୍ୟକ୍ଷତାରେ ବସିଥିଲା ବୈଠକ । ରାଜ୍ୟ ସମବାୟ ନୀତିକୁ ରାଜ୍ୟ କ୍ୟାବିନେଟ୍‌ରେ ମଞ୍ଜୁରୀ ।

ଓଡ଼ିଶାରେ ନିର୍ମାଣ ହେବ ପ୍ରତିରକ୍ଷା ଏବଂ ଏରୋସ୍ପେଶ ସାମଗ୍ରୀ

ଶିଳ୍ପ ବିଭାଗ ପ୍ରସ୍ତାବ ଉପରେ କ୍ୟାବିନେଟ ବୈଠକରେ ମୋହର ବାଜିଛି । ଢେଙ୍କାନାଳରେ କଲ୍ୟାଣୀ ଗ୍ରୁପ ଦ୍ବାରା ଏକ ସମନ୍ବିତ ଅଟୋମୋଟିଭ୍‍, ଏରୋସ୍ପେଶ୍ ଏବଂ ପ୍ରତିରକ୍ଷା ଉପକରଣ ଉତ୍ପାଦନ କମ୍ପ୍ଲେକ୍ସକୁ ଅନୁମୋଦନ କରିଛନ୍ତି । ଢେଙ୍କାନାଳର ଗଜମରାଠାରେ ୧୧୦୦ ଏକର ଜମିରେ ଏହା ନିର୍ମାଣ ହେବ । ଏଥିଲାଗି ୧୭ ହଜାର ୨୫୦ କୋଟି ଟଙ୍କାର ନିବେଶ ହେବା ସହ ୪୮୦୦ରୁ ଅଧିକ ପ୍ରତ୍ଯକ୍ଷ ଏବଂ ୫୫୦୦ ପରୋକ୍ଷ ଭାବେ ୨୦ ହଜାର ନିଯୁକ୍ତି ସୃଷ୍ଟି ହେବ । ଏଠାରେ ଟାଇଟନିୟମ, ସ୍ପେଶାଲ ଷ୍ଟିଲ, ଅଟୋ କମ୍ପୋନେଟ, ଏରୋସ୍ପେଶ, ପ୍ରତିରକ୍ଷା ସାମଗ୍ରୀ ପ୍ରସ୍ତୁତ ହେବ ।

ମାର୍ଚ୍ଚ ଯାଏଁ ଦୁବାଇ ଏବଂ ସିଙ୍ଗାପୁରକୁ ବିମାନ ଉଡାଣ

ଭୁବନେଶ୍ବରରୁ ଦୁବାଇ ଏବଂ ସିଙ୍ଗାପୁରକୁ ବିମାନ ଚଳାଚଳ ପାଇଁ ରାଜ୍ୟ ସରକାର ଆର୍ଥିକ ସହାୟତା ଯୋଗାଇଦେବେ । ଭୁବନେଶ୍ବରରୁ ଦୁବାଇ ଯାତ୍ରାରେ ଯାତ୍ରୀ ସଂଖ୍ୟା ହ୍ରାସ ଓ ବିମାନ ସେବା ବନ୍ଦ ହେବାର ଆଶଙ୍କା ଦୃଷ୍ଟିରେ ଆଗାମୀ ୬ ମାସ ଅର୍ଥାତ ମାର୍ଚ୍ଚ ପର୍ଯ୍ୟନ୍ତ ସରକାର ଆର୍ଥିକ ସହାୟତା ପ୍ରଦାନ କରିବେ । ସେହିପରି ଭୁବନେଶ୍ବରରୁ ସିଙ୍ଗାପୁର ମଧ୍ୟରେ ଯାତ୍ରା ସମୟରେ କମ ଯାତ୍ରୀ ଓ ଅଧିକ ପରିଚାଳନା ଖର୍ଚ୍ଚ ଯୋଗୁଁ ଏହି ରୁଟ୍‌କୁ ପ୍ରାୟ ୬ ମାସ ପାଇଁ ସରକାର ଆର୍ଥିକ ସହାୟତା ଯୋଗାଇବେ । ଏହି ଦୁଇ ରୁଟ୍ ପାଇଁ ୬ ମାସର VGF (ଭାଏବିଲିଟି ଗ୍ଯାପ୍ ଫଣ୍ଡିଂ) ସହାୟତା ପାଇଁ ପ୍ରାୟ ୨୬.୮୭ କୋଟି ଟଙ୍କା ପ୍ରସ୍ତାବିତ ହୋଇଛି । ଏହା ୧୦୬୦ କୋଟି B-MAAN ବଜେଟ୍ ମଧ୍ୟରୁ ବ୍ୟୟ କରାଯିବ । ପରବର୍ତ୍ତୀ ସମୟରେ ଏହା ଚାଲୁ ରହିବ କି ନାହିଁ ମୁଖ୍ୟମନ୍ତ୍ରୀ ନିଷ୍ପତ୍ତି ନେବେ ।

ରାଜ୍ୟ ସମବାୟ ନୀତି ୨୦୨୬କୁ ଅନୁମୋଦନ

ଏହି ନୀତିର ପ୍ରମୁଖ ଉଦ୍ଦେଶ୍ୟ ହେଉଛି ସମବାୟର ସ୍ବତଃ ଅଭିବୃଦ୍ଧି ପାଇଁ ଏକ ସ୍ଥାୟୀ ଆଇନଗତ, ନିୟାମକ ଏବଂ ଆର୍ଥିକ ଢାଞ୍ଚା ପ୍ରଦାନ କରିବା । ସମବାୟ ମାଧ୍ୟମରେ କୃଷି-ପ୍ରକ୍ରିୟାକରଣ, ଗୋଦାମ, ଯୋଗାଣ ଶୃଙ୍ଖଳା ଭିତ୍ତିଭୂମି ଏବଂ ବଜାର ସଂଯୋଗକୁ ପ୍ରୋତ୍ସାହିତ କରିବା । ଏହି ନୀତି ରାଜ୍ୟର ସମବାୟ ଆନ୍ଦୋଳନକୁ ଏକ ନୂତନ ଦିଗ ଓ ଗତି ପ୍ରଦାନ କରିବ ବୋଲି ଆଶା କରାଯାଉଛି । ପ୍ରାରମ୍ଭିକ ଭାବେ ଏହି ନୀତି ୨୦୩୬ ପର୍ଯ୍ୟନ୍ତ ବଳବତ୍ତର ରହିବ ବୋଲି ପରିକଳ୍ପନା କରାଯାଉଛି ।

ଅନ୍ୟ ପ୍ରସ୍ତାବ ମଧ୍ୟରେ ଓଡ଼ିଶା ୟୁନିଫର୍ମ ସେବା କର୍ମଚାରୀ ଚୟନ ଆୟୋଗ ଅଧ୍ୟକ୍ଷ ଏବଂ ସଦସ୍ୟ ନିଯୁକ୍ତି ନେଇ ଆଇନକୁ କ୍ୟାବିନେଟରେ ପାରିତ କରାଯାଇଛି । ଓପିଏସସି ଢାଞ୍ଚାରେ ଏହି ଆୟୋଗରେ ଅଧ୍ୟକ୍ଷ ଏବଂ ସଦସ୍ୟ ନିଯୁକ୍ତି ହେବେ । ସେହିପରି ଓଡ଼ିଶା କର୍ମଚାରୀ ରାଜ୍ୟ ବୀମା ଯୋଜନା ନର୍ସିଂ ସେବା ନିୟମ ୨୦୨୫କୁ କ୍ୟାବିନେଟ ମଞ୍ଜୁରୀ ପ୍ରଦାନ କରାଯାଇଛି । ଜଳସମ୍ପଦର ଡାଇଭର୍ସନ ସିଷ୍ଟମ ପାଇଁ ୩୬୨ କୋଟି ପ୍ରଦାନ କରାଯାଇଛି ।


ଏଥିସହ ପଢନ୍ତୁ: କଳିକେଶଙ୍କୁ ନବୀନଙ୍କ ଡକରା; ମିଳିପାରେ ବଡ଼ ଦାୟିତ୍ବ