ହାଇଦ୍ରାବାଦରେ ମିନି ଓଡ଼ିଶାର ଭ୍ରମ । ସମ୍ବଲପୁରୀ ଗୀତ, ନାଚରେ ଝୁମିଲେ ଦର୍ଶକ । ଓଡ଼ିଆ କଳା ସଂସ୍କୃତିର ଝଲକ ଦେଖିଲା ପଡ଼ୋଶୀ ରାଜ୍ୟ । ଓଡ଼ିଶାର ସୁସ୍ଵାଦୁ ଖାଦ୍ୟ, ବ୍ୟଞ୍ଜନ ଖାଇ ସମସ୍ତେ କହିଛନ୍ତି ବାଃ ବାଃ । ତେବେ ପ୍ରତିବର୍ଷ ପରି ଏଥର ମଧ୍ୟ ତେଲେଙ୍ଗାନାର କ୍ୟାପିଟାଲ ସିଟି ହାଇଦ୍ରାବାଦର ଶିଳ୍ପାରମମଠାରେ ସ୍ବାଭିମାନୀ ଓଡ଼ିଆ ଓମେନ୍ସ ୱାର୍ଲ୍ଡ (SOWW) ପକ୍ଷରୁ ଓଡ଼ିଶା ଫୁଡ୍ ଆଣ୍ଡ କ୍ରାଫ୍ଟ ମେଳା-୨୦୨୬ ଫେବୃଆରୀ ୬ ତାରିଖରୁ ୮ ତାରିଖ ପର୍ଯ୍ୟନ୍ତ ତିନି ଧରି ଆୟୋଜିତ ହୋଇଯାଇଛି । କାର୍ଯ୍ୟକ୍ରମରେ ଅନେକ ମାନ୍ୟଗଣ୍ୟ ବ୍ୟକ୍ତିବିଶେଷ ଯୋଗଦେଇ ଓଡ଼ିଶା ସଂସ୍କୃତିକୁ ଆଗକୁ ବଢାଇବା ଲାଗି କିପରି ଏକାଠି ହେବା ସେ ଉପରେ ଆଲୋଚନା କରିଥିଲେ । ଏହି ମେଳା ଦ୍ଵାରା ଓଡ଼ିଶାର ହସ୍ତଶିଳ୍ପ ଜାତୀୟ ସ୍ତରରେ ପରିଚିତ ହୋଇପାରିଛି ବୋଲି ସେମାନେ କହିଥିଲେ । 

ଏହି ମେଳାରେ ଓଡ଼ିଶାର ସମୃଦ୍ଧ ସଂସ୍କୃତି, ପାରମ୍ପରିକ ଖାଦ୍ୟ ଓ ହସ୍ତଶିଳ୍ପର ଏକ ସୁନ୍ଦର ସମାରୋହ ଦେଖିବାକୁ ମିଳିଛି । ତିନି ଦିନିଆ ଏହି ସାଂସ୍କୃତିକ ମହୋତ୍ସବର ପ୍ରମୁଖ ଉଦ୍ଦେଶ୍ୟ ଥିଲା ଓଡ଼ିଶାର ସମୃଦ୍ଧ ପରମ୍ପରା, କଳା, ହସ୍ତଶିଳ୍ପ, ପାରମ୍ପରିକ ଖାଦ୍ୟ, ସଙ୍ଗୀତ ଓ ନୃତ୍ୟକୁ ପ୍ରଚାର ଓ ପ୍ରସାର କରିବା । ଏହି ମଞ୍ଚରେ କଳାକାର, ଶିଳ୍ପୀ ଓ ଖାଦ୍ୟ ପ୍ରେମୀମାନେ ଏକ ଛାତ ତଳେ ଏକତ୍ରିତ ହୋଇଥିଲେ । ଖାଲି ଓଡ଼ିଆ କାହିଁକି ହାଇଦ୍ରାବାଦରେ ରହୁଥିବା ବାହାର ରାଜ୍ୟର ପର୍ଯ୍ୟଟକ ମଧ୍ୟ ଓଡ଼ିଆ କଳା, ସଂସ୍କୃତି ଓ ବ୍ୟଞ୍ଜନର ମଜା ଉଠାଇଥିଲେ ।

• ମେଳାରେ ୩୦ରୁ ଅଧିକ ଓଡ଼ିଆ ହସ୍ତଶିଳ୍ପ ଷ୍ଟଲ୍

ଏହି ମେଳାରେ ୩୦ରୁ ଅଧିକ ଓଡ଼ିଆ ହସ୍ତଶିଳ୍ପ ଷ୍ଟଲ୍ ପଡ଼ିଥିବାବେଳେ ଏଠାରେ ଖାଣ୍ଟି ଓଡ଼ିଶୀ ହସ୍ତତନ୍ତ୍ର, ହସ୍ତଶିଳ୍ପ ଓ ପାରମ୍ପରିକ କଳାକୃତି ପ୍ରଦର୍ଶିତ ହୋଇଥିଲା । ମେଳାକୁ ବୁଲିବାକୁ ଆସିଥିବା ପର୍ଯ୍ୟଟକମାନେ ଏହି ଷ୍ଟଲ୍‌ରୁ ଅନେକ ସାମଗ୍ରୀ କିଣିଥିବା ଦେଖିବାକୁ ମିଳିଥିଲା । ଖାଲି ସେତିକି ନୁହେଁ ହାଇଦ୍ରାବାଦରେ ଜମିଥିଲା ଓଡ଼ିଶା ଖାଦ୍ୟର ପସରା । ଦହିବରା, ରସଗୋଲା, ଛେନାପୋଡ଼, ମୁଢି ମାଂସ ଭଳି ଓଡ଼ିଆ ଖାଦ୍ୟ ପର୍ଯ୍ୟଟକଙ୍କୁ ପରଷା ଯାଇଥିଲା । ପ୍ରାୟ ୨୦ଟି ଖାଦ୍ୟ ଷ୍ଟଲରେ ବିଭିନ୍ନ ପ୍ରକାର ସ୍ଵାଦିଷ୍ଟ ଖାଣ୍ଟି ଓଡ଼ିଆ ବ୍ୟଞ୍ଜନର ମଜା ନେଇଥିଲେ ପ୍ରବାସୀ ଓଡ଼ିଆ ଓ ପର୍ଯ୍ୟଟକ ।

• ଭବ୍ୟ ସାଂସ୍କୃତିକ କାର୍ଯ୍ୟକ୍ରମ ସାଜିଲା ମୁଖ୍ୟ ଆକର୍ଷଣ

ଏହି ମେଳାର ପ୍ରମୁଖ ଆକର୍ଷଣ ଥିଲା ଭବ୍ୟ ସାଂସ୍କୃତିକ କାର୍ଯ୍ୟକ୍ରମ । ଶିଳ୍ପାରମମକୁ ବୁଲିବାକୁ ଆସିଥିବା ପର୍ଯ୍ୟଟକମାନେ ଓଡ଼ିଶୀ ନାଚଗୀତ ପରିବେଷଣ ହେଉଥିବା ସ୍ଥାନ ନିକଟକୁ ଆକୃଷ୍ଟ ହୋଇଥିଲେ । ଏଥିରେ ଓଡ଼ିଶୀ, କଥକ, ସମ୍ବଲପୁରୀ ଓ ଆଦିବାସୀ ଲୋକନୃତ୍ୟ ପରି ପାରମ୍ପରିକ ଓ ଲୋକନୃତ୍ୟ ପ୍ରଦର୍ଶିତ ହୋଇଥିଲା । ଦର୍ଶକମାନେ ଜଣାଶୁଣା ପ୍ରିନ୍ସ ଡାନ୍ସ ଗ୍ରୁପ୍‌ର ବିଶେଷ କଳା ପ୍ରଦର୍ଶନକୁ ବେଶ ଉପଭୋଗ କରିଥିଲେ । ଖ୍ୟାତନାମା ଗାୟିକା ଅମୃତା ନାୟକ ଓ ଇଶ୍ୱରୀ ବେହେରାଙ୍କ ସହ ଅନେକ ପ୍ରତିଭାଶାଳୀ ଗାୟକ ଓ ନୃତ୍ୟଶିଳ୍ପୀମାନେ ମଧ୍ୟ ନିଜର କଳା ପ୍ରଦର୍ଶନ କରିଥିଲେ । 

• 'ଓଡ଼ିଆ କଳା, ସଂସ୍କୃତି ପ୍ରଚାର ଲକ୍ଷ୍ୟ'

ଏହି ମେଳାର ଅୟୋଜକ ତଥା SOWW ପରିବାର ସଦସ୍ୟା ସସ୍ମିତା ମିଶ୍ର କହିଛନ୍ତି ଯେ ସେମାନେ ଗତ ୪ ବର୍ଷ ତଳେ ଓଡ଼ିଆ ସଂସ୍କୃତି, କଳା, ସାହିତ୍ୟ, ବ୍ୟଞ୍ଜନର ପ୍ରଚାର ପ୍ରସାର ଲକ୍ଷ୍ୟରେ ଏହି ମେଳାର ଆୟୋଜନ କରିଥିଲେ । ଧୀରେ ଧୀରେ ଏହି ମେଳା ପ୍ରତି ପର୍ଯ୍ୟଟକଙ୍କ ଆଗ୍ରହ ବଢିଛି । ବର୍ଷ ପରେ ବର୍ଷ ପ୍ରତି ପ୍ରବାସୀ ଓଡ଼ିଆ ଏଠାକୁ ଆସୁଛନ୍ତି ଏବଂ ଓଡ଼ିଶା ବାହାରେ ଓଡ଼ିଆ ଖାଦ୍ୟର ମଜା ନେଉଛନ୍ତି । ଏହି ମେଳା ଜରିଆରେ ଆମେ ଓଡ଼ିଆ ହସ୍ତଶିଳ୍ପକୁ ଅନ୍ତର୍ଜାତୀୟ ସ୍ତରରେ ପହଞ୍ଚାଇବାକୁ ମଧ୍ୟ ଲକ୍ଷ୍ୟ ରଖିଛୁ ।

ଏଥିସହ ପଢନ୍ତୁ: ଫେବୃଆରୀରେ ଛୁଟି କାଟିବା ପାଇଁ ଭ୍ରମଣସ୍ଥଳୀ ଖୋଜୁଛନ୍ତି କି ? ସ୍ଵର୍ଗଠୁ କମ ନୁହଁ ଏହି ସ୍ଥାନ